PakWheels اپنے ذرائع سے تصدیق کرتا ہے کہ ٹویوٹا انڈس موٹر کمپنی چند ماہ میں پاکستان میں ٹویوٹا رش جاری کر رہا ہے۔
یہ 1500cc کی ایک منی-SUV ہے جسے ادارے نے 2010ء میں ڈائیہاٹسو ٹیریئس کے طور پر جاری کیا تھا لیکن بعد میں یہ سلسلہ بند کردیا۔ اور اب IMC ملک میں ابتدائی طور پر مکمل طور پر تیار شدہ یونٹس (CBUs) فروخت کرے گا۔
ٹویوٹا رش پہلی بار 1997ء میں جاپانی مقامی مارکیٹ میں متعارف کروائی گئی تھی جس کے بعد اس نے ایشیا، افریقہ، جنوبی امریکا اور مشرقی یورپ کی متعدد ترقی پذیر مارکیٹوں میں توجہ حاصل کی۔
دیگر مارکیٹوں میں یہ گاڑی ڈائیہاٹسو بیگو، گرانڈ یا پیروڈوا ناٹیکا کے نام سے معروف ہے۔ دیگر مارکیٹوں میں دستیاب 7 نشستوں کی ٹویوٹا رش کا 2018ء ماڈل فورچیونر جیسا انداز رکھتا ہے لیکن چھوٹے حجم کے ساتھ۔ ابھی یہ واضح نہیں کہ پاکستان میں صارفین کے لیے کون سے آپشنز دستیاب ہوں گے، لیکن یہ حال ہی میں مارکیٹ میں آنے والی دوسری منی-SUVs کی طرح ممکنہ طور پر نوجوان شہری صارفین کو ہدف بنائے گی۔
ٹویوٹا رش مارکیٹ میں ہونڈا ویزل/HR-V اور سوزوکی وٹارا کے براہ راست مقابل کے طور پر اپنا مقام بنائے گی۔ اس زمرے میں مقامی آٹومیکرز کی طرف سے پیش کردہ گاڑیوں کی قیمتیں 35 سے 42 لاکھ کے درمیان ہیں، اس لیے فرض کیا جا رہا ہے کہ ادارہ اسی قیمت کے قریب یہ گاڑی پیش کرے گا۔
گزشتہ چند سالوں میں ملک کے طویل عرصے سے غیر متحرک آٹو سیکٹر میں سرگرمی پیدا ہوئی جب گاڑیوں کی فروخت میں سال بہ سال زبردست اضافہ دیکھا گیا، جبکہ نئے آٹومیکرز گاڑیوں کے لیے پاکستان کی بڑھتی ہوئی طلب میں حصہ پانے کے لیے اپنی اسمبلی لائنز بنانے کے لیے کام کر رہے ہیں۔
نوٹٹ: ٹویوٹا رش/ڈائیہاٹسو ٹٹیریئس کو ڈائیہاٹسو ٹیریئس کڈ نہ سمجھا جائے، جو 660cc کی جاپانی مائیکرو-SUV تھی جس نے 2000ء کی دہائی کے اواخر میں ملک میں کافی مقبولیت حاصل کی۔
