آپ نے خاصے پیسے جمع کرلیے اور اب اپنے کے لیے گاڑی خریدنا چاہتے ہیں تو یہ جان کر آپ کو ضرور خوشی ہوگی کہ یہاں محدود بجٹ میں بھی چند اچھی گاڑیاں دستیاب ہیں۔ پاکستان میں گاڑیوں کی منڈی آج سے دس سال پہلے کے مقابلے میں کہیں زیادہ بہتر ہوچکی ہے۔ نہ صرف یہ کہ نئی گاڑیاں برائے فروخت ہیں بلکہ پرانی گاڑیوں کی قیمت میں بھی بتدریج کمی آ رہی ہے۔ موجودہ وقت میں آپ 10 لاکھ روپے کے اندر اندر بہت اچھی گاڑیاں خرید سکتے ہیں۔ اس کے علاوہ بیرون ملک سے گاڑی درآمد بھی کی جاسکتی ہے۔
اس بلاگ میں ان گاڑیوں سے متعلق بات کروں گا جو 10 لاکھ روپے کے بجٹ میں حاصل کی جاسکتی ہیں۔ حقیقت تو یہ ہے کہ اس بجٹ میں درجنوں گاڑیوں کا انتخاب موجود ہے جس میں سے آپ اپنے حساب سے گاڑی منتخب کرسکتے ہیں۔ مجھے بھی اس بلاگ کے لیے ان گاڑیوں میں سے چند بہترین منتخب کرنے میں قدرے مشکل پیش آئی۔ میری کوشش ہوگی کہ مختصراً ہی سہی زیادہ سے زیادہ گاڑیوں سے متعلق ہم یہاں بات کریں۔اس مضمون کا مقصد ان لوگوں کو رہنمائی فراہم کرنا ہے جومحدود بجٹ میں نئی گاڑی خریدنا چاہتے ہیں۔
تو معاملہ یہ ہے کہ آپ کے پاس 10 لاکھ روپے ہیں اور آپ گاڑی لینا چاہتے ہیں۔ اس ضمن میں سب سے پہلے تو یہ فیصلہ کرلیں کہ آپ بالکل نئی گاڑی خریدنا چاہتے ہیں یا استعمال شدہ گاڑی لینا چاہتے ہیں۔ نئی اور پرانی دونوں طرح کی گاڑیوں کے اپنے فوائد اور انفرادیت ہے۔ مثال کے طور پر اگر آپ 4×4 لینا چاہتے ہیں تو 10 لاکھ میں نئی تو آئے گی نہیں، یوں آپ کو استعمال شدہ ہی خریدنی پڑے گی۔ نئی اور پرانی گاڑی میں سے ایک کا فیصلہ کرلینے کے بعد اندازہ لگائیں کہ آیا یہ گاڑی دستیاب بجٹ میں آپ کی ضروریات پوری کرے گی یا نہیں۔
اسے مزید بہتر اور باآسانی سمجھنے کے لیے محدود بجٹ میں دستیاب گاڑیوں کو تین زمروں میں تقسیم کردیتے ہیں:
ہیچ بیکس
سیڈان
SUV
ہیچ بیکس
اگر آپ بغیر ڈگی والی یعنی ہیچ بیک گاڑی خریدنا چاہتے ہیں تو آپ کے پاس بے شمار برانڈز موجود ہیں۔ 10 لاکھ روپے میں آپ نئی ہیچ بیک بھی لے سکتے ہیں اور استعمال شدہ بھی۔ اگر بالکل نئی خریدنا چاہیں تو سوزوکی مہران 6.8 لاکھ روپے، یوروII مہران 6.8 روپے کےعلاوہ سوزوکی ویگن آر 11 لاکھ روپے میں حاصل کرسکتے ہیں۔ مزید برآں سوزوکی، ٹویوٹا، ڈائی ہاٹسو جیسے معروف جاپانی کار ساز اداروں کی استعمال و درآمد شدہ گاڑیاں بھی خریدی جاسکتی ہیں جن کی فہرست یہاں موجود ہے۔
سیڈان
افسوس کے ساتھ لکھنا پڑ رہا ہے کہ 10 لاکھ میں کوئی نئی سیڈان تو اب دستیاب نہیں البتہ استعمال شدہ سیڈان گاڑیاں اس بجٹ میں ضرور مل جائیں گی۔ اگر آپ ہونڈا کے مداح ہیں تو چھٹی اور ساتویں جنریشن کی سِوک مل سکتی ہے۔ اگر آپ زیادہ خوش قسمت ہیں تو آٹھویں جنریشن کی ہونڈا سِوک بھی لگ بھگ 10 لاکھ میں مل سکتی ہے۔ اس کے علاوہ 2009-10 کی ٹویوٹا کرولا بھی وافر مقدار میں دستیاب ہے۔ اگر آپ اس سے زیادہ جدید گاڑی لینا چاہتے ہیں تو سوزوکی لیانا 2010-12 بھی مل سکتی ہے البتہ ملک میں اس کی مشہوری کچھ زیادہ نہیں ہے۔ ویسے اس زمرے میں 2000 سے پہلے کی مرسڈیز بینز C- کلاس بھی شامل ہے بشرطیکہ وہ اچھی حالت میں مل جائے۔
SUV
اس زمرے میں بہت کم ہی گاڑیاں مل سکیں گی۔ اس کی وجہ عام لوگوں کا مہنگی SUVs کی طرف راغب ہونا ہے۔ لہٰذا کار ساز ادارے بھی پرتعیش اور بیش قیمت SUVs بنانے کو ترجیح دیتی ہیں۔ لوگ اس گاڑی کو اپنی شان و شوکت کے اظہار اور بیرون شہر سفر کے لیے استعمال کرتے ہیں۔ اگر آپ سستی SUV لینا چاہتے ہیں تو ٹویوٹا کی 4×4 فہرست میں شامل پراڈ اور RKR خریدنا تو شاید ممکن نہ ہو البتہ MMC پجیرو (1995 سے بعد کا ماڈل) قریباً 10 لاکھ روپے میں مل جائے گا۔ اس کے علاوہ منی پجیرو پر بھی غور کیا جاسکتا ہے۔
اگر آپ پاک ویلز پر موجود استعمال شدہ گاڑیوں کا زمرہ ملاحظہ کریں یا پھر خود مارکیٹ میں نکلیں تو اور بھی بہت سی گاڑیاں مل جائیں گی۔ بس آپ نے یہ خیال رکھنا ہے کہ جو بھی گاڑی لیں وہ آپ کے قیمتی پیسوں کا حق رکھتی ہے اور آپ کی ضرورت پوری کرسکے۔
