سازگار انجینئرنگ مقامی سطح پر BAIC BJ40 Plus کی تیاری کے بعد اب کمپنی ہیوال ایس یو ویز کے یونٹس بھی مقامی سطح پر تیار کرنے کی تیاریاں کر رہی ہے۔ ہیوال جولین اور ہیوال H6 کی مقامی سطح پر تیاری 2022 کے دوسرے کوارٹر میں شروع کی جائے گی۔ کمپنی بہت جلد جولین اور ہیوال H6 کی بکنگ شروع کر دے گی۔
نئے ویرینٹس
ہیوال ایس یو ویز کے مقامی سطح پر تیار ہونے والے یونٹس پیٹرول اور نئے ہائبرڈ ویرینٹس ہوں گے۔ کمپنی جولین اور ہیوال H6دونوں کے ہائبرڈ ویرینٹس متعارف کرانے کا منصوبہ بنا رہی ہے۔
ہم نے دسمبر 2021 میں کراچی میں پہلی ہیوال H6 ہائبرڈ الیکٹرک وہیکل (HEV) دیکھی۔ جس کے بعد کمپنی نے ڈسپلے کے لیے ہیوال H6 کے مزید ہائبرڈ یونٹس درآمد کیے ہیں۔ ہیوال جولین کا کوئی ہائبرڈ ویرینٹ ابھی تک نظر نہیں آیا لیکن کمپنی مقامی سطح پر ہائبرڈ جولین تیار کرنے کا منصوبہ رکھتی ہے۔
فیچرز
جب بھی ہم کسی امپورٹِڈ کار کی مقامی سطح پر تیاری کے بارے میں سنتے ہیں تو ہمارا پہلا سوال یہی ہوتا ہے کہ کیا مقامی سطح پر تیار کیے جانے والے اس یونٹ میں فیچرز کم کیے جائیں گے؟ اس بارے کمپنی کا کہنا ہے کہ مقامی طور پر تیار کیے جانے والے ہیوال جولین اور H6 کے یونٹس میں فیچرز کو کم نہیں یا جائے گا بلکہ مقامی سطح پر تیار کی جانے والے H6 کے یونٹس میں درآمد شدہ CBU یونٹس کی نسبت زیادہ فیچرز موجود ہوں گے۔
مقامی طور پر تیار شدہ ہیوالH6 اضافی فیچرز کے ساتھ ایک 2.0 لیٹر ٹربو ویرینٹ ہوگا۔ جس میں ہیڈ اپ ڈسپلے(HUD)، ایمبیئنٹ لائٹنگ، آٹومیٹک پارکنگ، آٹو ریورس اور سیٹ وینٹیلیشن وغیرہ۔جیسے فیچرزدئیے جائیں گے۔
دوسری جانب موجودہ جولین ویرینٹس کے مقامی سطح پر تیار کردہ یونٹس انہی فیچرز کے ساتھ دستیاب ہو گا جو کہ CBU یونٹس میں نظر آتے ہیں۔
کم قیمتیں
امپورٹڈ ہیوال جولین اور H6 کی قیمتیں قدرے زیادہ تھیں لیکن مقامی سطح پر تیار کردہ یونٹس پر کمپنی کو کم ٹیکسز کا سامنا کرنا پڑے گا۔ جس کے نتیجے میں قیمتیں نیچے آئیں گی۔
