ایکسائز اینڈ ٹیکسیشن (E&T) ڈپارٹمنٹ پنجاب نے یکم مارچ 2020ء سے گاڑی نئے مالک کے نام کرنے پر بایومیٹرک تصدیق کو لازمی قرار دے دیا ہے۔
تفصیلات کے مطابق ایکسائز ڈپارٹمنٹ صوبہ پنجاب میں گاڑیوں کی منتقلی کا نیا نظام نافذ کرنے کے لیے مکمل طور پر تیار ہے۔ نئے نظام کے مطابق بایومیٹرک ٹرانسفر کے لیے گاڑی بیچنے اور خریدنے والے دونوں کی تصدیق لازمی ہوگی۔ اس نئے نظام کو نافذ کرنے کے لیے تمام تیاریاں اور ضروری اقدامات صوبائی حکومت کی جانب سے اٹھا لیے گئے ہیں۔
بایومیٹرک تصدیق کیوں ضروری ہے؟
بایو میٹرک تصدیق کا عمل ناجائز اقدامات کو روکنے کے لیے ضروری ہے اور یہ گاڑی کے پرانےاور نئے مالک دونوں کے لیے پورے عمل کو شفاف بھی بناتا ہے۔ حکومت کافی عرصے سے اس پر کام کر رہی تھی اور اب یہ سسٹم اگلے مہینے کے آغاز سے اپنا کام شروع کر دے گا۔ ذرائع کے مطابق درکار بایومیٹرک مشینیں پہلے ہی خرید کر آن لائن سسٹم سے منسلک کی جا چکی ہیں۔
حکومت کا مقصد گاڑیوں کی منتقلی میں کسی بھی فراڈ کو روکنا ہے۔ بہت سے لوگ ایسے بھی ہیں جو اپنی گاڑیاں اوپن ٹرانسفر لیٹر پر چلا رہے ہیں، جس کا مطلب ہے کہ انہوں نے گاڑی اپنے نام پر منتقل نہیں کروائی۔ اگر یہ گاڑی کسی مجرمانہ سرگرمی میں ملوث پائی جاتی ہے تو پرانے مالک کے لیے مسائل کھڑے ہو سکتے ہیں۔ اس لیے یہ یقینی بنائیں کہ گاڑی باقاعدہ طور پر نئے مالک کے نام پر منتقل ہو۔
اوپن ٹرانسفر لیٹر پر گاڑی چلانا غیر قانونی ہے۔ ساتھ ہی گاڑیوں کی تصدیق کا نیا بایومیٹرک نظام بیچنے اور خریدنے والے دونوں کی موجودگی میں گاڑی کی شفاف منتقلی کو یقینی بنائے گا۔ حالیہ چند سالوں میں متعدد ایسے واقعات سامنے آ چکے ہیں کہ جہاں گاڑیاں مالک کی رضامندی کے بغیر فروخت کی گئیں؛ کیونکہ کوئی ایسا فول پروف نظام موجود ہی نہیں تھا۔
دوسری جانب، یہ پنجاب کے شہریوں کی ذمہ داری بھی ہے کہ وہ مستقبل میں قانون کا سامناکرنے یا کسی بھی تکلیف سے بچنے کے لیے گاڑی خریدتے یا بیچتے ہوئے کسی پریشانی سے دوچار نہ ہوں۔ ساتھ ہی یہ دیکھنا دلچسپ ہوگا کہ حکومت پنجاب میں اس نظام کو کتنے مؤثر انداز میں نافذ کرتی ہے کیونکہ ماضی میں بھی کئی ایسی کوششیں کی جا چکی ہیں۔ نظام کو مکمل نافذ کرنے سے پہلے کسی بھی کمی کوتاہی کو پورا کرنا ہوگا۔
نیچے تبصروں میں اپنی رائے کا اظہار کیجیے اور پاکستان کی آٹوموبائل انڈسٹری کے حوالے سے مزید خبروں کے لیے پاک ویلز کے ساتھ رہیے۔
