اب ہر نئی اور استعمال شدہ گاڑی خریدنے والے فرد کو گاڑیوں کی رجسٹریشن پر اسمارٹ کارڈ جاری کیا جائے گا۔ علاوہ ازیں ہر گاڑی کے مالک کو علیحدہ نمبر پلیٹ بھی حاصل کرنا ہوگی۔ ایڈیشنل ڈائریکٹر جنرل ایکسائز نے کہا ہے کہ اس سے گاڑیوں کی معلومات اور ملکیت کی بروقت منتقلی یقینی بنانے میں مدد ملے گی۔
محکمہ ایکسائز کی جانب سے ملک بھر میں گاڑیوں کی رجسٹریشن کے مرکزی نظام اور پرانے وقتوں کے طریقہ کار کو ختم کرنے کا فیصلہ کرلیا گیا ہے۔ ذرائع کے مطابق اس ضمن میں تمام تیاریاں مکمل کر لی گئی ہیں اور اس نظام کی تیاری پر کام زور و شور سے جاری ہے۔ خیال ظاہر کیا جارہا ہے کہ اس نئے نظام کو رواں مالی سال کے آخر میں لاگو کردیا جائے گا۔
اس جدید طریقے سے ہر گاڑی کے مالک کو اسمارٹ رجسٹریشن بُک، ایک یونیورسل نمبر اور رجسٹریشن پلیٹ فراہم کی جائے گی۔ اس سے گاڑی میں سفر کرنے والوں کو کئی ایک کاغذات سنبھال رکھنے کی جھنجھٹ سے چھٹکارا حاصل ہوجائے گا۔ذرائع کے مطابق محکمہ ایکسائز نے اولاً صرف یونیورسل نمبر جاری کرنے کا فیصلہ کیا تھا تاہم بعد ازاں اس منصوبے کو مزید بہتر بنانے کا فیصلہ کیا گیا تاہم مختلف مسائل یکسر حل کرنے کی کوشش کی جاسکے۔ ذرائع نے مزید بتایا کہ محکمہ ایکسائز اینڈ ٹیکسیشن پنجاب اس نظام کو نافذ کیے جانے کے بعد ایجنٹ مافیا سے چھٹکارا پانے کے لیے بھی پر امید ہے۔ علاوہ ازیں اس نظام سے گاڑیوں کی رجسٹریشن پہلے سے زیادہ آسان ہوجانے اور جعل سازی ورشوت ستانی جیسے عوامل سے پاک بنانے میں بھی مدد ملے گی۔
محکمہ ایکسائز کے ایڈیشنل ڈائریکٹر جنرل چودھری مسعود الحق نے کہا کہ ہم اس نئے نظام کو جون 2017 سے پہلے لاگو کرنے کی کوشش کر رہے ہیں۔ انہوں نے امید ظاہر کی کہ اس سے ایجنٹ مافیا کا خاتمہ ممکن ہوسکے گا۔ انہوں نے مزید کہا کہ نئے نظام سے گاڑیوں کی قدر کے تعین میں بھی مدد ملے گی۔
