برطانوی ریاست لیور پول میں واقع ایک سات منزلہ پارکنگ پلازا میں خطرناک آگ لگنے سے لگ بھگ 1400 گاڑیاں نظر آتش ہو گئیں۔ افسران کے مطابق ایک لینڈ رووَر میں اچانک آگ بھڑک اٹھی جس نے دیکھتے ہی دیکھتے وہاں کھڑی باقی گاڑیوں کو بھی اپنی لپیٹ میں لے لیا۔ ایک اندازے کے مطابق اس حادثے میں کم از کم 2 کروڑ پاؤنڈ لاگت کا مالی نقصان ہوا ہے جبکہ کسی جانی نقصان کی اطلاع نہیں ملی۔
حادثے کے بعد شہری اداروں کی جانب سے گھوڑوں کی بین الاقوامی نمائش بھی منسوخ کر دی گئی ہے۔ افسران کا کہنا ہے کہ تیز ہوا کے باعث پارکنگ پلازا میں لگنے والی آگ نے مزید شدت اختیار کی اور آس پاس کی عمارتوں کو بھی اپنی لپیٹ میں لے لیا۔ تاہم جائے وقوعہ سے تقریباً 80 کتے اور گھوڑوں کو بحفاظت نکال لیا گیا ہے۔
مقامی پولیس حکام کا کہنا ہے کہ اس ہولناک حادثے پر قابو پانے کے لیے آگ بھجانے والی 21 گاڑیاں اور متعدد فائر فائٹرز نے انتھک محنت کی۔ حکام کا کہنا ہے کہ وہ ان لوگوں کے لیے عارضی رہائش گاہوں کا بندوبست کر رہے ہیں جو گاڑی نظر آتش ہو جانے کے باعث اپنے گھر واپس نہیں جا سکتے۔ مزید برآں نظر آتش پارکنگ پلازا کے نزدیک واقع عمارات بھی شدید دھویں کی لپیٹ میں آئیں جن کے باعث انہیں خالی کرا لیا گیا۔
شہر کے میئر جناب جو اینڈرسن نے جائے وقوعہ کا دورہ کیا اور شہریوں کی حوصلہ افزائی کی۔ انہوں نے کہا کہ لیور پول کے لوگ انسانی ہمدردی کے معاملے میں کبھی پیچھے نہیں رہتے اور اس کی مثال اس واقعے سے ملتی ہے جس سے متاثر ہونے والے فرد کو شہر کے لوگوں نے ہر مدد فراہم کی۔ انہوں نے تمام شہریوں کا شکریہ ادا کیا جنہوں نے بے غرض امداد کے لیے خود کو پیش کیا۔
