آٹو سیکٹر کے اہم اسٹیک ہولڈرز کی جانب سے وفاقی کابینہ کی منظور شدہ الیکٹرک وہیکل (EV) پالیسی کو کڑی تنقید کا نشانہ بنایا گیا تھا۔ EV پالیسی وزارت موسمیاتی تبدیلی (MoCC) نے پیش کی تھی اور یہ ملک کی اوّلین الیکٹرک وہیکل پالیسی تھی۔ وزیر اعظم کے مشیر برائے صنعت و پیداوار، تجارت و سرمایہ کاری عبد الرزق داؤد کی زیر صدارت جمعرات کو ایک اجلاس منعقد ہوا۔ اس میں یہ فیصلہ کیا گیا کہ وزارت صنعت و پیداوار (MoIP) انجینئرنگ ڈیولپمنٹ بورڈ (EDB) کی مدد سے EV پالیسی کا مسودہ ازسرِ نو تیار اور نافذ کرے گی۔
جمعرات کو ہونے والے اجلاس میں پاکستان ایسوسی ایشن آف آٹو پارٹس اینڈ ایکسیسریز مینوفیکچررز(PAAPAM)، پاکستان آٹوموٹو مینوفیکچررز ایسوسی ایشن (PAMA)، فیڈرل بورڈ آف ریونیو (FBR)، پلاننگ کمیشن آف پاکستان، وزارت تجارت، وزارت صنعت و پیداوار اور معروف آٹو مینوفیکچررز جیسے اہم اسٹیک ہولڈرز نے شرکت کی۔ قبل ازیں EV پالیسی پر تنقید کی گئی تھی کہ اس کی تیاری میں تمام اسٹیک ہولڈرز سے مشورہ نہیں لیا گیا۔ البتہ اِس بار تمام اسٹیک ہولڈرز کو مشاورت کے لیے مدعو کیا گیا۔
عبد الرزاق داؤد نے کہا کہ نئی EV پالیسی وزارت صنعت و پیداوار اور انجینئرنگ ڈیولپمنٹ بورڈ کی جانب سے ایک مہینے میں پیش کی جائے گی۔ انہوں نے اس امر پر بھی زور دیا کہ EV پالیسی وزارت صنعت و پیداوار کے دائرۂ اختیار میں ہوگی۔ آٹو سیکٹر نے اس فیصلے پر اطمینان کا اظہار کیا کہ اب ایک ٹیکنیکل ادارہ EV پالیسی کی سربراہی کرے گا۔ وزارت موسمیاتی تبدیلی کے بجائے اب اُس کا EV پالیسی کے معاملات سنبھالنا زیادہ مطابقت رکھتا ہے۔
اجلاس میں EV سیکٹر کے لیے نان-ٹیرف اور ٹیرف تجاویز پر بھی توجہ کی گئی۔ انجینئرنگ ڈیولپمنٹ بورڈ نے شرکاء سے کہا کہ وہ EV پالیسی کے حوالے سے تجاویز جلد پیش کریں۔ اجلاس میں زیر بحث آنے والے اہم موضوعات میں EV سیکٹر میں آٹو پالیسی 2016-2021ء کے تحت سرمایہ کاری کے لیے اسٹیک ہولڈرز کی تجاویز، روزگار کے مواقع، سازوسامان کی معیار بندی، قومی خزانے پر اثرات، لوکلائزیشن کی ترویج اور EVs کے لیے فاضل پرزہ جات کی طویل میعاد میں برآمد شامل تھے۔ مشیر نے مزید کہا کہ EV میں سرمایہ کاری کو تحفظ دیا جائے گا تاکہ یہ پالیسی کامیاب ہو پائے، اس کے لیے تمام اسٹیک ہولڈرز کی مشترکہ کاوشیں درکار ہوں گی۔ EV پالیسی اب اِس طرح تیار کی جائے گی کہ یہ تمام اسٹیک ہولڈرز اور ملک کی ضروریات پر پورا اترے اور ان کے عین مطابق ہو۔
چیئرمین EDB نے اجلاس میں شرکت اور EV پالیسی میں ابہام کو واضح کرنے پر مشیر کا شکریہ ادا کیا۔ یہ آٹو انڈسٹری ڈیولپمنٹ کمیٹی (AIDC) کا 30 واں اجلاس تھا۔ EDB نے کمیٹی کو یقین دلایا کہ وہ مذکورہ عرصے میں EV پالیسی کا مسودہ پیش کرے گا۔ EDB اس پالیسی کی تیاری میں “پاکستان میں تیار کردہ” کے ایجنڈے پر زور دے گا۔ EVs کے لیے صرف ضروری پرزے ہی درآمد کیے جائیں گے اور باقی پرزے مقامی سطح پر تیار ہوں گے۔
متعلقہ خبروں اور معلوماتی مواد کے لیے پاک ویلز پر آتے رہیے اور اپنی رائے نیچے تبصروں میں پیش کیجیے۔
