نئی ہنڈا سوِک 2022 کی عارضی قیمتوں کا انکشاف کیا گیا ہے۔ ہنڈا اٹلس کارز (پاکستان) کے آفیشل پیج کے مطابق نئی ہنڈا سِوک کے تین ویرینٹس ہوں گے۔ ایک نوٹیفکیشن میں سامنے لائی گئی گاڑی کی قیمتیں درج ذیل ہیں۔
- 1500 سی سی ہنڈا سوِک ٹربو M-CVT کی قیمت – 5099000 روپے
- 1500 سی سی ہنڈا سوِک اوریل ٹربو M-CVT کی قیمت – 5399000 روپے
- 1500 سی سی ہنڈا سوِک RS ٹربو LL-CVT کی قیمت – 6149000 روپے
مزید برآں، کمپنی نے کار کی بکنگ بھی شروع کر دی ہے۔ نوٹیفکیشن کے مطابق تمام ویرینٹس کی جزوی بکنگ کیلئے 1200000 روپے ادا کرنا ہوں گے۔
قیمتوں کا گزشتہ جعلی نوٹس
اس سے قبل رواں ہفتے سوشل میڈیا پر سوک 2022 کی قیمتوں کا ایک نوٹیفکیشن دیکھا گیا تھا۔ نوٹیفکیشن میں نئی ہونڈا سوک 2022 کی قیمتیں درج تھیں۔ تاہم ہنڈا اٹلس نے اس نوٹیفکیشن کو مسترد کرتے ہوئے وضاحت جاری کردی۔
نوٹس میں کہا گیا کہ ہنڈا نے نئی ہنڈا سِوک کی بکنگ یا اس کی قیمتوں کے بارے میں کوئی اعلان نہیں کیا ہے، کمپنی ایسی جعلی خبریں پھیلانے والوں کے خلاف قانونی کارروائی کرنے کا حق محفوظ رکھتی ہے۔
اس نوٹیفکیشن سے قبل ہمارے ذرائع نے بتایا کہ کمپنی نے نئی سوک کی بکنگ شروع کر دی ہے۔ ذرائع کا کہنا تھا کہ بہت سے صارفین نے بکنگ کیلئے 13 سے 15 لاکھ روپے کی رقم بھی ادا کر دی ہے۔ ڈیلرشپس کی جانب سے دی گئی کچھ رسیدوں میں پرانی جنریشن کی سِوک کی معلومات درج تھیں۔ لیکن اب ہنڈا کے آفیشل سوشل میڈیا پیجز نے قیمتیں شیئر کر دی ہیں تو ہمارے خیال میں ابہام ختم ہو گیا ہے اور اب لوگ نئی سیڈان کی بکنگ کر سکتے ہیں۔
ہنڈا سِوک کی نئی جنریشن اپریل 2021 میں عالمی سطح پر لانچ کی گئی تھی۔ تب سے پاکستان کے لوگ اور سوِک سے مداح اس کار کے منتظر تھے۔ اگر ہم سوِک کی لانچ کی تاریخ پر نظر ڈالیں تو پاکستانی مارکیٹ میں عالمی لانچ کے سال یا اس سے زائد عرصے کے بعد نئی جنریشن ملتی ہے۔ اور اب ہمارے خیال میں یہ روایت برقرار ہے کیونکہ کمپنی نے کار کی بکنگ شروع کردی ہے۔ یعنی اس سال گاڑی باضابطہ طور پر لانچ کر دی جائے گی۔
نئی ہنڈا سِوک کی قیمت کے بارے میں آپ کا کیا خیال ہے؟ کیا آپ کے خیال میں یہ قیمتیں جائز ہیں؟ نیچے دئیے کمنٹ سیکشن میں اپنی رائے کا اظہار کریں۔
