آئل ٹینکرز کنٹریکٹرز ایسوسی ایشن کی ہڑتال، پیٹرول بحران کا خدشہ

آئل ٹینکرز کنٹریکٹرز ایسوسی ایشن نے ملک بھر میں ہڑتال کا اعلان کرتے یوئے اگلے نوٹس تک پورے ملک کو پٹرولیم مصنوعات کی فراہمی معطل کر دی ہے جس کے باعث ملک بھر میں پیٹرول کی قلت پیدا ہونے کا خدشہ پایا جاتا ہے۔

ایسویسی ایشن کی جانب سے تیل کی سپلائی کو مکمل طور پر بند کردیا گیا ہے۔ یہاں تک کہ پٹرول پمپس کی جانب جانے والے ٹینکرز کو بھی روک کر سڑکوں پر کھڑا کردیا گیا ہے۔

آئل ٹینکرز کنٹریکٹرز ایسوسی ایشن کے مطالبات

ایسوسی ایشن کی جانب سے کچھ ایسے مسائل پیش کیے گئے ہیں جو کہ حل طلب ہیں۔ سب سے بنیادی مسئلہ یہ ہے کہ آئل مارکیٹنگ کمپنیز کی جانب سے کیو سسٹم کی بجائے کمپیوٹرائزڈ سسٹم متعارف کروایا گیا ہے جو کہ اوگرا کی جانب سے تجویز کردہ کیو سسٹم پر عمل در آمد کی بجائے بااثر افراد کی ملکیت میں موجود آئل ٹینکرز کو بھرنے کو ترجیح دیتے ہیں جس سے 15000 سے زائد رجسٹرڈ آئل ٹینکرز متاثر ہو رہے ہیں۔

دوسرا بڑا مسئلہ یہ ہے کہ انکم ٹیکس ودہولڈنگ ریٹ 2.5 فیصد سے بڑھا کر 3.5 فیصد کردیا گیا ہے جس سے آئل کنٹریکٹرز کیلئے کاروبار کرنا مشکل ہو چکا ہے۔ ایسوسی ایشن کے صدرعابداللہ کا کہنا ہے کہ حکومت نے حالیہ سالانہ بجٹ میں انکم ٹیکس ودہولڈنگ ریٹ 2.5 فیصد سے بڑھا کر 3.5 فیصد کر غلط فیصلہ کیا ہے۔

تیسرا مسئلہ یہ ہے کہ آئل مارکیٹنگ کمپنیاں زیادہ تر تیل کی نقل و حمل وائٹ ​​آئل پائپ لائن کے ذریعے کرتی ہیں۔ مزید یہ کہ 70 فیصد تیل کی سپلائی کیماڑی آئل ٹرمینل سے گزرتی ہے جہاں آئل ٹینکرز کو داخل ہونے کی اجازت نہیں ہے۔ ایسے میں ایسوسی ایشن کا آئل مارکیٹنگ کمپنیز سے مطالبہ ہے کہ تیل کہ 50 فیصد سپلائی روڈ ٹینکرز سے ہو جبکہ 50 فیصد وائٹ آئل پائپ لائن کے ذریعے کی جائے۔

ایسوسی ایشن کے صدر کا کہنا ہے کہ جب تک ذیل میں دئیے گئے مطالبات پر عمل درآمد کیا جائے، بصورت دیگر ہڑتال جاری رہے گی:

• آئل سٹوریج کے دوران کیو سسٹم کا استعمال کیا جائے
• انکم ٹیکس ودہولڈنگ ریٹ 3.5 سے2.5 فیصد کیا جائے
• آئل ٹرانسپورٹ میں 50 فیصد کوٹہ

آل پاکستان آئل ٹینکرز اونرز ایسوسی ایشن کا ردعمل

آل پاکستان آئل ٹینکرز اونرز ایسوسی ایشن نے کسی بھی قسم کی ہڑتال سے لا تعلقی کا اعلان کیا ہے۔ ایسوسی ایشن کے سینئر وائس چیئرمین میر شمس شاہوانی کا کہنا ہے کہ کمپیوٹرائزڈ نظام اصل مسئلہ ہے جبکہ باقی مسائل حل کر دئیے گئے ہیں۔

ہڑتال کے بعد حالات اب تک کنٹرول میں ہی ہیں اور پیٹرول پمپس پر پیٹرول کی کافی سپلائی موجود ہے۔ تاہم اگر حکومت اس معاملے کا نوٹس نہیں لیتی اور آئل ٹینکرز کنٹریکٹرز ایسوسی ایشن کے ساتھ بات چیت نہیں کرتی اور ہڑتال مزید بڑھتی ہے تو ملک بھر میں تیل کی قلت پیدا ہو سکتی ہے۔