پاکستان میں اپریل 2021 کے مہینے میں تیل کی فروخت میں 57 فیصد اضافہ دیکھا گیا ہے۔ ملک نے اس مہینے میں 1.67 ملین ٹن تیل فروخت کیا ہے جو اپریل 2020 میں 1.07 ملین ٹن تھا۔ ماہ بہ ماہ (MoM) کی بنیاد پر فروخت میں 13 فیصد اضافہ ہوا ہے جو مارچ 2021 میں 1.49 ملین ٹن تھی۔
رواں مالی سال کے ابتدائی 10 مہینوں میں تیل کی مجموعی فروخت 19 فیصد اضافے کے ساتھ 15.83 ملین ٹن تک جا پہنچی، جو اپریل تا جولائی 2020 تک 13.34 ٹن تھی۔
پٹرول اور ڈیزل کی فروخت :
پٹرول کو دیکھیں تو ملک نے اپریل کے مہینے میں سال بہ سال میں 54 فیصد کا اضافہ کیا ہے جو اپریل 2020 میں 0.44 ملین ٹن سے بڑھتے ہوئے اب 0.67 ملین ٹن تک جا پہنچی ہے۔ البتہ ماہانہ بنیادوں پر دیکھیں تو فروخت میں 2 فیصد کی کمی آئی ہے کیونکہ مارچ 2021ء میں 0.69 ملین ٹن پٹرول فروخت ہوا تھا۔
عارف حبیب لمیٹڈ کی رپورٹ کے مطابق پٹرول کی فروخت اس مالی سال کے پہلے 10 مہینوں (جولائی 2020 تا اپریل 2021) میں 12 فیصد اضافے کے ساتھ 6.73 ملین ٹن تک پہنچی ہے جبکہ گزشتہ سال کے انہی مہینوں میں 5.99 ملین ٹن تھی۔ اس کے علاوہ ڈیزل کی فروخت میں سال بہ سال میں 44 فیصد کا اضافہ ریکارڈ کیا گیا جو اپریل 2020 کے 0.55 ملین ٹن کے مقابلے میں اپریل 2021 میں 0.79 ملین ٹن تک پہنچی۔
فرنس آئل کی فروخت:
فرنس آئل کی فروخت میں سب سے زیادہ 155 فیصد کا سالانہ اضافہ دیکھنے کو ملا ہے جو اپریل 2020 میں 0.07 ملین ٹن کے مقابلے میں اپریل 2021 میں 0.18 ملین ٹن تک جا پہنچا۔ البتہ فرنس آئس کی فروخت میں ماہ بہ ماہ میں 17 فیصد کی کمی دیکھی گئی ہے۔
تیل کی مصنوعات کی سال بہ سال اور ماہ بہ ماہ فروخت کے تقابل کا ایک مختصر چارٹ یہ ہے:
| سال بہ سال | |||
| اپریل 2021 | اپریل 2020 | فرق | |
| تیل کی فروخت | 1.67 ملین ٹن | 1.07 ملین ٹن | 57% |
| پٹرول کی فروخت | 0.67 ملین ٹن | 0.44 ملین ٹن | 54% |
| ڈیزل کی فروخت | 0.79 ملین ٹن | 0.55 ملین ٹن | 44% |
| فرنس آئل | 0.18 ملین ٹن | 0.07 ملین ٹن | 155% |
| ماہ بہ ماہ | |||
| اپریل 2021 | مارچ 2021 | ||
| تیل کی فروخت | 1.67 ملین ٹن | 1.49 ملین ٹن | 13% |
| پٹرول کی فروخت | 0.67 ملین ٹن | 0.69 ملین ٹن | -2% |
| ڈیزل کی فروخت | 0.79 ملین ٹن | 0.53 ملین ٹن | 47% |
وجہ؟
مسافر گاڑیوں، SUVs، پک اپس، موٹر سائیکلوں اور دیگر گاڑیوں کی فروخت میں نمایاں اضافے نے پٹرول کی طلب بڑھانے میں اپنا حصہ ڈالا ہے۔ دوسری جانب ڈیزل کی فروخت کووِڈ-19 پابندیاں نرم پڑنے کی وجہ سے سامان کی درآمد/برآمد بہتر ہونے کی وجہ سے بڑھی ہے۔ گندم کی فصل کی کٹائی نے بھی ڈیزل کی طلب بڑھانے میں اپنا کردار ادا کیا ہے۔
ٹاپ لائن سکیورٹیز کے مطابق تیل کی مجموعی فروخت نجی شعبے میں بجلی کی پیداوار میں استعمال بڑھنے سے بھی بڑھی ہے۔
