وزارت صنعت و پیداوار، انجینیئرنگ ڈیولپمنٹ بورڈ (EDB) اور بورڈ آف انوسٹمنٹ (BOI) نے ریگل آٹوموبائل انڈسٹریز لمیٹڈ (RAIL) کو پرنس کے برانڈ نام کے ساتھ مینوفیکچرنگ لائسنس جاری کردیا ہے۔ RAIL پہلا ادارہ ہے جسے نئی آٹو پالیسی (گرین فیلڈ) کے تحت مینوفیکچرنگ لائسنس جاری ہوا ہے۔ حکومت پاکستان کی جانب سے یہ منظوری آٹوموبائل صنعت کی بحالی کا راستہ ہموار کرتی ہے، اور ہزاروں ملازمتوں اور پاکستان کی اقتصادی خوشحالی و ترقی میں حصہ ڈال رہی ہے۔ اس حوالے سے ADC، PAMA اور PAAPAM کے اراکین کی جانب سے نئی آٹوپالیسی 2016-21ء کی تائید نے بہت مدد کی۔
ریگل آٹوموبائل انڈسٹریز لمیٹڈ لاہور انڈسٹریل ایریا میں ایک اسمبلی اور مینوفیکچرنگ یونٹ بنا چکی ہے۔ اس کے چیئرمین جناب سہیل عثمان کا کہنا ہے کہ کمپنی چینی ادارے DFSK کے ساتھ چھوٹی کمرشل گاڑیاں اور منی پسنجر وینز اسمبل کرنے کے لیے تکنیکی تعاون کا معاہدہ کرچکی ہے۔
RAIL آر پی گروپ سے تعلق رکھتا ہے جس نے پاکستان میں 2005ء میں کاروبار شروع کیا اور اب تک مناسب نرخ پر اور قابل بھروسہ 4اسٹروک موٹر سائیکلیں اور رکشے متعارف کروا چکا ہے۔
اب کمپنی اپریل 2018ء سے پاکستان میں ایل سی سی/وینز بنانے کا آغاز کرکے اگلا قدم اٹھانے کے لیے تیار ہے۔ روڈ پرنس موٹر سائیکلوں کا تیسرا سب سے زیادہ فروخت ہونے والا برانڈ ہے؛ ترقی، جدت اور اعتماد کا نیا نام اب ایل سی وی/وینز مینوفیکچرنگ میں ایک نئے افق میں داخل ہو رہا ہے۔
