رواں ہفتہ پاکستان میں یک بعد دیگرے مسلسل دو گاڑیاں ٹویوٹا ہائی لکس ریوُو اور ٹویوٹا فورچیونر کی دوسری جنریشن متعارف کروانے کے بعد اب انڈس موٹرز ٹویوٹا کرولا XLi کا لمیٹڈ ایڈیشن پیش کرنے کی تیاری کر رہا ہے۔ اس ضمن میں ٹویوٹا کے ڈیلرشپس نے پرانی کرولا XLi کی فروخت بند کر کے ٹویوٹا کرولا XLi لمیٹڈ ایڈیشن (LE) کی بکنگ کا آغاز کردیا ہے۔
ٹویوٹا کرولا XLi لمیٹڈ ایڈیشن میں متعدد خصوصیات شامل کرنے کے ساتھ قیمت میں بھی 90 ہزار روپے کا اضافہ کردیا گیا ہے۔ لمیٹڈ ایڈیشن میں شامل کی جانے والی منفرد خصوصیات پچھلی XLi کا حصہ نہیں تھیں۔ ان میں پچھلی جانب کیمرہ، 8 انچ LCD اسکرین کا حامل انفوٹیمنٹ سسٹم، 5-اسپیڈ مینوئل گیئر باکس اور چار مختلف رنگ [سفید، سیاہ، نقرئی (silver) یا بھورا] منتخب کرنے کی سہولت بھی شامل ہے۔ دیگر تفصیلات یہ ہیں:
قیمت میں 90 ہزار روپے کے اضافے سے ٹویوٹا کرولا XLi کے لمیٹڈ ایڈیشن کی مجموعی قیمت 17 لاکھ 30 ہزار روپے ہوگئی ہے۔ اگر آج یہ گاڑی بُک کروائی جائے تو خریدار کو نومبر یا دسمبر میں XLi لمیٹڈ ایڈیشن فراہم کی جائے گی۔ لمیٹڈ ایڈیشن بُک کروانے کے لیے ٹیکس دہندگان کو 30 ہزار روپے اور ٹیکس نادہندگان کو 40 ہزار روپے ادا کرنے ہوں گے۔
ٹویوٹا انڈس موٹرز کی جانب سے اب تک اس حوالے سے کوئی اعلان سامنے نہیں آیا اور ویب سائٹ پر بھی کوئی اطلاع نہیں دی گئی جس کی وجہ سے صارفین اب تک اس حوالے سے کشمکش کا شکار نظر آرہے ہیں۔
