انجن کے ‘ورووم’ اور کچھ خوبصورت لائٹس نے مجھے اپنی جانب متوجہ کیا تو میں اس خوبصورت گاڑی کو دیکھتا ہی رہ گیا۔ یہ ہونڈا ویزل ہے۔ جی ہاں، وہی گاڑی جس کی گزشتہ دو ماہ کے دوران فروخت میں اضافہ ہوا ہے اور اسے بڑی تعداد میں پاکستان میں درآمد کیا جارہا ہے۔
پہلی بار ہونڈا ویزل کو ٹوکیو موٹر شو 2013 میں دکھایا گیا تھا۔ اسی سال ماہ دسمبر میں اسے جاپانی مارکیٹ میں فروخت کے لیے پیش کردیا گیا۔ ابتداء میں پاکستانی مارکیٹ میں اسے زیادہ دلچسپی سے نہ دیکھا گیا البتہ رواں سال کے آغاز سے ہونڈا ویزل ہماری مقامی مارکیٹ میں نظر آنا شروع ہوئی اور اسے پسند بھی کیا جا رہا ہے۔
یہ گاڑی دو طرز گیس اور ہائبرڈ/بجلی پر چلنے کی صلاحیت کے ساتھ پیش کی گئی ہے۔ ذیل میں موجود تصویر ہائبرڈ گاڑی کی ہے۔ اس میں اسپورٹس ہائبرڈ i-DCD سسٹم 1500 سی سی انجن لگایا گیا ہے۔ گاڑی کا تجربہ رکھنے والے چند افراد کا کہنا ہے ایندھن کے معاملے میں یہ 21-24 کلومیٹر فی لیٹر فراہم کرتی ہے جو اس طرز کی گاڑی کے لیے بہت اچھی ہے۔
اگر آپ اس کے اندرونی حصہ پر نظرڈالیں تو میری طرح آپ بھی پہلی ہی نظر میں اسے بہترین قرار دیں گے۔ سیاہ اور سنتری رنگ کا مجموعہ اس کو دیگر گاڑیوں سے مختلف بناتا ہے۔
اس گاڑی کے متعارف ہونے کے بعد ٹویوٹا پریوس کی فروخت میں کمی کی توقع ہے جس کی کئی وجوہات ہیں جس میں گاڑی کی بہترین گرفت کا مسئلہ بھی شامل ہے۔ 1500cc کے ہائبرڈ انجن کے ساتھ پیش کی جانے والی ویزل کی قیمت بھی پریوس کے مقابلے میں کم ہے۔ اب تک زیادہ تر ویزل 30 سے 35 لاکھ کے درمیان فروخت ہورہی ہیں۔
