ہںڈا نے نئی آنے والی HR-V کا ٹیزر جاری کر دیا

ہنڈا اٹلس کار لیمیٹڈ آنے والی HR-V کے حوالے سے تفصیلات بتانے سے گریزاں ہے۔ چند ہفتے قبل، کمپنی نے پاکستان آٹو پارٹس شو (PAPS) 2022 کے دوران کار کا لوگو ظاہر کیا تھا جبکہ اب کمپنی نے گاڑی سے متعلق چند جھلکیاں جاری کی ہیں جس میں  محض سامنے والی گرِل کو دیکھا جا سکتا ہے۔

دلچسپ بات یہ ہے کہ سامنے والے حصے کے حالیہ ٹیزر کی جھلکیوں نے کچھ انکشافات کیے ہیں۔ گرِل ڈیزائن اور سٹائل سے پتہ چلتا ہے کہ نئی HR-V تیسری جنریشن ہنڈا ویزل سے مطابقت رکھتی ہے۔

خیال رہے کہ ہنڈا کی نئی HR-V کو جاپان میں ویزل کے نام سے بھی جانا جاتا ہے۔ مزید برآں، ویزل ایک سی بی یو  HEVکار ہے جبکہ نئی HR-V مقامی طور پر تیار کی گئی پیٹرول کار ہے۔

اس سے قبل رواں سال جون میں ہم نے آپ کو بتایا تھا کہ گاڑی کے ایک ٹیسٹ یونٹ کو پاکستان میں دیکھا گیا ہے۔ مزید تفتیش سے معلوم ہوا کہ ہنڈا اٹلس نے ٹیسٹ یونٹ درآمد کیا جس کی قیمت 6.05 ملین روپے ہے۔ یہ تمام اپ ڈیٹس ہنڈا کے مداحوں کیلئے اچھی خبر سے کم نہیں ہیں، اس لیے یہ کہنا درست ہو گا کہ ہنڈا HR-V اس وقت پاکستان میں سب سے زیادہ انتظار کی جانے والی کار ہے۔

لانچ؟

گاڑی سے متعلق ہمارے ذرائع نے ابھی ہمیں کار کے بارے میں مزید اپ ڈیٹ کیا ہے۔ ذرائع کے مطابق اس کراس اوور ایس یو وی کی لانچ قریب ہے۔ ذرائع نے مزید کہا کمپنی نے لانچ کے لیے اپنی تیاریاں مکمل کر لی ہیں۔

دریں اثنا، کچھ دوسرے ذرائع نے دعوی کیا کہ لانچ صرف چند دن کی دوری پر ہے. کمپنی کی طرف سے اب تک کچھ بھی سامنے نہیں لایا گیا ہے، لیکن ہمیں اپنے ذرائع پر یقین ہے، لہذا، ہم بہت جلد مقامی طور پر تیار شدہ HR-V دیکھیں گے۔

کمپنی نے اب تک جبکہ آنے والی HR-V کے فیچرز اور خصوصیات کی تفصیل پیش نہیں کی تو آپ اس کار کے بارے میں کیا سوچتے ہیں؟ کمنٹس سیکشن میں اپنے خیالات کا اظہار کریں.