کار کی صنعت کی زبوں حالی کے بعد، موجودہ معاشی تباہی کا رخ اب بائک انڈسٹری کی طرف ہے۔ قیمتوں میں یکے بعد دیگرے اضافے کے بعد یہاں تک کہ بائکس بھی عام عوام کی پہنچ سے دور ہو رہی ہیں۔ جس کے نتیجے میں موٹرسائیکل کمپنیز سیلز میں کمی کا مظاہرہ کر رہے ہیں۔ جس کے بعد مینوفیکچررز صارفین کو اپنی ڈیلرشپ کی جانب کھینچنے کیلئے مختلف آفرز متعارف کروا رہی ہیں۔
آفر کیا ہے؟
ایک حالیہ پیشرفت میں، پاکستان سوزوکی موٹر کمپنی (PSMC) نے ہنڈا اور یاماہا کی طرح ایک آفر متعارف کروائی ہے۔ کمپنی نے اپنی بائکس کے لیے 0 فیصد مارک اپ قسط کے پلان کا اعلان کیا ہے۔ خیال رہے کہ یہ مذکورہ پلان GSX 125 کے لیے نہیں ہے اور صرف بینک الفلاح کارڈ ہولڈرز اس پیشکش سے فائدہ اٹھا سکتے ہیں۔
تفصیلات ذیل میں دئیے گئے ٹیبل میں درج ہیں۔
جہاں ایک طرف یاماہا اور ہنڈا 9 ماہ کا 0 فیصد مارک اپ پلان پیش کرتے ہیں، سوزوکی نے 18 ماہ کا پلان دیا ہے۔ یعنی کمپنی نے اپنے حریفوں سے بہتر پلان کا اعلان کیا ہے۔ مزید برآں، سوزوکی کا اپنا بھی ایک انسٹالمنٹ پلان ہے جس میں بینک سے متعلقہ کوئی شرط نہیں ہے اور اس سے کوئی بھی فائدہ اٹھا سکتا ہے۔ ایسے میں حالیہ منصوبہ کا کوئی فائدہ نہیں جب کمپنی پہلے سے ہی ایک بہتر سکیم رکھتی ہے۔۔
فروخت میں کمی اور پیداوار بند
پاکستان آٹو موٹیو مینوفیکچررز ایسوسی ایشن (PAMA) کے تازہ ترین نتائج کے مطابق، پاک سوزوکی نے گزشتہ ماہ موٹرسائیکل کی فروخت میں 29.1 فیصد کمی دیکھی۔
مزید برآں، کمپنی نے حال ہی میں اس ماہ اپنی موٹرسائیکل مینوفیکچرنگ کے لیے غیر پیداواری دنوں (NPDs) کے دوسرے دور کا اعلان کیا ہے۔ پاکستان سٹاک ایکسچینج (PSX) کو جاری کیے گئے ایک مراسلے میں سوزوکی نے 22 جون سے 8 جولائی 2023 تک اپنے کار اور بائیک اسمبلی پلانٹ کو عارضی طور پر بند کرنے کا اعلان کیا۔ اس فیصلے کی بڑی وجہ انوینٹری کی ناکافی سطح ہے۔
کمپنی کی گرتی ہوئی سیلز، قیمتوں میں اضافے، ٹیکس کی شرح میں اضافے اور درآمدی پابندیوں نے پوری آٹو انڈسٹری کے لیے ایک مشکل ماحول پیدا کر دیا ہے۔ ان کی پریشانیوں میں اضافہ کرتے ہوئے، سوزوکی کو حال ہی میں انوینٹری کی کمی کی وجہ سے موٹرسائیکل اسمبلی کو پانچ دنوں کے لیے معطل کرنا پڑا۔ ان مشکلات کی روشنی میں، سوزوکی نے گاڑیوں کی صنعت کی ابتر صورتحال پر روشنی ڈالنے کے لیے براہ راست وزیر اعظم شہباز شریف سے رابطہ بھی کیا ہے۔
سوزوکی کی حالیہ پیشکش کے بارے میں آپ کا کیا خیال ہے؟ کیا آپ اس پلان سے فائدہ اٹھائیں گے؟ کمنٹس سیکشن میں اپنے خیالات کا اظہار کریں۔
