گرمیوں میں ڈرائیونگ خطرناک ہو سکتی ہے: اس موسمِ گرما میں محفوظ ڈرائیونگ کے لیے بہترین ٹپس

پاکستان میں موسمِ گرما عام گرمی سے لے کر انتہائی شدید گرم تک ہوتا ہے۔ یہ موسم سال کے بارہ میں سے نو مہینے رہتا ہے، جو محض انسانوں کی ہی نہیں بلکہ دیگر جانداروں کی زندگی بھی مشکل بناتا ہے۔ گرمی گاڑیوں کو بھی متاثر کرتی ہے اور اس لیے ضروری ہے کہ ذمہ دار ڈرائیورز ان مہینوں میں اپنی اور گاڑیوں کی حفاظت کے لیے احتیاطاً چند قدم اٹھائیں۔

اپنے قارئین کی حفاظت اور معلومات اور ان کی گاڑیوں کو بہتر حالت میں رکھنے کے لیے ہم نے گرمیوں کے لیے چند ٹپس کو مختصراً بیان کیا ہے تاکہ آپ اس سخت موسم کے دوران آگاہ رہیں۔

کھڑکیاں کھلی رکھیں

گرم موسم کے دوران اپنی گاڑی کو پارک کرتے ہوئے اس کی کھڑکی تھوڑی سی نیچے کرلیں تاکہ ہوا کا گزر رہے۔ اس سے کیبن کے اندر سے گرم ہوا کے اخراج میں مدد ملے گی، ساتھ ہی ان گیسوں کے نکلنے میں بھی کہ جو آپ کی صحت کے لیے خطرناک ہیں۔ کاروں میں استعمال ہونے والا synthetic fibers گرمیوں کے زیادہ درجہ حرارت میں لازماً نقصان پہنچانے والی گیسیں خارج کرتا ہے۔

گاڑی میں ایروسولز رکھنے سے اجتناب کریں

اپنی گاڑی میں پریشر اسپرے اور پرفیومز رکھنے سے اجتناب کریں۔ گرم درجہ حرارت سے ان کی بوتلوں میں دباؤ بنتا ہے، جس کا نتیجہ دھماکے کی صورت میں نکلتا ہے، جو گاڑی میں موجود افراد کو نقصان پہنچا سکتا ہے۔

گاڑی کا ریڈی ایٹر دھوئیں

یہ مشورہ دیا جا سکتا ہے کہ اپنی کار کے ریڈی ایٹر کو دھوئیں کیونکہ اس کا بہت زیادہ خدشہ ہے کہ اس میں زنگ جمع ہو رہا ہے اور یوں اس میں رکاوٹ پیدا ہو جاتی ہے۔ نتیجتاً گاڑی کو ٹھنڈا کرنے کی صلاحیت میں کمی آ جاتی ہے۔ پانی کی ٹھیک سرکولیشن اور گاڑی کے درجہ حرارت کو مناسب حد تک رکھنے کے لیے ریڈی ایٹر کی کارکردگی کو یقینی بنانا چاہیے اور گو کہ ایسا لگتا ہے کہ یہ تجویز زیادہ پرانی گاڑیوں کے لیے ہے لیکن درحقیقت نئی کاریں بھی کئی وجوہات کی بناء پر زنگ آلود ریڈی ایٹر کی حامل ہو سکتی ہیں۔

پانی کے بجائے کولینٹ کا استعمال

ریڈی ایٹر کے مؤثر استعمال کو یقینی بنانے کے لیے پانی کے بجائے کولینٹ کا استعمال کریں۔ اگر آپ کوئی پرانی گاڑی رکھتے ہیں تو آپ کو خاص طور پر یہ تجویز کیا جاتا ہے۔ کولینٹس کی دو اقسام ہیں – ایک جو premixed ہوتا ہے اور دوسرا concentrated۔ آپ کو premixed  استعمال کرنا چاہیے کیونکہ اس میں کشیدہ پانی کی بہترین شرح پہلے سے شامل ہوتی ہے۔

بہتر معیار کا ایندھن استعمال کریں

اگر آپ خراب معیار یا کم درجے کا ایندھن استعمال کر رہے ہیں تو یہ آپ کی گاڑی کو معمول سے زیادہ پریشان کرے گا۔ درجہ حرارت عام حالات میں بھی تیزی سے بڑھے گا ۔

تھرموسٹیٹ چیک کریں

اگر اچانک تبدیلیاں نظر آئیں تو تھرموسٹیٹ والو چیک کریں ۔ یہ بہت اہم ہے کیونکہ تھرموسٹیٹ ریڈی ایٹر میں گھومنے والے کولینٹ کی نگرانی کرتا ہے۔

AC گیس چیک کریں

ایئر کنڈیشنرز شاید ایک یا دو دہائی پہلے عیاشی سمجھے جاتے تھے، لیکن اب یہ بیشتر گاڑیوں کا بنیادی فیچر بن چکے ہیں۔ آپ اس کا استعمال اپنی گاڑی کے ہارن سے بھی زیادہ کر سکتے ہیں۔ اس لیے یقینی بنائیں کہ AC کی گیس مناسب سطح پر ہے، بصورتِ دیگر AC گاڑی کے کیبن کو مناسب ٹھنڈا نہیں کر پائے گا۔

گاڑی کو براہِ راست دھوپ سے بچائیں

گاڑی کا کور خریدیں تاکہ آپ کار کو براہِ راست دھوپ سے بچا سکیں جو نہ صرف رنگ کے لیے نقصان دہ ہے بلکہ کیبن کے درجہ حرارت میں بھی اضافہ کر دیتی ہے۔

گاڑی کو سائے میں پارک کریں

پارکنگ کے لیے سایہ تلاش کریں۔ گاڑی کو پارکنگ میں دستیاب جگہ کے بجائے کچھ وقت نکال کر اسے سایہ دار جگہ پر کھڑا کریں۔

سفر کی منصوبہ بندی پہلے سے کریں

رش کے اوقات اور ٹریفک جام سے بچنے کے لیے اپنے سفر کی منصوبہ بندی کریں۔ دن کے اوقات میں سفر کے وقت میں کمی لائیں تاکہ دھوپ سے بچا جا سکے۔

گاڑی کو دھونے کا درست وقت

گاڑی کو شام/رات میں دھوئیں، دن میں نہیں۔ اس کی وجہ یہ ہے کہ دھوپ میں گاڑی کو دھوتے ہیں تو یہ صاف کپڑے سے پونچھے جانے سے پہلے ہی خشک ہو جاتی ہے۔ اس کی وجہ سے رنگ میں پانی کے اثرات رہ جاتے ہیں۔

اوور ہیٹ ہونے کی صورت میں ایک احتیاطی تدبیر

ڈرائیونگ کے دوران ٹمپریچر گیج کو چیک کریں۔ اگر گاڑی اوور ہیٹ ہو تو ریڈی ایٹر کو نہ کھولیں۔ اگر ضرورت ہو تو تب کھولیں جب گاڑی بند نہ ہو بلکہ چلتی حالت میں ہو۔ کیپ کھولتے ہوئے گیلے تولیے کا استعمال کریں، یہ نکلنے والی بھاپ کو جذب کرلے گا اور آپ کے ہاتھ کو بچائے کا۔

ضروری ہو تو ٹائرز تبدیل کریں

اگر آپ کی گاڑی کے ٹائرز پرانے اور خستہ حال ہیں تو انہیں تبدیل کریں خاص طور پر لمبے سفر سے پہلے۔ یہ پھٹ سکتے ہیں خاص طور پر اگر سافٹ کمپاؤنڈ ٹائرز ہوں کیونکہ سافٹ کمپاؤنڈ ٹائرز ہارڈ کمپاؤنڈ ٹائروں کے مقابلے میں زیادہ تیزی سے خراب ہوتے ہیں۔ اس لیے اپنےٹائروں کو چیک کرنے کی احتیاطی تدبیر ضرور کریں خاص طور پر گرمیوں کے موسم میں۔

ٹائر پریشرکو مانیٹر کریں

ٹائر پریشر چیک کریں۔ یہ گرمیوں میں زیادہ نہیں ہونا چاہیے کیونکہ زیادہ درجہ حرارت سے ہوا پھیل سکتی ہے جو ٹائر پریشر میں اضافہ کرتی ہے۔ اسے کم رکھیں تاکہ ہوا کو پھیلنے کی جگہ ملے۔ کم پریشر بھی ٹھیک نہیں کیونکہ اس سے غیر ضروری سکڑاؤ کا عمل بڑھتا ہے اور نتیجتاً درجہ حرارت تیزی سے بڑھتا ہے۔

خلاصہ یہ کہ گرمیوں کے دوران AC لازمی ہے، لیکن گاڑی میں بیٹھتے ہی AC ان کرنے سے لازمی بچنا چاہیے۔ اگر آپ کی گاڑی میں AC نہیں تو یقینی بنائیں کہ کیبن میں ہوا کے گزر باآسانی ہو رہا ہے۔ براہِ راست دھوپ سے بچیں اور اپنے سفر کی منصوبہ بندی کریں۔