ہم نے پہلے بھی آپ کو بتایا تھا کہ سوزوکی پاکستان 12 اکتوبر 2024 کو مقامی طور پر تیار کی گئی سوزوکی ایوری لانچ کر رہا ہے۔ کمپنی تقریباً دو سال سے اس ایم پی وی کو متعارف کرانے کی منصوبہ بندی کر رہی ہے تاکہ دہائیوں پرانی بولان کو ہمیشہ کیلئے بند کر کے اس کو لانچ کیا جا سکے۔ گزشتہ ماہ کمپنی نے بولان کے تقریباً 40 سال بعد پاکستان میں باضابطہ طور پر اس کی پیداوار بند کرنے کا اعلان کیا تھا اور آخری تیار کیے گئے یونٹ کی تصویر بھی شیئر کی تھی۔ خیال رہے کہ سوزوکی نے پاکستان آٹو شو 2022 میں ایوری کی رونمائی کی تھی، جس سے اس کی لانچنگ کا اشارہ ملا تھا۔ تاہم، مختلف مسائل کی وجہ سے، بشمول درآمدی پابندیاں، ملک کی غیر مستحکم معاشی حالت، اور خام مال کی کمی، لانچنگ میں تاخیر ہوتی رہی۔
مقامی طور پر تیار شدہ سوزوکی ایوری – ویڈیوز
گاڑی کی لانچنگ کا باضابطہ اعلان اس وقت ہوا جب کمپنی نے اپنے ڈیلرز کو لاہور میں ہونے والے ایونٹ پر مدعو کیا جس سے اس بات کی تصدیق ہو گئی کہ آخرکار سوزوکی ایوری آ رہی ہے۔ اس دوران، کچھ ویڈیوز لیک ہوئیں ہیں جن میں گاڑی کے اندرونی اور بیرونی حصے کو مختصراً دکھایا گیا ہے۔ ویڈیوز میں گاڑی کو تفصیلی طور پر نہیں دکھایا گیا لیکن ان سے کچھ فیچرز کے بارے اندازہ ہوتا ہے، جیسا کہ مینوئل ٹرانسمیشن، مینوئل بیک وِنڈو ہینڈلز، سوزوکی کا لوگو، اور اے سی/ہیٹر وینٹس۔ یہ بھی اہم ہے کہ سوزوکی ایوری کو دو ویرینٹسVX اور VXRمیں لانچ کیا جائے گا، جیسا کہ توقع کی جا رہی ہے۔
یہ ویڈیوز اس بات کا ثبوت ہیں کہ مقامی طور پر تیار شدہ سوزوکی ایوری کی لانچنگ قریب ہی ہے اور یقینی طور پر اس ہفتے کے آخر میں یہ گاڑی لانچ کی جائے گی۔ دریں اثناء، ہم نے ایک مکمل آرٹیکل لکھا ہے جس میں یہ بحث کی گئی ہے کہ آیا سوزوکی پاکستان کا بولان کو ایوری سے تبدیل کرنا ایک اچھا فیصلہ تھا یا نہیں، جسے آپ یہاں پڑھ کر خود فیصلہ کر سکتے ہیں۔ ہماری رائے میں، سوزوکی کو یہ فیصلہ بنیادی طور پر چنگان کارواں کی وجہ سے کرنا پڑا، جو کہ کافی عرصے سے اس مِنی وین کیٹیگری میں سرفہرست رہی ہے اور بولان کی جگہ لے چکی ہے۔ کارواں عوام کا انتخاب بن چکی ہے کیونکہ اس کا جدید ڈیزائن، آرام دہ سیٹیں، اے سی، اور بڑا انجن اس کی اہم خصوصیات تھیں۔ اب یہ دیکھنا دلچسپ ہوگا کہ نئی سوزوکی ایوری اس کا کس طرح مقابلہ کرتی ہے۔
آپ کی مقامی طور پر تیار شدہ سوزوکی ایوری سے کیا توقعات ہیں؟ ہمیں کمنٹس سیکشن میں ضرور بتائیں۔
