سوزوکی Gixxer SF ایک سوزوکی کی ایک فُلی فیئرڈ اسپورٹس بائیک ہے جس نے دنیا بھر سے، بالخصوص بھارت میں، بہت داد و تحسین حاصل کی۔ لیکن بھارت اور دیگر مارکیٹوں کے مقابلے میں یہاں پاکستان میں فیئرڈ موٹر سائیکلوں کی، یہاں تک کہ 150cc موٹر سائیکلوں کی بھی، مضبوط مارکیٹ نہیں ہے، وجہ؟ اُن کی قیمتیں۔ اس لیے 6,25,000 روپے کی بھاری قیمت پر Gixxer SF کے لانچ ہونے کے بعد کیا آپ اسے بینیلی TNT150 یا پھر TNT25 پر ہی ترجیح دیں گے؟ آئیے دیکھتے ہیں۔
ڈیزائن:
Gixxer SF سوزوکی کی پہلے سے کامیاب Gixxer سیریز نیکڈ بائیکس پر مبنی ہے۔ ان موٹر سائیکلوں کا نیکڈ ورژن بہت پرکشش اور اسپورٹی ہے لیکن SF پر فیئرنگ کا فائدہ ہے؟ کیا یہ اسٹائل میں واقعی کچھ اضافہ کرتا ہے؟ اضافی 4 کلو وزن کو ایک طرف رکھ دیں تو فیئرنگ واقعی کام کرتی ہے۔ اسی وِنڈ-ٹنل میں بنی کہ جہاں مشہورِ زمانہ ہایابوسا، GSX-R اور موٹوGP مشینیں بنائی گئیں، فیئرنگ چلانے والے کو ہوا سے زیادہ سے زیادہ تحفظ دینے، دھچکے اور کھنچاؤ کو کم کرنے اور یوں زبردست ایروڈائنامک کارگزاری پیش کرنے کے لیے ڈیزائن کی گئی ہے۔ تو نتیجہ ایک ایسی موٹر سائیکل کی صورت میں ہے جو ہوا کے خلاف کم مزاحمت کی حامل ہے اور تیز رفتاری پراستحکام کو بڑھانے کے لیے زیادہ ڈاؤن فورس رکھتی ہے۔ تو ہاں! SF پر فیئرنگ واقعی کام کرتی ہیں۔ اب فیئرنگ کے علاوہ ایگزاسٹ اور کیپ پر المونیم فنِش اور نیا سنگل پیس ہینڈل بار کلیمپ کے ساتھ SF اپنے نیکڈ ساتھیوں کی طرح چیسس سے فریم تک ویسی ہی ہے۔ یہ ایک مثبت چیز ہے کہ موٹر سائیکل پہلے ہی سے اچھی ہے اور اس زمرے میں موجود کسی بھی موٹر سائیکل سے آپ جو توقع رکھتے ہیں وہ تمام پیچ و خم رکھتی ہے۔ اہم بات یہ کہ موٹر سائیکل ویسی ہی رائیڈنگ اور بیٹھنے کا انداز رکھتی ہے جیسا کہ عام Gixxer میں ہوتا ہے اس لیے ہیوی بائیک کا انداز ہونے کے باوجود اس میں بیٹھنے کا انداز عام ہے اورلوگ اسے تھکے بغیر لمبے سفر پر بھی لے جا سکتے ہیں۔ 130 کلو خشک وزن کے باوجود یہ نئے رائیڈرز کے لیے کافی آسان ہے۔
انجن اور کارکردگی:
SF کا مکمل طور پر المونیم سے بنا 4-اسٹروک سنگل سلینڈر 154.9cc BS-IV انجن 15HP کی مناسب طاقت فراہم کرتا ہے جو بہت زیادہ تو نہیں لیکن کسی بھی 150cc موٹر سائیکل کے لیے کافی اچھی ہے۔یہ موٹر سائیکل کو 15.4 سیکنڈز میں 0 سے 100 کلومیٹر فی گھنٹہ تک پہنچنے میں مدد دیتی ہے۔ تو ہو سکتا ہےکہ آپ سمجھ رہے ہوں کہ SF دھیمی بھی ہے؟ لیکن نہیں، یہاں ایسا نہیں ہے۔ سوزوکی کی جانب سے کی گئی تبدیلیاں بہت کارآمد ہیں اور اضافی وزن کے باوجود موٹر سائیکل نہ صرف تیزی سے رفتار پکڑتی ہے بلکہ اس کی زیادہ سے زیادہ رفتار 122 کلومیٹر فی گھنٹہ تک بھی پہنچتی ہے اور عام Gixxer کے مقابلے میں اس موٹر سائیکل کی موڑ کاٹنے کی صلاحیت بھی حیرت انگیز ہے۔ ایک ننھے 150cc انجن سے ایسی کارکردگی سے آپ کو فکر لاحق ہوگی کہ انجن کے ساتھ گرم ہونے کے مسائل ہوں گے۔ تو اس مسئلے سے نمٹنے کے لیے سوزوکی نے کیا کیا؟ Gixxer سوزوکی کی پیٹنٹ یافتہ ٹیکنالوجی سے لیس ہے کہ جسے جیٹ کولنگ ٹیکنالوجی کا نام دیا گیا ہے، جو زیادہ رفتار پر پسٹن کے نچلے حصوں اور سلینڈر کے اندرونی والوز پر انجن آئل کی پھوار ڈالتی ہے تاکہ اسے ٹھنڈا کرنے میں مدد ملے۔ یہ ٹیکنالوجی بہت مؤثر ثابت ہوئی ہے اور آپ کو اس موٹر سائیکل میں گرمائش کے کسی مسئلے کا سامنا نہیں ہوگا یوں ایک مرتبہ پھر ان افراد کے لیے اس موٹر سائیکل کا ایک مثبت پہلو ہو جو اپنی موٹر سائیکل کو بہت دیر تک تیز چلانا چاہتے ہیں۔
خصوصیات اور ٹیکنالوجی:
عام طور پر اتنی قیمت دینے پر صارفین ABS، فیول انجکشن، لکوئیڈ کولنگ جیسی خصوصیات کے خواہشمند ہوتے ہیں۔ تو سوزوکی نے Gixxer میں کیا کچھ دیا ہے؟ Gixxer SF کی نفیس فیئرنگ کے نیچے موجود انتہائی ہلکے وزن کا اور طاقتور انجن SEP (سوزوکی کی ایکو-پرفارمنس ٹیکنالوجی) سے لیس ہے جو Gixxer SF کو ایندھن کی بچت پر سودے بازی کے بجائے انجن کے کافی آؤٹ پٹ کی فراہمی کو یقینی بناہتا ہے اور یہی وجہ ہے کہ SF کو 40 کلومیٹر فی لیٹر کی متاثر کن درجہ بندی دیتا ہے۔ Gixxer SF اینٹی-لاک بریکنگ سسٹم (ABS) کے ساتھ بھی آتی ہے، ایک مددگار سسٹم جو بریکنگ طاقت کو خودکار طور پر زیادہ مؤثر انداز میں کنٹرول کرتا ہے اور روڈ پر پھسلن، غیر ہموار صورت؛ یا اچانک بریک لگانے کی صورت میں پہیے کے پھنس جانے سے بچاتا ہے۔ یہ ان افراد کے لیے مددگار ہے جو اپنی موٹر سائیکلوں کوٹریکس پر لے جانا اور اس کی کارکردگی جانچنا پسند کرتے ہیں۔ اس کے علاوہ 7 مرحلہ سسپنشن ایڈجسٹمنٹ، دو ایگزاسٹس، AHO ہیڈلائٹس، LED ٹیل لیمپ، مکمل ڈجیٹل اسپیڈومیٹر، بڑے فرنٹ اور بیک ڈسک بریکس ساتھ ساتھ بڑے ڈایامیٹر کی فرنٹ فورکس بھی شامل ہیں جو اگلے حصے میں استحکام کو بڑھاتی اور موٹر سائیکل کے وزن کو کم کرتی ہیں۔ تو بلاشبہ یہ موٹر سائیکل سازوسامان سے مکمل طور پر لیس ہے اور اس شعبے میں خریداروں کے لیے کچھ رہ نہیں جاتا۔
حتمی بات:
اب بات ختم کرتے ہیں، میرا دل سے ماننا ہے کہ یہ موٹر سائیکل ایک بہتر پروڈکٹ بن سکتی تھی۔ اس میں EFI سسٹم ہو سکتا تھا اور یہ بلاشبہ اس سے زیادہ پاور آؤٹ پٹ کا فائدہ اٹھا سکتی تھی کیونکہ پھر 10 سیکنڈز سے بھی کم میں 0 سے 100 کلومیٹر فی گھنٹے کی رفتار تک پہنچ جاتی۔ قیمت بھی ایک عنصر ہے جو اس موٹر سائیکل کے کئی ممکنہ صارفین کو روکے گی۔ یہی موٹر سائیکل بھارت میں یہاں کے مقابلے میں تقریباً 40 فیصد کم قیمت پر دستیاب ہے۔ میرے خیال میں اگر آپ کو اسپورٹس بائیک کی شکل واقعی درکار ہے تو آپ اس موٹر سائیکل کو خرید سکتے ہیں۔ ورنہ، اگر آپ کو روزمرہ سفر اور کچھ تفریح کے لیے موٹر سائیکل درکار ہیں تو میں آپ کو بینیلی TNT150 جیسی موٹر سائیکل کی تجویز دوں گا جو ایک فیئرنگ بائیک تو نہیں لیکن پھر بھی کارکردگی کے بہتر اعداد و شمار اور EFI سسٹم کی حامل ہے۔ پھر Gixxer کا پاکستان میں کوئی براہِ راست مقابل بھی نہیں ہے۔ گو کہ ہمیں کچھ ہفتے پہلے اپریلیا 125cc کی خبریں سننے کو ملی تھیں لیکن اب تک اس موٹر سائیکل پر کوئی مزید خبر نہیں آئی۔ واضح رہےکہ اپریلیا کہیں زیادہ اسپورٹی اور جھکے ہوئے ڈیزائن کی حامل ہے لیکن یہ موٹر سائیکل تقریباً 7 لاکھ روپے کی متوقع ہے۔
Benelli TNT150
Suzuki Gixxer 150cc (Regular)
مختصر یہ کہ اگر Gixxer کو 3 سے 4 لاکھ روپے پر پیش کیا جاتا تو یہ باآسانی ہماری ترجیحی پسند ہوتی کیونکہ یہ ایک زبردست موٹر سائیکل ہے لیکن اس قیمت پر نہیں کہ جس پر فروخت کی جا رہی ہے۔
