عوام کی سہولت اور آسان رسائی کے لیے پنجاب سیف سٹیز اتھارٹی (PSCA) نے ای-چالان ادائیگی کے لیےتین مزید بینکوں HBL، MCB اور UBL کو شامل کردیا ہے۔
ہر شخص کی جانب سے ٹریفک قوانین کو یقینی بنانے کے لیے پنجاب میں ای-چالان سسٹم بخوبی کام کر رہا ہے۔ کیونکہ سڑک پر موجود گاڑی پر کیمروں کی نظر ہیں اس لیے گاڑیاں چلانے والوں میں بھی قانون کی پاسداری کا احساس کہیں زیادہ ہو گیا ہے۔ دوسری جانب پنجاب سیف سٹیز اتھارٹی (PSCA) نے اپنے ای-چالان ادائیگی طریقوں کا جال مزید پھیلا دیا ہے۔ ابتدائی طور پر صرف نیشنل بینک آف پاکستان (NBP) کے کیش کاؤنٹرز ہی ای-چالان ادائیگی کے لیے استعمال ہوتے تھے۔ بعد ازاں اتھارٹی نے بینک آف پنجاب (BOP) کے ساتھ معاہدہ کیا جس نے شہریوں کے لیے مذکورہ بالا بینکوں کی قریبی شاخوں میں ای-چالان کی ادائیگی کرنا آسان بنایا۔ جرمانوں کی ادائیگی کو مزید آسان بنانے کےلیے PSCA نے HBL، MCB اور UBL کو بھی اپنے پینل میں شامل کیا ہے۔ واضح رہے کہ شہری ان بینکوں کی کسی بھی شاخ میں جاکر اپنا ای-چالان جمع کروا سکتے ہیں۔
پنجاب سیف سٹیز اتھارٹی کے ترجمان نے بتایا کہ مزید بینکوں کو شامل کرنے سے یہ عمل ہموار ہو جائے گا۔ ان بینکوں کی کسی بھی شاخ پر ای-چالان ادائیگی سہولت کے علاوہ شہریوں کو اینڈرائیڈ ایپلی کیشن اور ATM ٹرانسفر کے ذریعے متعلقہ جرمانہ ادا کرنے کی سہولت بھی ملے گی۔ ای-چالان کی نئی رسیدوں میں HBL، MCB اور UBL کو بھی فہرست میں شامل کرلیا گیا ہے۔ تمام گاڑیاں چلانے والے اپنے ای-چالان اکاؤنٹس کا اسٹیٹس ویب پورٹل echallan.psca.gop.pk پر اپنے CNIC اور گاڑی کے رجسٹریشن نمبر داخل کرکے معلوم کر سکتے ہیں۔
ای-چالان جرمانے کے اس نظام میں سب سے عام خلاف ورزی سرخ بتی جلنے کے باوجود موٹر سائیکل سواروں کی جانب سگنل توڑنا ہے۔ گو کہ لاہور جیسے شہروں کی سڑکیں بڑھتے ہوئے ٹریفک کی وجہ سے آپ کو زیادہ رفتار نہیں پکڑنے دیتیں لیکن حدِ رفتار کی خلاف ورزی بھی عام دیکھی گئی ہے۔یاد رہے کہ شہر کے اندر LTV کے لیے حدِ رفتار 60 کلومیٹر فی گھنٹہ اور HTV کے لیے 40 کلومیٹر فی گھنٹہ ہے سوائے کینال روڈ کے کہ جہاں ہلکا ٹریفک 70 کلومیٹر فی گھنٹے کی رفتار رکھ سکتا ہے۔ ای-چالان نے ماضی کے مقابلے میں عوام کو ٹریفک قوانین پر عمل کرنے پر زیادہ مجبور کیا ہے بصورتِ دیگر انہیں ہر خلاف ورزی پر جرمانہ ادا کرنا ہوگا۔
ہماری طرف سے اتنا ہی۔ اپنی تجاویز نیچے تبصروں میں دیجیے۔ آٹوموبائل انڈسٹری کی مزید خبروں کے لیے پاک ویلز پر آتے رہیے۔
