وزیراعظم کی ٹویوٹا کے اہم ترین منصوبے کی تعریف

وزیراعظم عمران خان نے ٹویوٹا انڈس موٹرز کمپنی کی مقامی سطح پر ہائبرڈ گاڑیاں تیار کرنے کے منصوبے کو شروع کرنے پر تعریف کی ہے۔ گزشتہ روز کمپنی نے اعلان کیا کہ وہ اس مقصد کے لیے پاکستان میں 100 ملین ڈالر کی سرمایہ کاری کرے گی۔

وزیراعظم نے اسلام آباد میں ایک میٹنگ کے دوران اس منصوبے کی تعریف کی۔ میٹنگ میں ٹویوٹا کے وائس چئیرمین شِنجی یاناگی اور سی ای او علی اصغر جمالی نے بھی شرکت کی۔ اس کے علاوہ وزیر خزانہ شوت ترین، وزیر برائے صنعت و پیداوار خسروبختیار، وزیرِ توانائی حماد اظہر اور دیگر افسران بھی میٹنگ میں شریک تھے۔

وزیراعظم آفس کے مطابق وزیر اعظم نے پاکستان میں روزگار کے نئے مواقع پیدا کرنے کے ساتھ ساتھ موسمیاتی تبدیلی سے نمٹنے کے لیے اقدامات کرنے پر انڈس موٹرز کمپنی کی تعریف کی۔ خان نے متعلقہ حکام کو بین الاقوامی آٹو مارکیٹ میں پاکستان کے کردار کو بڑھانے کی ہدایت کی۔ انہوں نے گاڑیوں کی قیمتوں کو کم کرنے میں انڈس موٹرز کمپنی کے کردار کو سراہا۔ وزیراعظم نے یہ یقین دہانی بھی کرائی کہ حکومت مناسب قیمتوں پر گاڑیوں کی پیداوار کے لیے اپنا کردار ادا کرے گی۔

پاکستان میں ٹویوٹا ہائبرڈ گاڑیوں کی تیاری

جیسا کہ ہم پہلے بتا چکے ہیں کہ ٹویوٹا نے پاکستان میں ہائبرڈ الیکٹرک وہیکلزکی  پیداوار کے لیے پاکستان میں 100 ملین ڈالر کی سرمایہ کاری کا اعلان کیا ہے۔ پاکستان اسٹاک ایکسچینج (پی ایس ایکس) کو بھیجے گئے ایک نوٹیفکیشن میں کمپنی نے کہا کہ انھوں نے فنانس ایکٹ 2021 میں کچھ ٹیکس اور ڈیوٹیز میں کمی کے بعد یہ قدم اٹھایا ہے۔  نوٹیفیکیشن میں مزید بتایا گیا ہے کہ کمپنی یہ رقم اگلے 3 سالوں میں رقم خرچ کرے گی۔

یہ سرمایہ کاری پلانٹ کی اپ گریڈیشن اور توسیع، سپئیر پارٹس اور دیگر اجزاء کے لوکلائزیشن اور پہلی ہائبڑد الیکٹرک گاڑی کی پیداوار کی تیاری کے لیے مختص کی گئی ہے۔

ٹیکس کے فوائد

فنانس ایکٹ 2021 کے تحت حکومت نے ہائبرڈ گاڑیوں کے پارٹس کی درآمد پر صرف 4 فیصد کسٹم ڈیوٹی (سی ڈی) کا اعلان کیا۔ ان پارٹس میں بیٹری پیکس کیلئے کولنگ سسٹم، ہائبرڈ وہیکل بیٹری وولٹیج کیلئے سینسر، پاور کنٹرول یونٹ، الیکٹرک موٹر اور جنریٹر، بیٹری چارجنگ سسٹم، ہائبرڈ سسٹم کنٹرول اور جنکشن باکس شامل ہیں۔

دریں اثنا، حکومت نے پلگ ان ہائبرڈ الیکٹرک وہیکل کے پارٹس کی درآمد پر 3 فیصد کسٹم ڈیوٹی کا اعلان کیا۔

اس کے علاوہ ہائبرڈ الیکٹرک گاڑیوں کی درآمد اور مقامی فراہمی پر سیلز ٹیکس یہ ہے:

• 1800 سی سی تک کی گاڑیوں پر 5 فیصد
• 1801 سے 2500 سی سی تک کی گاڑیوں پر 75 فیصد