سازگار انجینیئرنگ ورکس کو وزارت صنعت و پیداوار پاکستان کی جانب سے کیٹیگری “A” گرین فیلڈ اسٹیٹس مل گیا۔
تفصیلات کے مطابق ادارے نے پاکستان اسٹاک ایکسچینج (PSX) کو بھیجے گئے ایک نوٹس میں کہا ہے کہ حکام نے اسے گرین فیلڈ اسٹیٹس دے کر ملک میں اسمبلی پلانٹ کی تعمیر کی منظوری اور اجازت دے دی ہے۔ سازگار نئی گاڑیاں بنانے کے لیے ایک چینی آٹوموٹو برانڈ کے ساتھ اشتراک کرے گا۔
PSX کو بھیجا گیا نوٹس حوالہ دیتا ہے کہ نئی گاڑیاں “BAIC” برانڈ نام سے اسمبل اور فروخت کی جائیں گی۔ مزید برآں، ذرائع ابلاغ سے گفتگو کرتے ہوئے ادارے سیکریٹری جناب ارشد محمود نے کہا کہ وہ کار کے شعبے میں مقامی مارکیٹ پر گرفت حاصل کرنا چاہتے ہیں کیونکہ اس شعبے میں طلب تیزی سے بڑھ رہی ہے اور رسد میں خلاء موجود ہے۔
یہاں یہ امر قابل ذکر ہے کہ ادارے کے حصص کی قیمت میں بھی 4.79 فیصد اضافہ ہوا ہے۔
سازگار نے ملک میں اسمبلی پلانٹ کی تعمیر کے لیے پچھلے سال چین کے آٹوموٹو برانڈ کے ساتھ مفاہمت کی یادداشت (MoU) پر دستخط کیے تھے۔ مزیدبرآں، رواں سال کے آغاز پر ادارے نے اپنے آٹو رکشہ کی پیداوار میں اضافے پر عمل بھی روک دیا تھا تاکہ وہ ملک میں اسمبلی پلانٹ کی تعمیر کا آغاز کر سکے۔ ساتھ ہی اس وقت یہ فیصلہ بھی کیا گیا تھا کہ سالانہ بنیادوں پر 24,000 گاڑیاں پیش کی جائیں گی اور پلانٹ جون 2019ء تک مکمل ہو جائے گا۔ سازگار انجینیئرنگ ورکس کا بورڈ آف ڈائریکٹرز پہلے ہی منصوبے کی ممکنہ لاگت کی منظوری دے چکا ہے جو 1.76 ارب روپے ہوگی۔
سازگار آٹو رکشہ بنانے والا معروف ادارہ ہے جس کی شہرت جاپان تک پہنچ چکی ہے۔ یہ گاڑیاں بنانے والی مقامی صنعت کے لیے بلاشبہ ایک بڑی خبر ہے کیونکہ نئے آٹومیکر کا داخلہ مارکیٹ کو یقینی طور پر متنوّع بنائے گا۔
سازگار کے علاوہ ہیونڈائی-نشاط اور ریگل آٹوموبائل کمپنی بھی 2016-21ء آٹو پالیسی کے تحت گرین فیلڈ اسٹیٹس حاصل کر چکی ہیں۔
اس بارے میں اپنی رائے نیچے تبصرے میں پیش کریں۔
