گاڑیوں کے شعبے میں جانے مانے اداروں کے لیے 2016 کا سال کافی مثبت رہا ہے۔ رواں سال گاڑیاں تیار کرنے والے متعدد مشہور و معروف اداروں جیسا کہ فورڈ، ہارلے-ڈیوڈسن وغیرہ اپنی نت نئی موٹر سائیکلوں اور گاڑیوں میں جدید ٹیکنالوجیز شامل کر رہی ہیں۔ اس کا مقصد صارفین کو نئے اور جدید رجحانات سے استفادہ حاصل کرنے کا موقع فراہم کرنا ہے۔ ایسے میں لینڈ رُووَر (Land Rover) کی پانچویں جنریشن کی تصویری جھلکیاں بھی منظر عام پر آگئی ہیں جسے ‘ لینڈ رُووَر ڈسکوری’ کا نام دیا گیا ہے۔ لینڈ روور کے اس نئے 2017 ماڈل کو رواں سال پیرس موٹر شو میں دکھایا جائے گا۔
لینڈ رُووَر ڈسکوری کی تازہ تصویر منظر عام پر آنے سے قبل خیال ظاہر کیا جارہا تھا کہ نئی SUV کا ڈیزائن قابل توجہ نہیں ہوگا۔ تاہم اب محسوس ہوتا ہے کہ گاڑیوں کے شوقین افراد کی رائے تصویر دیکھ کر تبدیل ہورہی ہے۔ اس گاڑی کا اندرونی حصہ معروف کونران گروپ کی جانب سے ڈیزائن کیا گیا ہے۔
مسافروں کی سہولت کے لیے لینڈ روور ڈسکوری میں سات نشستیں شامل کی گئی ہیں۔ تمام ہی نشستوں کے لیے لیگ روم کافی زیادہ دیا گیا ہے تاکہ لمبے سفر کے دوران مسافروں کو ٹانگیں اور بازو پھیلانے میں مشکل پیش نہ آئے۔ اس نئی گاڑی کا نہ صرف باہری حصہ بلکہ اندرونی حصے کی تیاری میں بھی انتہائی اعلیٰ اور معیاری ساز و سامان استعمال کیا گیا ہے۔البتہ یہ کہنا درست ہوگا کہ اس کے ظاہری انداز کو بہتر اور دلکش بنانے کے لیے کار ساز ادارے نے انتہائی سنجیدگی سے کام کیا ہے اور ان کی یہ محنت ہر گز رائیگاں نہیں گئی۔
گاڑی تیار کرنے والے ادارے نے کہا ہے کہ نئی لینڈ رُووَر ڈسکوری ماضی کے تمام ماڈلز کے مقابلے میں کم وزنی ہوگی جس سے اس کی افادیت پر مثبت اثرات مرتب ہوں گے۔ وزن میں کم ہونے کی خاصیت کار ساز ادارے کو 2000cc ڈیزل انجن لگانے کی بھی گنجائش فراہم کرے گی جس کا براہ راست اثر گاڑی کی قیمت میں کمی کی صورت میں متوقع ہے۔
لینڈ رُووَر ڈسکوری کے حریفوں کی بات کریں تو ان میں آوڈی Q7، وولوو XC90 اور دیگر ہائبرڈ گاڑیاں شامل ہیں۔ کیا آپ سمجھتے ہیں کہ نئی جنریشن لینڈ رُووَر ان گاڑیوں سے زیادہ خریداروں کو اپنی جانب متوجہ کرنے میں کامیاب ہوسکے گی؟ ہمیں اپنی رائے سے ضرور آگاہ کریں۔
