مورس گیراجز (MG) موٹرز کی کراس اوور ایس یو وی MG HS پاکستان میں بہت کامیاب ہوئی ہے۔ کمپنی کے مطابق اس نے اب تک اس گاڑی کے 4,000 سے زیادہ یونٹس بُک کیے ہیں۔ اس کے علاوہ ہمارے ذرائع نے پہلے تصدیق کی تھی کہ عدالت نے کراچی پورٹ پر موجود اس گاڑی کے لگ بھگ 750 یونٹس کو ریلیز کرنے کا حکم بھی دیا ہے۔ حکام نے ‘انڈر انوائسنگ’ کے معاملے پر یہ گاڑیاں روک لی تھیں۔ ساتھ ساتھ تین بینکوں نے 5,200 ایم جی گاڑیوں کی LCs بھی جاری کر دی ہے، جس کا مطلب ہے کہ یہ گاڑیاں واقعی پاکستان آ رہی ہیں۔
لوکل مارکیٹ میں MG HS کی کامیابی کے بعد MG پاکستان اب مبینہ طور پر HS کا ایک پلگ-اِن ہائبرڈ ویرینٹ لانچ کرنے کی منصوبہ بندی کر رہا ہے جس کا نام MG HS PHEV ہے۔ اس کا مطلب ہے کہ گاڑی 1500cc کا ٹربوچارجڈ انجن رکھے گی ساتھ ہی چارجنگ پورٹ بھی بالکل الیکٹرک گاڑیوں جیسی۔ یعنی آپ گاڑی کو فیول اور الیکٹرک پاور دونوں پر چلا سکتے ہیں۔ کمپنی کے فیس بک پیج پر موجود بیان کے مطابق HS PHEV کی “جدید ٹیکنالوجی اور بہترین سیفٹی سسٹمز برطانیہ کی متحرک، بھرپور طاقت، ہینڈلنگ، ڈیزائن اور سیفٹی کے تصور کے مطابق ایک شاندار ڈرائیونگ تجربہ فراہم کرتے ہیں۔”
The All-New MG HS PHEV (Plug-in Hybrid);
This is an automobile that will refine all the values of life!
Stay tuned!#ILoveMG#MGPakistan pic.twitter.com/YpTDbOVgC3— MG Motor Pakistan (@MGPakistan) March 11, 2021
پوسٹ کے مطابق گاڑی 370Nm کا ٹارک اور 55 کلومیٹرز فی لیٹر کا مائلیج رکھتی ہے۔ اگر یہ سچ ہے تو یہ صارفین کے لیے شاندار ایوریج ہے۔ اس کے علاوہ یہ گاڑی 7.1 سیکنڈز میں 0 سے 100 کلومیٹرز فی گھنٹے کی رفتار تک جا سکتی ہے۔
پاکستان میں MG:
کمپنی نے اپنی آمد کے ساتھ مارکیٹ میں کافی ہلچل پیدا کی ہے۔ اپنے لوکل پارٹنر JSW گروپ کے ساتھ کمپنی اب تک دو گاڑیاں لانچ کر چکی ہے، MG HS اور MG ZS۔ اس کے علاوہ کمپنی نے الیکٹرک گاڑی MG ZS EV کی لانچ کا اعلان بھی کر رکھا ہے۔ ساتھ ساتھ کمپنی نے اپنی ہیچ بیک MG 3 کی آمد کا اشارہ بھی دیا ہے۔ MG کے مطابق یہ ہیچ بیک 20 لاکھ روپے سے کم قیمت پر فروخت کی جا سکتی ہے۔
MG پاکستان فیصل آباد، اسلام آباد اور کراچی سمیت مختلف شہروں میں ریکارڈ فروخت کے دعوے کر رہی ہے۔ ہر نئی لانچ کے ساتھ ایسا لگتا ہے کمپنی اپنے قدم جمانے کے لیے آئی ہے اور مارکیٹ پر زبردست اثرات ڈال رہی ہے۔
اس نئی متوقع لانچ کے بارے میں آپ کا کیا خیال ہے؟ اپنے خیالات نیچے تبصروں میں پیش کیجیے۔
