سوزوکی، ہنڈا اور کِیا یہ ہائبرڈ گاڑیاں پاکستان میں لانچ کر سکتی ہیں

21 جون کو وزارت صنعت و پیداوار نے فنانس ڈویژن اور ایف بی آر کو ایک درخواست بھیجی جس میں انہوں نے ایچ ای وی گاڑیوں پر نئی ٹیکس پالیسی کی مخالفت کی۔ ذیل میں نوٹس کی ایک کاپی دی گئی ہے:

وزارت صنعت و پیداوار کی جانب سے بھیجے گئے نوٹس میں، اگر آپ پانچواں نکتہ دیکھتے ہیں تو اس میں کہا گیا ہے کہ ہنڈا، سوزوکی، اور کِیا جیسی کمپنیاں مستقبل قریب میں سرمایہ کاری کی منصوبہ بندی کر رہی ہیں۔

یہ واضح طور پر ظاہر کرتا ہے کہ ہنڈا، سوزوکی، اور کیا اپنی CKD لائن اپ میں نئی ​​ہائبرڈ کاریں یا ہائبرڈ ویریئنٹس متعارف کرانے کا منصوبہ بنا رہی ہیں۔

یہ کمپنیاں پاکستان میں کونسی ہائبرڈ گاڑیاں لانچ کریں گی؟ کوئی نہیں جانتا لیکن پاکستان کی معاشی اور مارکیٹ کی صورتحال کی بنیاد پر ہم اندازہ لگا سکتے ہیں کہ یہ کمپنیاں ملک میں کونسی HEVs لا سکتی ہیں۔

سوزوکی

ہائبرڈ اور پاک سوزوکی کا دور دور تک کوئی تعلق بھی نہیں ہے لیکن اگر ایسا ہوتا ہے تو نتیجہ بہت اچھا نکلے گا۔ سوزوکی پہلے سے ہی بہترین فیول ایوریج دینے والی کاریں بناتی ہے جن مںی آلٹو، ویگن آر اور کلٹس شامل ہیں۔ لہذا، اگر سوزوکی کوئی ہائبڑد گاڑی بناتی ہے تو یہی فیول ایوریج مزید بڑھ کر 37 کلومیٹر فی لیٹر تک پہنچ جائے گی۔

ہمارے اندازے کے مطابق سوزوکی آلٹو میں ہائبرڈ سسٹم متعارف کرائے گی۔ یعنی کہ سوزوکی آلٹو ENE چارج آ سکتی ہے۔

سوزوکی ممکنہ طور پر پاکستان میں آلٹو ای این ای چارج متعارف کرائے گا کیونکہ یہ ٹیکنالوجی جاپانی سوزوکی بڑے پیمانے پر استعمال کر رہی ہے بشمول سوزوکی ویگن آر، اسٹنگرے، اور آلٹو جے ڈی ایم۔

آلٹو ENE چارج کی نمایاں خصوصیات:

• 660 سی سی انجن
• 52 ہارس پاور
• مائلڈ ہائبرڈ بیٹری
• 35 کلومیٹر فی لیٹر کی فیول ایوریج

ہنڈا

سوزوکی کی طرح ہنڈا بھی پاکستان میں کوئی HEV ماڈل نہیں بناتی ہے۔ اگر ہنڈا پاکستان میں کوئی ایچ ای وی ماڈل یا ویرینٹ لانچ کرنے کا سوچ رہی ہے تو ہمارا اندازہ ہے کہ وہ ویزل ہائبرڈ ہو سکتی ہے۔ ہمیں لگتا ہے کہ ہنڈا اپنے انٹرنیشنل نام ویزل کے ساتھ HR-V ہائبرڈ متعارف کرائے گی۔

ویزل ہائبرڈ کی نمایاں خصوصیات:

• 1500 سی سیi-Vtec انجن
• 150 ہارس پاور
• 155 نیوٹن میٹر ٹارک
• 5 Ah HEV بیٹری کپیسٹی

کِیا

پچھلے کچھ مہینوں سے ہم یہ افواہیں سن رہے ہیں کہ کِیا جلد ہی سپورٹیج کی نئی جنریشن پاکستان میں لانچ کرے گی۔ فی الحال، ہمارے پاس چوتھی جنریشن کی Sportage ہے، اور کمپنی ممکنہ طور پر 2024 کے آخر تک پانچویں جنریشن کو پاکستان لے آئے گی۔

سپورٹیج کی پانچویں جنریشن ایک ہائبرڈ آپشن کے ساتھ آتی ہے، اور اگر کِیا اپنے ہائبرڈ انفراسٹرکچر میں سرمایہ کاری کرنے کی منصوبہ بندی کر رہی ہے، تو یہ ممکنہ طور پر سب سے پہلے 5th جنریشن سپورٹیج کو ہائبرڈ ٹیرین کے ساتھ متعارف کرائے گی۔

• سپورٹیج کی نمایاں خصوصیات
• 1600 سی سی لیٹر چار سلنڈر انجن
• 227 ہارس پاور
• 196 نیوٹن میٹر ٹارک
•  kWh13.8 ہائبرڈ بیٹری کپسٹی

کِیا سورینٹو ہائبرڈ

ہمیں یقین ہے کہ سورینٹو اس بار ہائبرڈ ہوگی۔ اس کی وجہ یہ ہے کہ پاکستانی مارکیٹ فیول ایوریج کے حوالے سے زیادہ حساس ہے۔