گاڑیوں کے شعبے میں کام کرنے والے دو نامور جاپانی اداروں سوزوکی اور ٹویوٹا نے کاروباری شراکت داری کا ارادہ ظاہر کیا ہے۔ 12 اکتوبر 2016 کو جاری کیے جانے والے مشترکہ اعلامیے میں کہا گیا ہے کہ دونوں ادارے مارکیٹ کو مدنظر رکھتے ہوئے شراکت کے امکانات پر غور کر رہے ہیں۔ اس ضمن میں مذکورہ اداروں کی طرف سے مزید تفصیلات فراہم نہیں کی گئیں۔
ٹویوٹا موٹرز کا نام اس وقت گاڑیاں تیار کرنے والے اداروں میں سرفہرست ہے جبکہ سوزوکی موٹرز کو چھوٹی گاڑیوں کے شعبے کا بے تاج بادشاہ تسلیم کیا جاتا ہے۔ مشترکہ اعلامیے میں دونوں اداروں کے سربراہان نے کاروباری شراکت داری کا مقصد حفاظتی اور ماحولیاتی ٹیکنالوجی پر توجہ مرکوز رکھنے کو قرار دیا ہے۔
یہ بھی پڑھیں: سوزوکی نے گاڑیوں کی جانچ میں غلط طریقہ اختیار کرنے کا اعتراف کرلیا
سوزوکی کے سربراہ اسامو سوزوکی نے کہا کہ ٹویوٹا اپنے شعبے کا بہترین اور قابل بھروسہ ادارہ ہے جو مستقل نئی اور جدید ٹیکنالوجی پر مصروف عمل ہے۔ انہوں نے سوزوکی اور ٹویوٹا کے درمیان شراکت داری کے امکانات پر گفتگو کو خوش آئند قرار دیا۔ انہوں نے بتایا کہ اس ممکنہ شراکت سے متعلق سب سے پہلے ٹویوٹا کے سربراہ شوئی چیرو ٹویوڈا سے بات کی تھی۔ سوزوکی کے سربراہ نے ٹویوٹا کے صدر اکیو ٹویوڈا کی جانب سے اس شراکت داری میں دلچسپی ظاہر کرنے پر بھی شکریہ ادا کیا۔
ممکنہ شراکت داری سے متعلق بات کرتے ہوئے ٹویوٹا کے صدر اکیو ٹویوڈا نے کہا کہ گاڑیوں کے شعبے میں تبدیلی کے فضا قائم ہونے کے بعد ہمیں اپنی ساکھ برقرار رکھنے کے لیے تمام صورتحال کو مدنظر رکھتے ہوئے فیصلے کرنا ہوں گے۔ انہوں نے مزید بتایا کہ دونوں ہی ادارے اپنی اپنی تحقیق اور ترقی کی کوششوں میں مصروف ہے تاہم موجودہ وقت میں یہ بہت ضروری ہے کہ ہم یکساں ہدف حاصل کرنے کے لیے مل جل کر محنت کریں۔ اکیو ٹویوڈا نے مزید کہا کہ بہتر گاڑیوں کی تیاری اور شعبے کی ترقی کے لیے کوشش کرنے والے تمام اداروں کے ساتھ شراکت داری کے لیے ٹویوٹا کے دروازے ہمیشہ کھلے رہیں گے۔
یہ بھی پڑھیں: ٹویوٹا کی جانب سے ڈیزل گاڑیوں کی تیاری بند کرنے کا عندیہ
ماہرین کے خیال میں سوزوکی اور ٹویوٹا کی ممکنہ شراکت داری کے پیچھے مختلف مارکیٹوں میں ان اداروں کو درپیش مشکلات کار فرما ہیں۔ اس وقت ٹویوٹا کو شمالی امریکا اور یورپ میں سخت مقابلے کا سامنا ہے جبکہ سوزوکی کو دیگر ترقی یافتہ منڈیوں میں مشکلات درپیش ہیں۔ یاد رہے کہ ٹویوٹا پوری دنیا میں سالانہ 1 کروڑ سے زائد جبکہ سوزوکی تقریباً 28 لاکھ گاڑیاں فروخت کرتا آرہا ہے۔ جاپان کی مقامی مارکیٹ میں 8 ادارے گاڑیوں کے شعبے سے وابستہ ہیں جن میں سوزوکی کا شمار چوتھے بڑے کار ساز ادارے کے طور پر کیا جاتا ہے۔
تبصرے بند ہیں.