جاپان سے درآمد کی جانے والی گاڑیوں کی آکشن شیٹ میں رد و بدل کے بڑھتے ہوئے واقعات کے باعث صارفین اس کی تصدیق سے متعلق کافی پریشان نظر آتے ہیں۔ گاڑیوں کے کاروبار سے منسلک چند بدنیت افراد گاڑیوں کو مہنگے داموں فروخت کرنے کے لیے آکشن شیٹ کی نقل حاصل کر کے ان میں من مانی تبدیلیاں کردیتے ہیں۔ ایسے میں ایک عام آدمی کے لیے ضروری ہے کہ وہ پسند کی گئی گاڑی کی آکشن شیٹ کے درست ہونے کی تصدیق بھی کرلے۔ گاڑیوں کی درآمد سے متعلق اپنے پچھلے مضامین میں تفصیل سے ذکر کرچکا ہوں کہ آکشن شیٹ کیا ہوتی ہے اور اس میں درج معلومات کو کیسے سمجھا جاسکتا ہے۔ اب آکشن شیٹ کی تصدیق کے طریقہ کار سے متعلق بات کرتے ہیں۔
سب سے پہلے آپ کے لیے یہ جاننا ضروری ہے کہ آکشن شیٹس کی تصدیق کیسے ممکن ہے۔ نیلامی گھر (آکشن ہاؤس) میں جب کوئی گاڑی فروخت کے لیے پیش کی جاتی ہے تو اس کی تمام معلومات بشمول خالق ادارے کا نام، ماڈل، چیسز نمبر وغیرہ جاپانی سروسز پر محفوظ کرلی جاتی ہیں۔ آکشن شیٹ کی تصدیق کے لیے آپ کو ان سرورز تک رسائی درکار ہے جس کے لیے چند ایک ویب سائٹس آپ کی مدد گار ثابت ہوسکتی ہیں۔ ویب سائٹ پر آپ گاڑی کے چیسز نمبر اور لاٹ نمبر درج کر کے دیگر معلومات دیکھ سکتے ہیں۔
اپنی پسندیدہ گاڑی پاکستان منگوانے کے لیے یہاں کلک کریں
مثال کے طور پر ایک روسی ویب سائٹ (http://arsenal.aleado.ru) پر آپ درکار معلومات فراہم کر کے آکشن شیٹ کی تصدیق کرسکتے ہیں۔ جب آپ مذکورہ ویب سائٹ کھولیں گے تو آپ کو کچھ ایسا صفحہ نظر آئے گا:
یہ صفحہ اس وقت روسی زبان میں دکھایا جا رہا ہے۔ سب سے اوپر موجود نیلی پٹی کے دائیں جانب Eng پر کلک کر کے آپ صفحے کو انگریزی میں دیکھ سکتے ہیں۔ اس صفحے پر پوچھے گئے نام کی جگہ ‘ arsenal’ لکھیں اور پاسورڈ میں ‘ motors’ لکھ کر سائن اِن پر کلک کریں۔ اب آپ کو کچھ ایسا صفحہ نظر آئے گا:
یہاں سب سے اوپر موجود پٹی میں Japanese Auto Auctions Sold Prices منتخب کریں۔ جس کے بعد ظاہر ہونے والے صفحے پر آپ سے دیگر تفصیلات پوچھی جائیں گی۔
مثال کے طور پر میں نے ڈائی ہاٹسو کو maker اور ڈائی ہاٹسو میرا ES کو model کے طور پر منتخب کیا۔ results کے سامنے ‘All lots’ منتخب کریں اور ذیل میں موجود اسکرین شاٹ کی طرح تمام چیک باکسز پر چیک لگادیں۔ اس کے بعد گاڑی کا چیسز نمبر لکھیں اور bid نمبر (لاٹ نمبر) درج کریں۔ اگر آپ کو گاڑی کی تاریخِ نیلامی کا علم نہیں تو جنوری تا دسمبر کا دورانیہ منتخب کرلیں۔ اس کے بعد Search پر کلک کریں۔
چونکہ یہ ویب سائٹ زیادہ اپڈیٹس نہیں کی جاتیں اس لیے ممکن ہے کہ آپ کو کوئی بھی گاڑی نظر نہ آئےاور آپ کو کچھ ایسا صفحہ نظر آئے:
اس صورت میں آپ ایک بار پھر تلاش کرنے کی کوشش کیجیے اور اگر ممکن ہو تو ویب سائٹ کو فراہم کی گئی معلومات میں کمی بیشی کر کے بھی دیکھیں۔ مثال کے طور پر میں نے لاٹ نمبر درج کر کے چیسز نمبر ہٹا دیے اور دوبارہ سرچ کروایا۔ اب مجھے دو ڈائی ہاٹسو میرا گاڑیاں دکھائی گئی ہیں جو ایک ہی لاٹ میں شامل تھیں۔
میں نے پہلی والی گاڑی کو منتخب کر کے اس پر کلک کیا۔
گاڑی کی تصاویر کے ساتھ آکشن شیٹ کی بھی نقل میرے سامنے ظاہر ہوگئی۔ یہ وہ اصلی آکشن شیٹ ہے کہ جو نیلامی گھر میں گاڑی شامل ہوتے ہی بنائی گئی تھی۔ اگر آپ کے پاس موجود آکشن شیٹ بھی بالکل یہی ہے تو سمجھیے تصدیق مکمل ہوئی۔
یہ طریقہ کار کافی آسان اور سادہ ہے۔ یاد رہے کہ جاپانی گاڑی خریدتے ہوئے ہمیشہ آکشن شیٹ ضرور طلب کریں اور اس کی تصدیق بھی کریں کہ آیا آپ کو دی گئی گاڑی یا اس کی آکشن شیٹ میں کوئی گڑ بڑ تو نہیں کی گئی۔ گاڑیوں کی درآمدات کے حوالے سے مضامین کا سلسلہ آگے بھی جاری رہے گا۔ اگر آپ کسی خاص موضوع پر معلومات حاصل کرنا چاہیں تو تبصرے ضرور آگاہ کریں۔
