فرانسیسی آٹومیکر بگیٹی نے جنیوا موٹر شو میں دنیا کی مہنگی ترین کار فروخت کی جس کی قیمت تقریباً 3 ارب پاکستانی روپے ہے ۔
سوئٹزرلینڈ میں ہونے والے جنیوا موٹر شو سے پہلے کسی نے سوچا بھی نہیں تھا کہ کوئی اس قسم کی ہائپرکار کے لیے کتنی ادائیگی کر سکتا ہے۔ البتہ برانڈ کے حوالے سے جوش و خروش نے آٹوموبائل انڈسٹری میں نئے معیارات مرتب کردیے ہیں۔ سب جانتے ہیں کہ یہ عظیم ادارہ مہنگی، انتہائی لگژری اور اسپورٹس کاریں بناتا ہے لیکن اس مرتبہ بگیٹی نے دنیا میں فروخت ہونے والی سب سے مہنگی گاڑی کا ریکارڈ توڑ دیا ہے۔ اس بلیک بیوٹی پر موجود پردہ بھی نہیں اٹھایا گیا تھا کہ یہ گاڑی فوری طور پر 19 ملین ڈالرز میں فروخت بھی ہوگئی۔ جی ہاں! آپ نے بالکل ٹھیک قیمت سنی ہے۔ اس میں سڑک پر آنے کے لیے گاڑی کے تمام لگژری ٹیکس بھی شامل ہیں۔ گاڑی کی بنیادی قیمت 12.5 ملین ڈالرز تھی۔ البتہ بگیٹی دعویٰ کرتا ہے کہ یہ فروخت ہونے والی دنیا کی سب سے مہنگی گاڑی ہے۔
کمپنی نے مزید بتایا کہ اس نوعیت کی صرف ایک گاڑی بنائی جائے گی۔ اس موقع پر ادارے کی جانب سے خریدار کی شناخت ظاہر نہیں کی گئی۔ خریدار کو بگیٹی سے بہت لگاؤ ہے اور وہ بہت زیادہ امیر کبیر بھی ہے۔
بگیٹی کی La Voiture Noire خصوصی طور پر 1930ء کی دہائی کی پرانی بگیٹی ٹائپ57 SC اٹلانٹک کی یادوں کو تازہ کرتے ہوئے80 ویں سالگرہ کے موقع پر بنائی گئی۔ تاریخ بتاتی ہے کہ اس مخصوص ماڈل کی صرف 4 گاڑیاں بنائی گئی تھیں۔ ہاگرٹی انشورنس کمپنی کے مطابق، جو گاڑیوں کی قدر و اہمیت کا ریکارڈ رکھتی ہے، یہ ماڈل اس وقت 50 ملین ڈالرز تک حاصل کر سکتے ہیں۔ اس قسم کی صرف تین گاڑیاں ہی آج بچی ہوئی ہیں جبکہ چوتھی دوسری جنگ عظیم کے دوران کھو گئی تھی۔ واضح رہے کہ ٹائپ 57 SC اٹلانٹک کو بگیٹی کے بانی کے صاحبزادے جین بگیٹی نے ڈیزائن کیا تھا۔
دوسری جانب نئی La Voiture Noire اپنے 8-لٹر 16-سلینڈر W16 انجن سے 1479 ہارس پاور (hp) پیدا کرتی ہے جو بہت بڑی طاقت ہے۔ یہ اپنے مخصوص کاربن فائبر باڈی ورک کی وجہ سے بگیٹی کی شیرون سے ملتی جلتی ہے، جس کی قیمت لگ بھگ 3 ملین ہے۔ خوبصورت چمکدار سیاہ رنگت طاقتور انجن کے ساتھ مل کر اس کو دنیا کی نایاب ترین گاڑی بناتی ہے۔ La Voiture Noire کارکردگی کی طرف رحجان رکھنے والے ماڈل کے بجائے ایک برق رفتار ہائپر کار زیادہ ہے۔
آٹوموبائل انڈسٹری کی مزید خبروں کے لیے پاک ویلز کے ساتھ رہیے۔ اپنے خیالات نیچے تبصروں میں پیش کیجیے۔
