نیشنل ہائی وے اتھارٹی (NHA) نے مسافروں کو سہولت فراہم کرنے کے لیے نئی iOS ایپ جاری کرے گی۔
21 ویں صدی میں ٹیکنالوجی میں آنے والی جدّت کی وجہ سے ہر چيز تیز ہو رہی ہے۔ اس کی سب سے نمایاں مثال اسمارٹ فون ہے جو نہ صرف رابطے کا ذریعہ ہے بلکہ اب تو یہ اطلاعات کی ترسیل کا بھی نیا ذریعہ بن چکا ہے، جس کے ذریعے آپ گھر بیٹھے چند کلکس میں ہی مطلوبہ معلومات تک رسائی حاصل کر سکتے ہیں۔ اسمارٹ فونز کے اس استعمال کو مدنظر رکھتے ہوئے نیشنل ہائی وے اتھارٹی (NHA) مسافروں کے لیے ایک iOS ایپ جاری کرنے جا رہی ہے۔ یہ ایپ مسافروں کو NHA کے منصوبوں، سڑکوں، انٹرایکٹو نقشوں، ٹول کے نرخ اور موسم کی صورت حال جیسی تازہ ترین معلومات فراہم کرنے میں مدد دے گی۔
NHA پہلے ہی گوگل پلے اسٹور پر اینڈرائیڈ ایپ جاری کر چکا ہے، اور اتھارٹی کا کہنا ہے کہ جلد ہی یہ ایپلی کیشن ایپل اسٹور پر بھی اپلوڈ کی جائے گی۔
NHA کی پیش کردہ اینڈرائیڈ ایپ iOS ایپ جیسی ہی خوبیاں رکھتی ہے۔
یہ ایپ مسافروں کو NHA کے جاری اور مکمل منصووبں کی علاقائی تفصیلات اور مالیاتی پالیسی کے بارے میں تفصیلات، ٹول کے نرخ اور روڈ سیفٹی گائیڈلائنز سے آگاہ کرنے میں مدد دے گی۔ اس ایپ کی ایک خصوصیت اس کے انٹرایکٹو نقشے اور سفر کی منصوبہ بندی کے فیچرز ہیں۔ یہ مسافروں کو نقشوں کے ذریعے اپنے سفر کے لیے دستیاب راستے بتاتی ہے تاکہ وہ اس کے مطابق اپنے سفر کی منصوبہ بندی کر سکیں۔
مزید برآں، ایکسائز اینڈ ٹیکسیشن ڈپارٹمنٹ پنجاب نے بھی نئی الیکٹرونک سم متعارف کروانے کا فیصلہ کیا ہے جو صوبے میں گاڑیوں کی چوری کی بڑھتی ہوئی وارداتوں کی روک تھام کے لیے نمبر پلیٹ میں نصب کی جائے گی۔ تفصیلات کے مطباق نئی نمبر پلیٹ یا سم رکھنے والا “اسٹیکر” اتھارٹی کی جانب سے بنایا جائے گا، جو گاڑی کی فرنٹ اسکرین پر لگایا جائے گا۔ اس کی حتمی تاریخ کا تو ایکسائز ڈپارٹمنٹ نے اعلان نہیں کیا البتہ یہ ضرور بتایا گیا ہے کہ اسے مستقبلِ قریب میں جاری کیا جائے گا۔
مزید برآں، 18 دسمبر 2018ء کو پاکستان انفارمیشن ٹیکنالوجی بورڈ (PITB) نے پنجاب پولیس اور ٹریفک پولیس پنجاب کے تعاون سے ٹریفک ایکسیڈینٹ مینیجمنٹ انفارمیشن سسٹم (TAMIS) بھی جاری کیا۔
ہماری طرف سے اتنا ہی، اس بارے میں اپنے خیالات نیچے تبصروں میں پیش کیجیے۔
