آٹو پالیسی 2016-2021ء کے تحت کِیا لکی موٹرز ان چند اداروں میں سے ایک تھا جو پاکستان کے آٹوموٹِو سیکٹر میں داخل ہوا۔ کمپنی نے جون 2017ء میں گرین فیلڈ اسٹیٹس حاصل کیا جو اسے ابتدائی پیداوار میں سہولت کے لیے ٹیکس میں چھوٹ اور دیگر سہولیات کا حقدار بناتا ہے۔ کِیا لکی موٹرز کے تحت کل سرمایہ کاری 190 ملین ڈالرز کی ہوگی۔
کِیا لکی موٹرز کا اگست سے اپنی مقامی پیداوار شروع کرنے کا امکان ہے؛ البتہ یہ سمجھا جا رہا ہے کہ حال ہی میں نافذ کی گئی 10 فیصد فیڈرل ایکسائز ڈیوٹی (FED) فروخت میں اچھے نتائج حاصل کرنے میں بڑی رکاوٹ ہوگی۔ 10 فیصد ڈیوٹی 1700cc اور اس سے زیادہ کی گاڑیوں پر لگائی گئی تھی جس میں ہونڈا سوِک، ٹویوٹا آلٹس گرینڈ اور ٹویوٹا فورچیونر جیسی گاڑیاں شامل ہیں۔ کِیا لکی موٹرز کے نمائندوں نے وزیر اعظم کے مشیر تجارت، صنعت و ٹیکسٹائلز عبد الرزاق داؤد سے ممکنہ مسائل اور پیداواری منصوبوں کے حوالے سے گفتگو کے لیے ملاقات بھی کی۔
کمپنی کے مطابق مقامی سطح پر بنائی جانے والی اسپورٹیج کی بکنگ جون میں شروع ہوگی اور مقامی سطح پر تیار کی گئی پکانٹو کی بکنگ کا آغاز اگست میں ہوگا۔ اسپورٹیج کی ڈلیوری اگست میں جبکہ پکانٹو کی اکتوبر میں متوقع ہے۔ کِیا لکی موٹرز ڈلیوری شیڈولز پر پورا اترنے کے لیے اسپورٹیج اور پکانٹو کی پیداوار شروع کرے گا۔
کِیا اسپورٹیج 2000cc پٹرول انجن کے ساتھ دستیاب ہوگی؛ اسی لیے 10 فیصد FED سے اس کی فروخت متاثر ہونے کا خدشہ ہے۔ کِیا پکانٹو 1200cc پٹرول انجن کی حامل ہوگی اور اس کی فروخت FED سے متاثر نہیں ہوگی۔ کِیا لکی موٹرز اور ہیونڈائی نشاط دونوں نے وفاقی حکومت سے مقامی سطح پر بننے والی گاڑیوں پر 10 فیصد FED ہٹانے کا مطالبہ کیا ہے۔ انجینئرنگ ڈیولپمنٹ بورڈ بھی ان نئے اداروں کی حمایت میں میدان میں آتر چکا ہے کیونکہ یہ ان کی ملک میں بقاء کے لیے ضروری ہے۔
کِیا لکی موٹرز نے آٹو پالیسی 2016-2021ء کے تحت ایک اور مسئلے کی نشاندہی کی ہے کہ جہاں ایک موجودہ OEM (اوریجنل ایکوئپمنٹ مینوفیکچرر) اپنی نئی سرمایہ کاری کی وجہ سے گرین فیلڈ اسٹیٹس کا خواہشمند ہے۔ وہ کہتا ہے کہ گرین فیلڈ اور براؤن فیلڈ رعایتیں نئے اداروں کے لیے مخصوص ہیں اور موجودہ اداروں کو نہیں دینی چاہئیں۔ وہ اس پر بھی زور دیتا ہے کہ پاکستان میں داخل ہونے کا فیصلہ آٹو پالیسی 2016-2021ء کے فوائد کی بنیاد پر تھا۔
آٹوموٹِو سیکٹر میں نئے اداروں اور پاکستان میں ان کے آپریشنز پر 10 فیصد FED کے اثرات کے بارے میں اپنی رائے نیچے تبصروں میں دیجیے۔
