کچھ دن پہلے ہم نے آپ کو بتایا تھا کہ سوزوکی پاکستان نے خاموشی سے سوزوکی بولان AC ویرینٹ کو بند کر دیا ہے۔ کمپنی کے ڈیلرشپ کے مطابق “AC والا کیری ڈبہ” اب فروخت کے لیے دستیاب نہیں ہے۔ ممکنہ وجوہات میں انجن کا زیادہ گرم ہونا، AC کی خراب کارکردگی اور AC کی وجہ سے باڈی کی وائبریشن شامل ہیں۔ مزید برآں، گاڑی کی سیل میں کمی بھی ایک اور بڑی وجہ ہو سکتی ہے جس کی وجہ سے اس ویرینٹ کو بند کر دیا گیا ہے۔
اعداد و شمار کے مطابق سوزوکی نے گزشتہ دو ماہ میں سوزوکی بولان کے صرف 580 یونٹ فروخت کیے ہیں۔ اس خبر کے منظر عام پر آنے کے بعد لوگوں نے سوال کرنا شروع کر دیا کہ کیا یہ پاکستان میں سوزوکی ایوری کے لانچ ہونے کا اشارہ ہے؟ کافی دیر سے سوال پوچھا جا رہا ہے۔ اس سال کے پاکستان آٹو شو (PAPS 2022) میں سوزوکی نے MPV کا ایک CBU یونٹ دکھایا، جس نے اس کے لانچ ہونے کی افواہوں کو بڑھاوا دیا ہے۔
سوزوکی ایوری کب لانچ ہوگی؟
اس سال کے آغاز میں ہمارے ذرائع نے ہمیں بتایا کہ یہ کار اکتوبر 2022 میں لانچ کی جائے گی اور یہ اطلاعات کافی مصدقہ تھیں۔ تاہم، اب مختلف اپڈیٹس ہیں کیونکہ ہمارے ذرائع نے ہمیں ممکنہ لانچ کے بارے میں اپ ڈیٹ کیا ہے۔ ذرائع کے مطابق اکتوبر 2022 کے آغاز میں گاڑی لانچ کرنے کا منصوبہ تھا۔ تاہم، اب اس میں تاخیر کا سامنا ہے. ذرائع نے دعویٰ کیا ہے کہ کچھ عہدیدار کہہ رہے ہیں کہ سوزوکی ایوری اب 2023 میں آئے گی جبکہ کچھ 2024 تک کا اشارہ بھی دے رہے ہیں۔
ذرائع کی مانیں تو گاڑی کی لانچ قریب نہیں ہے۔ تاہم، ہمیں لگتا ہے کہ سوزوکی کو لانچ کے لیے زیادہ انتظار نہیں کرنا چاہیے کیونکہ چنگان کاروان کی لانچ کے بعد سوزوکی بولان کی فروخت میں بڑی کمی آئی ہے۔ اس کے علاوہ، بولان موجودہ مارکیٹ کے لیے بہت پرانی گاڑی ہے جس میں کوئی خاص فیچر بھی موجود نہیں ہے۔
کیا آپ بھی ایوری کا انتظار کر رہے ہیں؟ کمنٹس سیکشن میں اپنے خیالات کا اظہار کریں۔
