گزشتہ نو مہینوں میں کار خریدنا ایک مشکل ترین تجربہ رہا ہے۔ کاروں کی بڑھتی قیمتوں نے خریداروں کی نئی کار خریدنے کی صلاحیت کو ختم کر دیا ہے اور اب استعمال شدہ کاروں کا بھی یہی حال ہے۔
مقامی کار ساز اداروں نے اس سال جنوری سے کاروں کی قیمتوں میں 47 فیصد اضافہ کیا ہے۔ کار کمپنیوں نے روپے کی قدر میں کمی، بڑھتی ہوئی افراط زر، اور بڑھتی ہوئی خام مال اور شپنگ لاگت کو موجودہ مارکیٹ کی حالت کا ذمہ دار ٹھہرایا ہے۔
انجینئرنگ ڈیولپمنٹ بورڈ (EDB) کی جانب سے شیئر کی گئی ایک رپورٹ میں جنوری سے ستمبر 2022 تک کار کی قیمتوں میں بڑے اضافے کا انکشاف ہوا ہے۔
گاڑیوں کی قیمتوں میں اتنا اضافہ کیوں؟
رپورٹ کے مطابق، اس سال کے آغاز سے، کاروں کی قیمتوں میں 47 فیصد کا زبردست اضافہ دیکھا گیا ہے۔ EDB نے کہا کہ روپے کی قدر میں 31 فیصد کمی اور آٹوموبائل سیکٹر پر موجودہ حکومت کی طرف سے ڈیوٹیز اور ٹیکسوں میں بڑے پیمانے پر اضافے کے ساتھ، کار کی قیمتوں کو حد سے تجاوز کرنے پر مجبور کر دیا ہے۔
مزید برآں، بڑھتے ہوئے مال برداری اور خام مال کے اخراجات نے اس مسئلے میں مزید اضافہ کیا۔ حیرت کی بات یہ ہے کہ پچھلے نو مہینوں کے دوران مال برداری میں 250 فیصد اضافہ ہوا ہے۔ اسی طرح خام مال کی لاگت میں توسیع کی وجہ سے پیداواری لاگت اور رسد میں بھی اضافہ ہوا ہے۔
پاکستان میں استعمال شدہ کاروں ایک قیمتوں میں بھی اضافہ
بلومبرگ کی رپورٹ کے مطابق، پاکستان میں استعمال شدہ کاریں فروخت کنندگان کے لیے منافع کمانے کا ایک قابل ذکر ذریعہ ہیں-
کراچی میں مقیم تجزیہ کار فرم “Optimus Capital Management” (OCM) نے پاکستان کو “ایک غیر معمولی ملک” قرار دیا ہے جہاں پانچ سال قبل 20 لاکھ روپے میں خریدی گئی کار پانچ سال استعمال کے بعد بھی 32 لاکھ روپے کی رقم میں فروخت کی جا سکتی ہے۔
پاکستان انسٹی ٹیوٹ آف ڈویلپمنٹ اکنامکس (PIDE) کی رپورٹ کا حوالہ دیتے ہوئے، یہ بھی نشاندہی کی گئی ہے کہ سرمایہ کار نئی کاروں کی ایک کھیپ خریدتے ہیں اور ان پر بھاری “آن منی” وصول کرتے ہیں۔ رپورٹ کے مطابق صارفین آن منی کی صورت میں 35 ارب سالانہ ادا کرتے ہیں۔
