مٹسوبشی میراج 2013 کا تفصیلی جائزہ اور تصاویر

لکھاری Dr. Zeeshan Ashraf آخری اپڈیٹ Oct 6, 2015

گاڑی تبدیل کرنا بہرحال زندگی کا ایک اہم فیصلہ ہے اس لیے میں نے اس بارے میں کوئی قدم اٹھانے سے پہلے یہ سوچا کیا کہ میں زیادہ سے زیادہ کتنے پیسے خرچ کرسکتا ہوں۔ اُس وقت میرے پاس 2011 ویگن آر تھی جو تقریباً 2 سال تک میرے اور میرے خاندان کے زیر استعمال رہی۔ یہ اندازہ لگانے کے بعد کہ میں زیادہ سے زیادہ 11 لاکھ روپے کی گاڑی خرید سکتا ہوں، میں نے گاڑی کی تلاش شروع کی لیکن اس دوران چند باتوں کا خاص خیال رکھنے کا بھی فیصلہ کیا: الف) گاڑی بیرون ملک تیار کی گئی ہو۔ ب) اس کا ماڈل 2013 یا اس سے آگے کا ہونا چاہیے۔ ج) زیادہ سے زیادہ مسافت 20 ہزار کلومیٹر ہونی چاہیے۔ د) یہ 4 اے گریڈ یا زائد کی حامل ہونی چاہیے۔

ایک تفصیلی سروے کے بعد مجھے یہ گاڑیاں دستیاب تھیں:
• ٹویوٹا پاسو 2012
• سوزوکی ویگن آر 2013
• ڈایہاٹسو میرا ES 2013
• نسان ڈیز / مٹسوبشی ای کے کسٹم 2013
• مٹسوبشی میراج 2013
• سوزوکی آلٹو 2013/14
• ٹویوٹا آئی کیو 2012
• ڈایہاٹسو موو کسٹم 2012/13

ان میں سے اپنے لیے درست گاڑی کا انتخاب کرنا میرے لیے کافی مشکل تھا۔ لیکن حقیقت یہ ہے کہ 660 سی سی سے 1 ہزار سی سی کی طرف اپنے محدود بجٹ میں جو سب سے زیادہ مناسب لگی وہ ٹویوٹا پاسو اور مٹسوبشی میراج تھی۔ ان دونوں میں سے کسی ایک پر ہاتھ رکھنے کے لیے مجھے کافی سوچ بچار کرنا پڑی۔ اس لیے میں نے اور احتیاط سے ان دونوں کے بارے میں معلومات اکھٹی کیں تو میرا دل اور دماغ 1000 سی سی مٹسوبشی میراج 2013 کی طرف راغب ہوگیا۔

تعارف

ماضی میں مٹسوبشی موٹرز کو خاطر خواہ پذیرائی حاصل نہیں ہوسکی۔ ان کی مشہور زمانہ پجیرو اپنی جاذبیت کھو بیٹھی اور لوگوں نے لینڈ کروزر کی طرف دیکھنا شروع کردیا۔ لانسر اور گیلنٹ بھی 90 کی دہائی کے بعد کم کم نظر آنے لگی اور حال ہی میں اسپورٹس کار کے طور پر جانی مانی “ایوولوشن” کی تیاری بھی بغیر کسی اطلاع اور متبادل کے بند کر دی گئی۔ اب دیگر بڑے اداروں کی طرح مٹسوبشی بھی ایک بار پھر نئی پجیرو اسپورٹس، آؤٹ لینڈر اور دیگر ماڈلز کے ساتھ گاڑیوں کے شوقین افراد کو اپنی طرف متوجہ کرنے کی کوشش کر رہی ہے۔ 1000 سی سی کے زمرے میں مٹسوبشی 2012ء سے نئے ڈیزائن کی حامل میراج پیش کر رہی ہے۔ بین الاقوامی سطح پر اس گاڑی پر ملا جلا ردعمل نظر آیا جس کی بنیادی وجہ وہی ہے جو میں اکثر کہتا آیا ہوں کہ ہر ملک کا الگ حساب کتاب ہوتا ہے جس میں برآمدات کے قوانین اور دیگر بہت سے عوامل کار فرما ہوتے ہیں لہٰذا یہ بات ممکن ہے کہ جو چیز بیرون ملک اچھی چلے وہ آپ کے اپنے ملک میں بری طرح ناکام ہوجائے یا پھر اس کے بالکل برعکس صورتحال بھی ممکن ہے۔ یہی وجہ ہے کہ میں نے میراج کا انتخاب کیا جو کہ بہرحال 11 لاکھ روپے میں ملنے والی کئی گاڑیوں سے کہیں بہتر ہے۔

اب جبکہ میں مٹسوبشی میراج کا مالک ہوں اور اسے تقریباً ایک ہفتے تک لاہور کی سڑکوں پر چلا بھی چکا ہوں، اس لیے سمجھتا ہوں کہ اب مجھے اپنا ذاتی تجربہ آپ لوگوں بتانا چاہیے خاص کر وہ دوست اور احباب جو گاڑی تبدیل کرنے میں دلچسپی رکھتے ہیں۔

بیرونی ڈیزائن

میراج ایک مختصر (بغیر ڈگی والی) ہیچ بیک ہے اور اس کا بیرونی ڈیزائن سادہ مگر خوبصورت ہے۔ یہ بات ماننی پڑے گی کہ میراج ایسی نہیں جس پر پڑنے والی پہلی نظر میں ہی آپ اپنا دل ہار بیٹھیں لیکن مٹسوبشی نے اس گاڑی کو کسی غیر معمولی شکل دینے کی کوشش ہی نہیں کی جو بہرحال مناسب بات ہے۔ اگلا حصہ اسپورٹی بمپرز کے ساتھ کافی جچتا ہے، پچھلا حصہ بہت نفیس اور دائیں و بائیں سے صاف ستھرے انداز سے بنایا گیا ہے۔ مجموعی طور پر اس کا انداز بہت مناسب اور نظروں کو بھانے والا ہے۔

گاڑیوں کے شائقین کی نظر سے دیکھا جائے تو مٹسوبشی میراج سر تا پہ سادگی سے ڈھکی ہوئی ہے۔ اس کی اگلی لائٹس ہیلوجن رفلیکٹرز ہیں، بونٹ اور بمپر کے خطوط اسے اچھا اسپورٹی رنگ دیتے ہیں۔ دروازے اور ان کے شیشے بھی عمدہ ہیں۔ مختصراً یہ کہ اس کے انداز کو شاندار نہ بھی کہا جائے تو حسین ضرور کہا جاسکتا ہے۔
البتہ پچھلی جانب موجود لائٹس کے انداز میں بہتری کی گنجائش موجود ہے۔ اس قیمت میں اگر ایل ای ڈی لائٹس ممکن نہ بھی ہوں تو ڈیزائن بہتر بنایا جاسکتا ہے جس سے مستقبل قریب میں پیش کی جانے والی گاڑیوں کی فہرست میں فخر سے کھڑی ہوسکے۔اس کے علاوہ مختلف دھاتوں سے تیار ہونے والے Alloy ویلز کا انتخاب بھی دستیاب ہوتا تو اور بھی اچھا ہوسکتا تھا۔

اندرونی ڈیزائن

اگر سچ کہوں تو میں ایک کم قیمت مٹسوبشی میراج میں اتنے اچھے اندرونی ڈیزائن کی توقع نہیں کر رہا تھا بلکہ میری سوچ تو یہ تھی کہاس میں اعلی معیار کے پلاسٹک کے استعمال پر اکتفا کیا گیا ہوگا۔ لیکن میری توقعات کے برعکس میراج کا اندرونی حصہ بہت پرسکون ہے۔ تمام چیزوں کو بہت اچھے معیار اور انداز سے بنایا گیا ہے۔

چمڑے کا اسٹیئرنگ، ایئر کنڈیشن (M اور G) اور بٹن سے گاڑی کو اسٹارٹ (G) کرنے کی سہولیات شامل ہیں۔ گیئر بھی ہموار اور آسان ہے۔جاپانی گاڑیوں کی طرح اس کی نشستوں کی بناوٹ بھی مناسب ہے۔ بیٹھنے کی جگہ بھی کافی ہے اور بیک وقت 5 افراد بہت آرام سے بیٹھ کر طویل سفر پر جا سکتے ہیں۔ پچھلی نشستوں کو آگے بیچے کرنے کی بھی سہولت موجود ہے تاکہ گاڑی کے پچھلے حصے میں حسب ضرورت سامان رکھنے کی جگہ بنائی جا سکے۔

ہوسکتا ہے بعض افراد کے لیے اس کا انداز اور معیار امیدوں سے کم ہو لیکن اس ضمن میں گاڑی کی مالیت دیکھتے ہوئے موجودہ معیار پر سمجھوتا کرنا زیادہ برا سودا نہیں۔

انجن

مٹسوبشی میراج 1 ہزار سی سی MIVEC تین سلینڈر انجن کی حامل ہے۔ اس میں CVT بھی شامل ہے۔یہ ایندھن کے معاملے میں بھی انتہائی باکفایت ہے اور شاید کوئی دوسری گاڑی آپ کو 18-20 کلومیٹر فی لیٹر فراہم نہیں کرسکے گی۔یہ اعداد و شمار ازخود مٹسوبشی میراج کو دیگر ہم پلہ گاڑیوں میں ممتاز کرتے ہیں خاص طور پر ان لوگوں کے لیے جو ہر ہر میل پر گاڑی کی کارکردگی جانچتے ہیں اور بہتر سے بہتر کارکردگی والی گاڑی کو ترجیح دیتے ہیں۔

سفر

کسی بھی گاڑی کے لیے سب سے اہم عنصر اسے چلانے اور سفر کا تجربہ ہوتا ہے۔ آپ کا سفر بہت اچھا بھی ہوسکتا ہے لیکن اگر کسی گاڑی کو چلاتے ہوئے آپ کو مزہ نہیں آتا تو وہ آپ کا نہیں بلکہ گاڑی کا نفی پہلو ہے۔ خوش قسمتی سے مٹسوبشی میراج نے مجھے اس حوالے سے مجھے بالکل مایوس نہیں کیا۔ ہاں، اسے چلانے کا تجربہ ایسا نہیں رہا جیسا کہ میں جنت کی سیر کر رہا ہوں لیکن یہ پہلے ہی گیئر میں جس ہموار انداز سے چلنا شروع ہوتی ہے وہ بہت پرسکون ہے۔ CVT کی مدد سے مجموعی تجربہ بہت آرامدے رہا ہے جسے مجموعی طور پر مسرت بخش کہا جائے تو غلط نہ ہوگا۔ میرے خیال سے 1 ہزار سی سی کی گاڑی کے لیے یہ بات بہت زیادہ معنی رکھتی ہے۔ گاڑی میں شور بہت زیادہ نہیں ہے تو بہت کم بھی نہیں ہے اس لیے اسے مناسب خیال کریں۔ اسٹیئرنگ گھمانے میں آسان ہے۔ گاڑی کے دائیں و بائیں کا منظر دکھانے والے شیشے بھی مختصر ہیں۔ اینٹی – لاک بریک بھی اپنا کام بخوبی کرتے ہیں اورمناسب رفتار میں گاڑی کو اپنے کنٹرول میں رہنے کا احساس فراہم کرتے ہیں۔ مجھے مٹسوبشی کے auto stop اور go function کا تجربہ کرنے کا موقع نہیں مل سکا کیوں کہ میری گاڑی میں یہ سہولیت میسر نہیں ہیں۔

لاہور کے موسم میں ایئر کنڈیشن کا نظام بخوبی کام کرتا ہے۔ گاڑی موڑتے وقت 4.4 میٹر کا دائرہ بناتی ہے جو شہری ٹریفک کی صورتحال میں بہت اچھا ہے۔ سسپنشن بھی اونچی نیچی سڑکوں پر بہت اچھا کام کر رہا ہے۔ ہمارے شہر کی سڑکوں کی صورتحال دیکھتے ہوئے یہ چیز بھی بہت معنی رکھتی ہے کہ آیا وزن کے ساتھ گاڑی زیادہ نیچے تو نہیں ہوجاتی جس سے اسپیڈ برکرز اور اونچے نیچے راستوں پر مشکلات ہوں۔ مٹسوبشی میراج اس حوالے سے بھی بہت اچھی ہے۔ میں نے 4 جوان افراد کے ساتھ اس میں سفر کیا اور اس قسم کا کوئی بھی مسئلہ درپیش نہ ہوا۔

گاڑی کی رفتار 90-100 کلومیٹر فی گھنٹہ ہو تو چھوٹے انجن والی گاڑیوں پر گرفت رکھنا قدرے مشکل ہوجاتا ہے۔ خاص کر جب آپ کو اس رفتار میں کوئی موڑ کاٹنا پڑے تو یہ مرحلہ اور بھی کٹھن ہے۔ اس لیے بہتر ہے کہ مٹسوبشی میراج کی 100 کلومیٹر فی گھنٹہ رفتار سے زائد پر کسی قسم کے کرتب دکھانے سے پرہیز کیا جائے۔ اس گاڑی کے انجن کی آواز بھی کچھ بھدی سی ہوجاتی ہے اور پیڈل پر بھی زور دینا پڑتا ہے۔ یہ دونوں باتیں میں نے وٹز میں بھی محسوس کیں۔

میلان کے اعداد و شمار

میری مٹسوبشی میراج لاہور میں بمع ائیر کینڈیشن 16-19 کلومیٹر فی لیٹر چلی البتہ اس کا زیادہ انحصار اس بات پر ہے کہ گاڑی کو کس طرح چلایا گیا۔ مجھے یقین ہے کہ اس کے دیگر نسخے (M اور G) اس معاملے میں کچھ بہتر اعداد و شمار فراہم کریں گے۔ مجھے بذات خود تو موٹروے پر کوئی لمبا سفر کرنے کا اتفاق نہیں ہوا لیکن میراج رکھنے والے دیگر لوگوں کی رائے اس بارے میں کافی مثبت رہی ہے۔

دیگر نمایاں سہولیات کی فہرست
• بٹن سے گاڑی اسٹارٹ کرنے کی سہولت (G)
• ایئر کنڈیشن (M اور G)
• گاڑی کو مستحکم رکھنے کا نظام
• رازداری کے لیے UV شیشے
• قابل ترتیب لائٹس
• چار ہوائی بیگز
• اینٹی – لاک بریکس
• قابل ترتیب پچھلی نشستیں
• بغیر چابی گاڑی کے دروازے کھولنے کی سہولت

حتمی فیصلہ

مٹسوبشی میراج میری نظر میں تو ایک فاتح ہے۔ اس کی کارکردگی اور مناسب قیمت ہر اس شخص کے لیے بہترین ہے جو اپنے اور اپنے خاندان کے لیے پرسکون گاڑی کا انتخاب کرنا چاہتا ہے۔ میرے بجٹ میں دستیاب گاڑیوں میں میراج بہت بہترین ہے۔ کم از کم یہ آپ کو وٹز جیسی سہولیات فراہم کرسکتی ہے اور وہ بھی اتنی کم قیمت میں۔ اس کے پرزے مارکیٹ میں دستیاب نہ ہونے پر بھی کچھ لوگ شکوک و شبہات رکھ سکتے ہیں لیکن موجودہ دور میں کہ جب جاپانی کی مقامی مارکیٹ میں دستیاب گاڑیاں بہت تیزی سے یہاں برآمد کی جا رہی ہیں، یہ کوئی اتنا بڑا مسئلہ نہیں ہونا چاہیے۔