جیسے جیسے فرینکفرٹ موٹر شو قریب آرہا ہے ویسے ویسے گاڑیوں کے شوقین افراد کا جوش بڑھتا جا رہا ہے۔ گاڑیوں کے سب سے بڑے عالمی میلے میں کئی کار ساز اداروں کی جانب سے نئی گاڑیاں متعارف کروائے جانے کی توقع ہے جس سے متعلق ہم آپ کو پاک ویلز پر آگاہ کرتے ہی رہے ہیں۔ یہ مضمون بھی اسی سلسلے کی کڑی ہے جس میں ہم آپ کو ہونڈا سِوک کے نئے آئیڈیے سے متعلق بتا رہے ہیں۔
سیاحت کے شوقین ، بالخصوص سائیکل پر کرنے والوں کے لیے ہونڈا کی جانب سے سِوک کا ایک نیا انداز پیش کیا گیا ہے جسے “ٹور ایکٹو لائف کانسیپٹ” کا نام دیا گیا ہے۔ یہ گاڑی ہونڈا سِوک ویگن کے یورپی معیارات کے مطابق ہے۔ ہونڈا نے اس گاڑی کے عقبی حصے میں ایک جال بنایا ہے جس میں دو بڑی سائیکلیں سما سکتی ہیں۔ عام طور پر سائیکل لگانے کے لیے گاڑی کی چھت پر جنگلا بنایا جاتا ہے لیکن ہونڈا نے اس کے لیے ایک نیا انداز متعارف کروایا ہے جو زیادہ بہتر اور محفوظ ہے۔
دلچسپ بات یہ ہے کہ ہونڈا نے عقبی حصے میں سیٹس بھی لگائی ہیں جنہیں باآسانی تہ کیا جاسکتا ہے۔ یعنی اگر سائیکل رکھنی ہو تو سیٹس کو فولڈ کر دیں اور اگر سائیکل نہ رکھنی ہو تو سیٹ کھول لیں جس سے زیادہ افراد گاڑی میں بیٹھ سکیں گے۔ اس کے علاوہ گاڑی میں سائیکل کی مرمت کا سامان، ٹائروں میں ہوا بھرنے کے لیے پمپ، پانی کا ٹینک اور دیگر چیزیں شامل ہیں جو دوران سفر آپ کے بہت کام آسکتی ہیں۔
گاڑی کے نیچے 18 انچ کے پہیے ہیں جبکہ چھت پر ایک خوبصورت ڈبہ لگایا گیا ہے اور بلاشبہ یہ دنوں چیزیں گاڑی کے چمکدار رنگ سے میل کھاتی ہیں۔
گاڑی کے اندرونی حصے کو نیلے اور سیاہ رنگ سے سجایا گیا ہے۔ اس گاڑی میں تقریباً 60 مربع فٹ جگہ ہے جو تقریباً رینج روور کے برابر ہے۔
