ضروری اطلاع! ٹویوٹا کمپنی پاکستان چھوڑ کر نہیں جا رہی

سوشل میڈیا پر پچھلے دو دنوں سے ایک خبر گردش کر رہی ہے جس میں ایک ٹویٹ کا حوالہ دیا گیا ہے۔ سٹاک ٹریڈر اور صنعتی تجزیہ کار کی جانب سے کیے گئے ٹویٹ میں کہا گیا ہے کہ ٹویوٹا کمپنی پاکستان چھوڑ کر جا رہی ہے۔ اس کے علاوہ اسد ناصر نے ٹویٹ میں کہا ہے کہ ذرائع کے مطابق ٹویوٹا انڈس موٹرز پاکستان سے اپنا پلانٹ مستقل طور پر بند کرنے اور مستقل طور پر پاکستان چھوڑنے کے لیے تیار ہے۔

🚨 BREAKING NEWS :-

Sources Claim That Toyota Indus Motors is set to permanently Shutdown their Plant from Pakistan and leave Pakistan permanently.

— Asad Nasir (@asadnasir2000) June 17, 2023

اس ٹویٹ کو خاص طور پر شیل انٹرنیشنل جیسی دیگر کمپنیوں کے پاکستان چھوڑنے کے تناظر میں کچھ زیادہ توجہ ملی ہے۔ جس کے بعد ایسی خبریں مارکیٹ میں صارفین میں پائی جانے والی الجھن اور بے چینی کو بڑھاتی ہیں۔ لہذا، اس معاملے کی تصدیق کے لیے پاک ویلز نے ٹویوٹا پاکستان سے ان کا نقطہ نظر جاننے کے لیے رابطہ کیا۔

ٹویوٹا پاکستان کا بیان

اس معاملے پر بات کرتے ہوئے ٹویوٹا پاکستان کے ایک عہدیدار نے اسے جعلی خبر اور افواہ قرار دیا۔ کمپنی آفیشل کا کہنا تھا کہ  انڈس موٹر کمپنی (آئی ایم سی) نے پاکستان میں ہائبرڈ کاروں کی ترقی میں 100 ملین ڈالر کی سرمایہ کاری کی ہے جس کے بعد ملک چھوڑنے کا سوال ہی پیدا نہیں ہوتا۔ انکا کہنا تھا کہ شیل کمپنی سے متعلقہ خبروں کے باعث لوگ ایسی افواہیں پھیلا رہے ہیں۔

کمپنی نے اس طرز کی تمام خبروں کو رد کر دیا ہے۔ اہلکار نے کہا کہ ٹویوٹا کمپنی جعلی خبروں کی تردید کرتی ہے۔ انہوں نے کہا کہ ہم نے پاکستان میں ہائبرڈ پلانٹس لگائے ہیں اور کرولا کراس کی پیداوار بھی شروع کردی ہے۔

انہوں نے مزید کہا کہ یہ بغیر کسی ٹھوس بنیاد کے کی گئی محض ٹویٹس ہیں، اس لیے ان پر ردعمل دینا کمپنی کی پالیسی نہیں ہے۔ ہم نے آج کے اخبارات میں پاکستان میں کاربن کے اخراج کو کم کرنے کے بارے میں ایک اشتہار بھی شائع کیا ہے جو یہ بتانے کیلئے کافی ہے کہ کمپنی کہیں نہیں جا رہی۔