کئی مہینوں کے بعد، ایک بار پھر، مقامی کار ساز کمپنیاں کم انوینٹری کی وجہ سے پیداوار بند کرنے کا اعلان کرنا شروع کر رہی ہیں جو کہ ان دنوں پاکستان آٹو انڈسٹری کی بگڑتی حالت کو مزید واضح کرتا ہے۔
اس بار، انڈس موٹر کمپنی (آئی ایم سی)، جو پاکستان کی آٹو موٹیو انڈسٹری میں اہم کھلاڑی سمجھی جاتی ہے، نے حال ہی میں 6 سے 11 مارچ تک 6 دن کی پیداوار میں کٹوتی کا اعلان کیا ہے۔ اور اس اقدام کے پیچھے کی وجہ نئی نہیں ہے بلکہ وہی پرانے مسائل ہیں جن میں انوینٹری میں کمی ( بشمول آٹو پارٹس اور دیگر اجزاء) اور سپلائی چین سے متعلقہ درپیش چیلنجز شامل ہیں جو کہ گاڑیوں کی پروڈکشن میں نمایاں رکاوٹ پیدا کرتے ہیں۔
ماہرین کی رائے
پچھلے ایک سال کے دوران انوینٹری کے مسائل کی وجہ سے پرودکشن کا بند ہو جانا کوئی نیا واقعہ نہیں ہے۔ کمپنیز کی جانب سے پروڈکشن پلانٹ کی بار بار بندش صورتحال کی سنگینی کو ظاہر کرتی ہے، جس سے صنعت کے ماہرین میں تشویش پائی جاتی ہے۔
خاص طور پر، آٹو سیکٹر کے ماہرین اور تجزیہ کاروں نے کہا کہ بار بار پروڈکشن کی بندش جیسے مسائل انڈسٹری کو مزید نقصان پہنچا رہے۔ اس دوران انھوں نہ صرف اس طرز کے منفی اثرات کو اجاگر کیا بلکہ حکومت سے فوری اقدامات کا مطالبہ بھی کیا ہے۔
ماہرین نے ترقی کو فروغ دینے، روزگار کے مواقع پیدا کرنے اور مہنگائی کو روکنے کے لیے ایک مضبوط صنعتی پالیسی کی ضرورت پر زور دیا۔ آنے والے بجٹ کے ساتھ، انہوں نے حکومت پر زور دیا کہ وہ ایسے اقدامات کو ترجیح دے جو مہنگائی کے دباؤ کو کم کریں اور صنعت کاری کو فروغ دیں۔
کار فنانسنگ میں مزید کمی
پاکستان کے آٹوموبائل فنانسنگ سیکٹر میں نمایاں مندی دیکھنے میں آئی ہے، جس میں سال بہ سال 25.82 فیصد کمی واقع ہوئی ہے۔ یہ اعداد وشمار جنوری 2024 میں 246.26 بلین روپے ہیں جبکہ اس کے مقابلے میں گزشتہ سال جنوری 2023 میں یہ 331.98 بلین روپے تھے۔
مزید برآں، دسمبر 2023 سے ماہانہ 1.98 فیصد کمی واقع ہوئی۔ سٹیٹ بینک آف پاکستان (SBP) کی طرف سے ظاہر کیے گئے یہ اعداد آٹوموبائل فنانسنگ میں مسلسل 19 ویں ماہانہ کمی کو ظاہر ہیں۔
اس کمی کی وجوہات میں کئی عوام کارفرما ہیں جن میں سب سے پہلے بلند شرح سود ہے جس نے قرض لینے کو مزید بڑا مسئلہ بنا دیا ہے، جس سے صارفین کی حوصلہ شکنی ہو رہی ہے۔ دوم، کاروں کی قیمتوں میں مسلسل اضافے نے گاڑیوں کو صارفین کی پہنچ سے دور کر دیا ہے۔
ٹویوٹا پاکستان کے حالیہ اقدام کے بارے میں آپ کے خیالات کیا ہیں؟ کمنٹس سیکشن میں ہمیں بتائیں۔
