پچھلے کئی سالوں سے تمام کار کمپنیز ایس یو ویز گاڑیوں پر ہی کام کر رہی ہیں۔ کمپنیز کی جانب سے یکے بعد دیگرے ایس یو ویز کے نئے ماڈلز متعارف کروائے جا رہے ہیں جس کی وجہ سے مارکیٹ میں نہ صرف ایس یو ویز گاڑیوں کی بھرمار ہو چکی ہے بلکہ مختلف کمپنیز کے درمیان سخت مقابلہ بھی دیکھا جا رہا ہے۔
مارکیٹ میں ایس یو ویز کی بارش سے قبل بھی ایس یو ویز کے کئی ماڈلز موجود تھے لیکن یہ عوام کی خاطر خواہ توجہ حاصل کرنے میں ناکام نظر آئے لیکن اب حالات مختلف ہیں اور کِیا سپورٹیج 5 جنریشن کا سامنے آنا ہے اس کی سب سے بہترین مثال ہے۔ یقین اس گاڑی نے صارفین کے درمیان ایک خوشی کی لہر پیدا کر دی ہے۔
کِیا کمپنی کی جانب سے آفیشلی طور پر نئے آنے والی 5 جنریشن کِیا سپورٹیج کے انٹیریئر اور ایکسٹیریئر کی چند تصاویر جاری کی گئی ہیں جو اس گاڑی کی جدت اور نفاست کا منہ بولتا ثبوت ہیں۔
متوقع بیرونی تبدیلیاں
چونکہ اس نئی گاڑی کا صرف ٹیزر یعنی چند تصاویر ہی جاری گئی ہیں اس لیے اس گاڑی کے فرنٹ اور بیک کے بارے کچھ بھی کہنا قبل از وقت ہوگا لیکن جاری کی گئی ان تصاویر کو دیکھ کر ہم یقین سے کہہ سکتے ہیں کہ اس گاڑی کے فرنٹ اور بیک کے حصے میں نئی K5 سیڈان اور سورینٹو 4 جنریشن میں کی جانے والی تبدیلیوں کی طرز کی بڑی تبدیلیاں دیکھنے کو مل سکتی ہیں۔
اس گاڑی کی ہیڈ لائٹس، DRLs اور TAIL لائٹس میں کچھ تبدیلیاں کی گئی ہیں۔ اس کے علاوہ یہ بھی واضح ہو چکا ہے کہ نئے ڈیزائن کردہ C پلرز اور سائیڈ ویو مررز ڈور پینلز کے نیچے لگائے گئے ہیں۔
متوقع اندرونی تبدیلیاں
5 جنریشن کِیا سپورٹیج کا انٹیرئیر میں بھی بڑی تبدیلیاں دیکھنے کو مل سکتی ہیں۔ اس گاڑی کے انٹیرئیر کا موازنہ موجودہ جنریشن کی گاڑی کے انٹیرئیر سے کیا جائے تو یہ کہنا غلط نہ ہو گا کہ نئی آنے والی گاڑی کا انٹیرئیر انتہائی جدید اور ٹیکنالوجی سے بھرپور ہے۔ کمپنی کی جانب سے جاری کی گئی انٹیرئیر کی تصاویر میں مڑا ہوا ایک گلاس پینل دیکھا جا سکتا جو کہ اس کے مکمل ڈیجیٹل ہونے کا ثبوت پیش کرتا ہے۔ اس کے علاوہ گاڑی کے سٹیرینگ وہیل میں بھی تبدیلی دیکھی جا سکتی جس پر کِیا کا نیا برانڈ لوگو چسپاں دکھائی دے رہا ہے۔
متوقع انجن اور پاور
کمپنی نے اس نئی گاڑی کی کوئی ٹیکنیکل یا مکینیکل تفصیلات جاری نہیں کیں لیکن اب جبکہ کِیا سپورٹیج کو ہیونڈائی ٹوسان کی جڑواں کہا جا رہا ہے تو ہم اس کے انجن اور پاور کو 4 جنریشن ہیونڈائی ٹوسان کے برابر قرار دے سکتے ہیں جس کے تین ویرینٹ موجود ہیں۔ جن میں شامل کردہ 2000 سی سی اِن لائن 4 ایم پی آئی انجن 154 ہارس پاور جبکہ 2500 سی سی اِن لائن 4 187 ہارس پاور پیدا کرتا ہے۔ اس کے علاوہ تیسرا ویرینٹ 1600 سی سی ٹربو انجن پر مشتمل ہے جو کہ 177 ہارس پاور پیدا کرتا ہے۔
دوسری جانب کِیا سپورٹیج میں ہائیبرڈ اور پلگ اِن ہائیبرڈ ویرینٹ بھی دیکھنے کو مل سکتے ہیں۔ اس کے علاوہ فرنٹ وہیل ڈرائیو اور AWD کے ویرینٹ بھی دستیاب ہوں گے۔
عالمی سطح پر کب ریلیز ہوگی؟
5 جنریشن کِیا سپورٹیج آئندہ چند ہفتوں میں عالمی سطح پر سامنے آئے گی۔ امید کی جا رہی ہے کہ امریکا اور کوریا میں رواں سال کے اواخر میں اس گاڑی کی سیلز کا آغاز کردیا جائے گا جبکہ دیگر خطوں میں یہ گاڑی 2022 میں سیل کے لیے پیش کی جائے گی۔ اس گاڑی کا سامنے آنا یقینا مقامی مارکیٹ کیلئے ایک بڑی خبر ثابت ہوگی اور امید ہے کہ پاکستانی عوام اس گاڑی کو بھی مقامی سڑکوں پر دوڑتا دیکھنا چاہیں گے۔
پاکستان میں کب ریلیز ہوگی؟
چونکہ یہ گاڑی امریکا اور کوریا میں رواں سال کے آخر میں سیل کیلئے پیش کی جائے گی، اس لیے امید ہے کہ پاکستان میں یہ گاڑی 2022 کے اواخر یا 2023 کے اوائل میں سیل کیلئے پیش کی جائے گی۔
