گاڑیوں کے شعبے میں پچھلے چند ہفتوں میں کافی خبروں نے جنم لیا جن میں ایک طرف ہونڈا سِوک 2016 کی پیشکش شامل تھی وہیں ووکس ویگن کے ڈیزل گیٹ اسکینڈل میں ملوث ہو نے کی بری خبر بھی شامل تھی۔ اس کے علاوہ ٹیسلا ماڈل ایکس کے اجراء کی خبروں نے بھی ایک ماحول بنائے رکھا۔ رواں ماہ شروع ہونے والے 44 ویں ٹوکیو موٹر شو کے باعث مزید دلچسپ خبریں موصول ہورہی ہیں جن میں تصوراتی و خیالی گاڑیوں سے متعلق بھی خبریں شامل ہیں۔
تازہ ترین خبر ہونڈا کی جانب سے موصول ہوئی ہے کہ وہ ٹوکیو موٹر شو میں ایک ہائیڈروجن سے چلنے والی گاڑی کا ایک نیا تصور پیش کر رہا ہے جسے FCV کا نام دیا گیا ہے۔ ہونڈا کی جانب سے جاری کی گئی تفصیلات کو دیکھتے ہوئے لگتا ہے کہ یہ گاڑی ٹیسلا ماڈل ایس اور ٹوکیو میرائی کے مقابلے میں پیش کی جائے گی۔
ہونڈا کا کہنا ہے کہ FCV تصوراتی گاڑی کا ہائیڈروجن ٹینک اپنے حجم کے اعتبار سے 33 فیصد چھوٹا ہوگا۔ اس سے گاڑی کے اندرونی حصے کو بہتر اور مزید گنجائش والا بنانے میں مدد ملے گی۔ اس کے علاوہ ہونڈا کا یہ بھی کہنا ہے اس گاڑی کی حد 435 میل ہوگی جو ٹویوٹا کی جانب سے پیش کی جانے والی اسی طرز کی گاڑی کے مقابلے میں 165میل زیادہ ہے۔
یہ گاڑی ان لوگوں کے لیے بہترین ہے جو ماحول دوست اشیاء ے استعمال کو ترجیح دیتے ہیں اور برقی گاڑیوں میں سست چارجنگ سے ناخوش ہیں۔ ایک اطلاع کے مطابق یہ گاڑی پہلے کیلی فورنیا میں پیش کی جائے گی تاہم عوام کے لیے اسے ٹوکیو موٹر شو 2015 میں رکھا جائے گا۔ یاد رہے کہ ہائیڈروجن بھرنے کے اسٹیشنز سب سے زیادہ ٹوکیو میں موجود ہیں۔
