ہر طالب علم اور مڈل کلاس گھرانے کا خواب، اپنی مثال آپ، سوزوکی مہران بالآخر پاکستان میں اپنا 30 سال پرانا ورثہ چھوڑے جا رہی ہے۔ ایک باضابطہ اعلان میں پاک سوزوکی نے بالآخر اپنی مشہورِ زمانہ ہیچ بیک کے خاتمے کا اعلان کردیا کہ جسے مقامی آٹو انڈسٹری میں باس (Boss) کے نام سے جانا جاتا تھا۔
سوشل میڈیا پر گردش کرتے سرکلر کے مطابق کمپنی کا کہنا ہے کہ:
“سوزوکی مہران کی پیداوار ترک کرنے کو مدنظر رکھتے ہوئے پاک سوزوکی فوری طور پر یعنی یکم اپریل 2019ء سے سوزوکی مہران (تمام ویریئنٹس) کی بکنگ بند کرنے کا پابند ہے۔”
مکمل سرکلر ذیل میں دیکھیں:
بلاشبہ مہران کا خاتمہ مقامی آٹو انڈسٹری میں ایک بڑی تبدیلی لائے گا کیونکہ صارفین کو ایک ناکارہ اور قدیم گاڑی خریدنے کے بجائے کچھ نیا ملے گا۔ تمام تر تنقید کے باوجود ایک نقطے کو سراہنے کی ضرورت ہے کہ یہ گاڑی زبردست تھی، لوگ اس میں بغیر کسی مسئلے کے شمالی پاکستان تک گئے۔ یہ گاڑی لچکدار تھی لیکن آج کے دورے کے لیے نہیں تھی کہ جس میں کمپنیاں اپنی گاڑیوں کے بنیادی ترین ویریئنٹس میں بھی کئی فیچرز پیش کر رہی ہیں۔
البتہ مہران کو الوداع کہنا مشکل ہوگا۔ لوگوں کی اس گاڑی سے جذباتی وابستگی تھی کیونکہ یہ تین دہائیوں تک مقامی مارکیٹ میں پیش کی جاتی رہی۔ مہران کے چاہنے والوں کے لیے اچھی خبر یہ ہے کہ کمپنی طلب پوری کرنے کے لیے آئندہ مہینوں میں آلٹو 660cc پیش کر رہی ہے۔ البتہ یہ دیکھنا ابھی باقی ہے کہ نئی آلٹو 660cc کن فیچرز کے ساتھ پیش ہوگی۔
ہماری طرف سے اتنا ہی۔ اگر آپ مہران کے چاہنے والے ہیں تو ہم آپ کے تبصروں میں بہت دلچسپی رکھتے ہیں۔
