پاکستان میں ہونڈا سِوک کے نئے عہد کی شروعات

لکھاری Adan Ali آخری اپڈیٹ Jul 25, 2016

اب سے دس ماہ قبل دنیا بھر کو اپنے سحر میں مبتلا کردینی والی نئی ہونڈا سِوک بالآخر پاکستان میں بھی اپنا جلوہ دکھا چکی ہے۔ نہ صرف یہ کہ ہونڈا ایٹلس نے دسویں جنریشن ہونڈا سوک کو شاندار انداز میں پیش کرنے کے لیے خصوصی تقریب کا اہتمام کیا بلکہ زندہ دلان لاہور کو درجنوں سِوک کے قافلے کو دیکھنے کا موقع بھی فراہم کیا۔ سرخ، سفید اور نیلے رنگوں میں چمکتی دمکتی سِوک جس شاہراہ سے گزری، لوگوں کو اپنی جانب متوجہ کرلیا۔ اگر آپ ان دلچسپ مناظر سے محظوظ نہیں ہوسکے تو پھر 20 نئی نویلی ہونڈا سوک 1.5 ٹربو کے قافلے کی ویڈیو ریکارڈنگ اور تصاویر ذیل میں ملاحظہ کریں:

باضابطہ رونمائی کے ساتھ ہی ہونڈا ایٹلس نے اپنی ویب سائٹ پر نئی سِوک 2016 کے بارے میں نئی معلومات بھی شامل کردی ہیں۔ ان میں سب سے قابل ذکر معلومات ہونڈا سِوک کا تیسرا ماڈل سے متعلق ہے کہ جسے اب تک منظر عام پر نہیں لایا گیا تھا۔ تاہم اس ماڈل کو ہونڈا ایٹلس کے کارخانے میں دیکھا گیا اور پاک ویلز نے اپنے قارئین تک اس کی متوقع آمد کی خبر بھی پہنچائی۔ 1.8 اوریئل اور 1.5 ٹربو کے مقابلے میں اس تیسرے ماڈل کی قیمت اور خصوصیات دونوں ہی کم ہیں۔ اس کے علاوہ ہونڈا ایٹلس نے 1.8 اوریئل اور 1.5 ٹربو کی تعارفی قیمت میں بھی اضافہ کردیا ہے۔ اب سِوک 1.5 ٹربو کی قیمت 29,99,000 روپے، سِوک 1.8 اوریئل کی قیمت 24,99,000 جبکہ تیسرے ماڈل کی قیمت 23,49,000مقرر کیے جانے کا اعلان کیا گیا ہے۔ جہاں تک ان گاڑیوں کی دستیابی کا سوال ہے توسِوک 1.8 بُکنگ کے ڈھائی ماہ بعد جبکہ 1.5 ٹربو تقریباً چار ماہ بعد صارفین کو فراہم کرنے کا کہا گیا ہے۔

نئی ہونڈا سِوک آسان اقساط پر حاصل کرنے کے لیے یہاں کلک کریں

ہونڈا پاکستان نے سِوک کی باضابطہ رونمائی لاہور کے مقامی ہوٹل میں انجام دی۔ ملک کے دیگر نمایاں شہروں میں بھی اس طرز کی چھوٹی بڑی تقاریب ہوئیں جنہیں ہونڈا شورومز نے مقامی افراد کی دلچسپی کو مدنظر رکھتے ہوئے اہتمام کیا۔

پاک ویلز کی جانب سے حاصل کردہ نئی ہونڈا سِوک (Honda Civic 2016) کی خصوصی ویڈیو اور تصاویر پیش خدمت ہیں: