ٹویوٹا گوجرانوالہ موٹرز ڈیلرشپ کا فراڈ اس قدیم کہاوت کی تصدیق کرتا ہے کہ لالچ بُری بلا ہے۔
تازہ ترین خبر یہ ہے کہ ٹویوٹا گوجرانوالہ موٹرز کے مالک صارفین کو لوٹنے کے بعد ملک سے فرار ہو گئے ہیں۔ اس معاملے میں ممکنہ طور پر کروڑوں روپے لوٹے گئے ہیں۔
تفصیلات کے مطابق 250 سے زیادہ افراد نے ڈیلرشپ سے گاڑیاں بک کروائی تھیں اور ٹھگ لیے گئے۔ ڈیلرشپ کا مالک مبینہ طور پر سارے پیسوں کے ساتھ کینیڈا فرار ہو چکا ہے۔ متاثرہ افراد نے ڈیلرشپ کے خلاف FIRs درج کروائیں اور جواب میں ڈیلرشپ نے بھی اُن افراد پر مقدمے درج کروائے ہیں کہ جنہوں نے ان کے شوروم میں توڑ پھوڑ کی۔
تجزیہ
اس پورے معاملے کا البتہ ایک پہلو یہ بھی ہے کہ جن کو لوٹا گیا ہے وہ مبینہ طور پر غیر قانونی کاروباری حرکات میں ملوث تھے۔
چند مقامی سرمایہ کار ٹویوٹا گوجرانوالہ موٹرز کے مالک کی مدد سے گاڑیاں خریدنے کے عادی تھے اور پھر انہیں آن منی پر فروخت کرتے تھے۔ بظاہر سرمایہ کاروں نے ڈیلرشپ کے مالک کو نقد پیسے دیے اور انڈس موٹر کمپنی کے نام پے آرڈر نہیں دیا جیسا کہ عام طور پر کیا اور کہا جاتا ہے۔
یوں یہ سرمایہ کار بری طرح متاثر ہوئے کہ جنہیں ٹویوٹا گوجرانوالہ موٹرز کے مالک نے ٹھگ لیا اور وہ انڈس موٹر کمپنی کے سامنے دعویٰ بھی نہیں کر سکتے کیونکہ رسیدیں اور دیگر کاغذات موجود ہی نہیں۔
دوسری جانب حقیقی صارفین، انڈس موٹر کمپنی کے نام پے آرڈر/ڈیمانڈ ڈرافٹ کی رسید رکھتے ہیں اور یوں ٹویوٹا گوجرانوالہ موٹرز کے خلاف ٹھوس ثبوت کے حامل ہیں اور ان کے لیے ٹویوٹا IMC کی جانب سے بروقت گاڑی ملنے کا امکان بھی ہے۔
اس معاملے پر سنیل منج کیا کہتے ہیں، آئیے سنیں:
یاد رکھیں، اگر آپ کسی ڈیلرشپ کو آرڈر کرنے کے بعد اپنی رقم کھونا نہیں چاہتے تو ہمیشہ کمپنی کے نام پر پے آرڈر بنائیں، کسی شخص کے نام پر نہیں اور ایجنٹ سے آرڈر کی رسید حاصل کریں۔
واضح رہے کہ ٹویوٹا IMC نے ایک اعلان کے ذریعے اس ڈیلرشپ کا لائسنس معطل کردیا ہے، نیچے دیکھیں:
PakWheels.com نے ٹویوٹا IMC سے رابطہ کیا ہے۔ جیسے ہی اس معاملے پر ان کی طرف سے کچھ کہا جائے گا، ہم اس بلاگ کو اپڈیٹ کردیں گے۔
اپنے خیالات نیچے تبصروں میں پیش کیجیے۔
