جنرل ٹائر اینڈ ربڑ کمپنی نے فیصل آباد میں مبینہ طور پر اپنے نئے پلانٹ کے حوالے سے وضاحت جاری کی ہے۔
ایسا لگتا ہے کہ چند صحافیوں کو پاکستان میں ٹائر بنانے والے معروف ادارے کے بارے میں اپنی سوجھ بوجھ کو بہتر بنانے کی ضرورت ہے۔ پاک ویلز کو باخبر ذرائع سے پتہ چلا ہے کہ مذکورہ ٹائر کمپنی فیصل آباد میں نیا پلانٹ کھولنے کا کوئی ارادہ نہیں رکھتا۔
ہوا دراصل یہ کہ جنرل ٹائر اینڈ ربڑ کمپنی نے ایک پریس کانفرنس کا اہتمام کیا تھا جس کے دوران چند صحافیوں نے ادارے کے توسیعی منصوبوں کے بارے میں سوالات اٹھائے۔ کمپنی کے نمائندے نے جواب دیا کہ توسیع کے لیے کم از کم 200 سے 300 ملین ڈالرز کی ضرورت ہوگی۔ مزید یہ کہ جنرل ٹائر اینڈ ربڑ کمپنی کو پبلک لمیٹڈ کمپنی کی حیثیت سے توسیع سے قبل اپنے بورڈ آف ڈائریکٹر کی منظوری درکار ہوگی۔ مختصراً یہ کہ جنرل ٹائر اینڈ ربڑ کمپنی نے کسی بھی توسیعی منصوبے کے امکان کو رد کردیا۔
لیکن دوسری جانب صحافیوں نے اپنی طرف سے کہانی گڑھ لی کہ جنرل ٹائر اینڈ کمپنی فیصل آباد میں نئے پلانٹ کی تعمیر کا منصوبہ رکھتا ہے۔ ان کے مطابق تو کمپنی نے پاکستان اسٹاک ایکسچینج (PSX) کو یہ بتا بھی دیا ہے۔ باخبر ذرائع نے پاک ویلز کو بتایا ہے کہ درحقیقت جنرل ٹائر اینڈ ربڑ کمپنی نے PSX کو ایسی کوئی اطلاع نہیں دی۔
