وزارت صنعت و پیداوار نے ماسٹرز موٹرز کو کیٹیگری-اے گرین فیلڈ درجہ دے چکی ہے، جو ظاہر کرتا ہے کہ پاکستان کی مقامی آٹو انڈسٹری میں نئے آٹومیکرز کے لیے کافی گنجائش ہے۔ ماسٹر موٹرز گاڑیاں بنانے والے چینی ادارے چونگ چنگ چنگن آٹو موبائل لمیٹڈ کے ساتھ پاکستان میں کاریں بنانے کے معاہدے پر پہلے ہی دستخط کر چکا ہے۔ مزید یہ کہ چند روز قبل ماسٹر موٹرز نے اپنے اسمبلی پلانٹ کا سنگ بنیاد رکھا ہے کہ جہاں ادارہ چنگن گاڑیاں اسمبل کرکے پاکستان میں فروخت کرے گا۔
چنگن آٹو موبائل چین میں اعلیٰ درجے کی SUVs اور سیڈانز بنانے کے لیے معروف ہے۔ اور اب جبکہ ادارہ پاکستان آ رہا ہے، مقامی صنعت میں یقینی طور پر تبدیلی آئے گی۔ بتایا گیا ہے کہ ماسٹر موٹرز ابتدائی مرحلے میں ملک میں 7 نشستوں والی CX70 نامی SUV اور ایک سیڈان متعارف کروائے گا۔
واضح رہے کہ فوٹون JW کو گرین فیلڈ اسٹیٹس دیے جانے پر چند روز قبل ماسٹر موٹرز اور JW SEZ کی ملکیت فوٹو JW آٹو پارک کے درمیان سخت الفاظ کا تبادلہ ہوا تھا۔ ماسٹر موٹرز کے حکام نے ذرائع ابلاغ سے گفتگو کرتے ہوئے کہا تھا کہ یہ ایک غیر منصفانہ قدم ہے اور اس کے کاروبار کو بھی متاثر کرے گا۔ جبکہ دوسری جانب ماسٹر موٹرز کے بیان کا جواب دیتے ہوئے فوٹون JW کے عہدیدار نے زور دیا تھا کہ اس کا حقیقت سے دور دور تک کوئی تعلق نہیں اور انہوں نے سخت جانچ کے بعد ہی یہ درجہ حاصل کیا ہے۔
اب جبکہ ماسٹر موٹرز کو گرین فیلڈ اسٹیٹس مل چکا ہے، دیکھنا یہ ہے کہ فوٹون JW اس پر کیا ردعمل دکھاتا ہے۔
گرین فیلڈ درجہ پانے والے دیگر اداروں میں ریگل آٹو موبائل انڈسٹریز لمیٹڈ اور سازگار انجینیئرنگ ورکس وغیرہ شامل ہیں۔
اب تک حکومت پاکستان آٹو پالیسی 2016-21ء کے تحت آٹھ اداروں کو گرین فیلڈ اسٹیٹس سے نواز چکی ہے، جن میں سے تازہ ترین ماسٹر موٹرز ہے۔
