سٹیٹسٹِکس بیورو آف پاکستان کی جانب سے جاری کردہ رپورٹ کے مطابق رواں مالی سال کے 11 مہینوں میں گاڑیوں کی درآمد میں 83 فیصد اضافہ ہوا ہے۔ رپورٹ میں بتایا گیا ہے کہ مالی سال 2021 میں CKD کٹس کی درآمد 2.180 بلین ڈالر تھی جبکہ مالی سال 2020 میں درآمد1.431 بلین ڈالر تھی یعنی رواں سال CKD کٹس کی درآمد میں 86.72 فیصد اضافہ ہوا ہے۔
دوسری جانب مالی سال 2020 میں CBU یونٹس کی درآمد 185.861 ملین ڈالر تھی جو 81.29 فیصد اضافے کیساتھ رواں سال بڑھ کر 336.941 ملین ہو چکی ہے جس کی بڑی وجہ پاکستان میں نئی گاڑیوں کی لانچ کے ساتھ ساتھ کار مینوفیکچررز کی تعداد میں اضافہ ہے۔ کمپنیاں اپنی آنے والی گاڑیوں کو ٹیسٹ کرنے کیلئے CBU یونٹس درآمد کر رہی ہیں۔ کمپنیوں کو CBU یونٹس درآمدی ڈیوٹی میں کمی کے تحت پہلے 100 یونٹس فری ملتے ہیں۔ دریں اثنا، کچھ کمپنیاں حال ہی میں لانچ ہونے والی کاروں کی CKDکٹس درآمد کررہی ہیں جن میں چنگان ایلسوِن اور پروٹون ساگا شامل ہیں۔
چھوٹی کاروں پر ٹیکس میں کمی
وفاقی حکومت کی جانب مڈل کلاس لوگوں کو گاڑی خریدنے کے قابل بنانے کیلئے مقامی طور پر تیار کردہ 850 سی سی انجن کے ساتھ آنے والی چھوٹی گاڑیوں پر ایف ای ڈی ٹیکس ختم کر دیا ہے جبکہ سیلز ٹیکس بھی 17 فیصد سے کم کر کے 12.5 فیصد کردیا ہے۔ ٹیکس میں کمی کے بعد پرنس پرل اور سوزوکی آلٹو کی قیمتیں 70 ہزار سے 113000 تک کم ہوئی ہیں۔
APMDA ڈیمانڈ
دوسری جانب آل پاکستان موٹر ڈیلرز ایسوسی ایشن نے حکومت سے مطالبہ کیا ہے کہ استعمال شدہ کاروں کی درآمد میں اضافے کے لئے آئندہ آٹو پالیسی پر نظر ثانی کرے۔ اس سے قبل ایسوسی ایشن کے چئیرمین ایچ ایم شہزاد نے وزارت خزانہ کو خط بھی لکھا ہے جس میں انھوں نے بتایا کہ مقامی کار ساز کس طرح مارکیٹ کا استحصال کررہے ہیں۔ انہوں نے کہا استعمال شدہ گاڑیوں کی درآمد پر پابندیوں کے بعد مارکیٹ میں نئی گاڑیاں دیکھنے کو مل رہی ہیں اور اب آٹو میکرز گاڑیوں کی قیمت بڑھانے کے بعد اون منی کے ذریعے صارفین کے ساتھ دھوکہ دہی کر رہے ہیں۔
حل کیا ہے؟
خط میں مقامی مذکورہ بالا مسائل کے حل کی تجویز پیش کی گئی۔ ایسوسی ایشن کے چئیرمین نے کہا کہ استعمال شدہ کاروں کی درآمد کی اجازت دینی چاہیے۔ انہوں نے درخواست کی کہ درمیانی طبقے کے صارفین کے لئے کم لاگت گاڑیوں کی درآمد کیلئے آٹو پالیسی میں توسیع کی جائے۔
