لمبے سفر کیلئے بہترین لوکل بائکس کونسی ہیں؟

یہ جون کا وسط چل رہا ہے اور ہم موٹرسائیکل ٹور سیزن میں داخل ہو چکے ہیں۔ اگرچہ پاکستان کے پاس طویل سفر کے لیے مخصوص کوئی موٹرسائیکل نہیں ہے لیکن پھر بھی بہت سی مقامی بائکس ہیں جو لمبے سفدر اور کے لیے استعمال کی جا سکتی ہیں۔

یہاں ان موٹر سائیکلوں کی فہرست ہے جو لمبی سفر کے لیے بہترین آپشن ہو سکتی ہیں:

سوزوکی GS 150

سوزوکی GS 150 لمبے سفر کیلئے ایک بہترین آپشن ہو سکتا ہے۔ بائک میں 150 سی سی OHC ایئر کولڈ انجن دیا گیا ہے جو 13.4 نیوٹن میٹر ٹارک پیدا کرنے کی صلاحیت رکھتا ہے۔ اس کا کم وزن اور چوڑے ٹائروں کی وجہ سے اس کی پِک اور ایکسلریشن لمبے سفر کے لیے بہترین ہے۔ 5ویں گیئر کی وجہ سے، آپ اسے آسانی سے 6500 RPM پر 80 کلومیٹر فی گھنٹہ تک لے جا سکتے ہیں۔

خیال رہے کہ ہم خاص طور پر سادہ GS150 کے بارے میں بات کر رہے ہیں نہ کہ الائے رم SE ورژن کے بارے میں۔ اگر آپ کو استعمال شدہ موٹرسائیکل پر اعتراض نہیں ہے تو ہم GS150SE خریدنے کا مشورہ بھی دیتے ہیں، کیونکہ اس میں الائے اور ڈسک بریک ہیں۔ سادہ GS150 کے ساتھ واحد مسئلہ بریکس کا ہے۔ بائک میں کوئی ڈسک بریک نہیں ہیں، اس لیے اس 150 سی سی کی موٹر سائیکل کے لیے بریک لگانے کی صورت میں فورا رکنا تھوڑا مسئلہ ہے۔

یاماہا (Z, DX, G) YBR125

یاماہا YBR سیریز بھی لمبے سفر کے لیے اچھی آپشن ہے۔ اس کا انتہائی ہموار انجن اور صوفہ سیٹ آپ کے لمبے سفر کو خوشگوار بنا دے گی۔ تمام کریڈٹ اس کے بیلنسر شافٹ انجن کو جاتا ہے، جو 90 کلومیٹر فی گھنٹہ تک کوئی قابل توجہ وائبریشن پیدا نہیں کرتا ہے۔

تاہم، 90 کلومیٹر فی گھنٹہ کے بعد آپ وائبریشن کا چھوٹا سا احساس محسوس کرنا شروع کر دیں گے۔ YBRs میں بیٹھنے کا انداز سیدھا ہے، اس لیے لمبے راستے میں آپ کی کمر کو تکلیف نہیں پہنچے گی اورپانچواں گیئر آپ کو اس موٹر سائیکل کو 80 کلومیٹر فی گھنٹہ 7000 RPM کی رفتار سے چلانے کی اجازت دیتا ہے۔

ہنڈا CB 150F

اسی طرح CB 150F کو بھی لمبے سفر کیلئے استعمال کیا جا سکتا ہے۔ مسئلہ صرف یہ ہے کہ یہ ایک مہنگی موٹرسائیکل ہے۔ اس کی قیمت ساڑے 5 لاکھ ہے۔ اس بجٹ میں آپ آسانی سے اچھی حالت والی سوزوکی مہران تلاش کر سکتے ہیں جس میں آپ اپنی پوری فیملی کے ساتھ سفر کر سکتے ہیں۔

بہر حال، سی بی 150 لمبے سفر کے لحاظ سے GS150 اور YBR سے کہیں بہتر ہے۔ یہ ایک 150 سی سیOHC  بیلنسر شافٹ انجن کے ساتھ آتی ہے اور سیٹ صوفے کی طرح آرام دہ اور واقعی نرم ہے۔ CB کا ٹارک بھی بہت اچھا ہے، تقریباً GS150 جیسا ہی ہے، لیکن بیلنس شافٹ کی وجہ سے GS سے زیادہ ہموار ہے۔ اس کے پارٹس کا معیار بھی CB میں GS سے بہتر ہے۔

مجموعی طور پر، اگر آپ لمبے سفر کے لیے اس مہنگی بائک کو برداشت کر سکتے ہیں، تو یہ آپ کو مایوس نہیں کرے گی!

ہنڈا سی جی 125

ہم جانتے ہیں کہ CG 125 سب سے زیادہ غیر آرام دہ موٹرسائیکل ہے اور یہ ایک مکمل وائبریشن ہاؤس ہے۔ تاہم، لوگوں کو ایک نکتہ سمجھنا چاہیے: اس مضمون میں مذکور تمام ٹورنگ بائیکس کی قیمت 380000 روپے سے زیادہ ہے۔ اس کا مطلب ہے کہ موٹرسائیکل پر سیر کرنا ایک مہنگا مشغلہ ہے لیکن اگر کسی کے پاس لمبے سفر کیلئے مہنگی موٹر سائیکل نہیں ہے اور وہ پھر بھی بائک پر لمبا سفر کرنا چاہتا ہے تو سی جی 125 اچھی آپشن پو سکتی ہے اور اسی لیے ہم سی جی 125 کا ذکر کر رہے ہیں۔ یہ کم بجٹ والے بائیکرز کے لیے ایک بہترین آپشن ہے جو طویل سفر کے لیے  YBRسوزوکی جی ایس یا سی بی 125 خریدنے کے متحمل نہیں ہو سکتے۔ CG125 درحقیقت ایک پاورفل بائیک ہے جو ایکسلریشن اور ٹارک کے لحاظ سے YBR اور CB150 کو مات دیتی ہے لیکن اس کی غیر آرام دہ سیٹ اور وائبریشن بڑا مسئلہ ہیں۔

بس سفر کے دوران ہر گھنٹے کے بعد وقفہ لیں اور RPMs کو 7,000 سے کم رکھیں تاکہ آپ وائبریشنز سے متاثر نہ ہوں۔

سوزوکی GR 150

سوزوکی  GR 150بھی لمبے سفر کیلئے ایک اچھی بائک ہے اور یہ وہ تمام سہولیات فراہم کرتی ہے جو لمبے سفر کے لیے درکار ہوتی ہیں۔ یعنی کہ ایک آرام دہ سیٹ، ایک اچھا انجن، اچھا ٹوک ریشو، ہموار سواری کے لیے الائے رِمز، اضافی نرم سسپنشن اور ایک اچھی ہیڈلائیٹ۔

اس کے علاوہ بائک میں کوئی بیلنسر شافٹ نہیں ہے۔ وائبریشن بہت کم ہے  خاص طور پر جب آپ 80 کلومیٹر فی گھنٹہ سے اوپر جاتے ہیں۔ تاہم، وہ سی جی کی طرح شدید نہیں اور غیر آرام دی نہیں ہے۔ آپ کمر کے درد کے بغیر اس بائک کو 1 سے 2 گھنٹے تک آسانی سے چلا سکتے ہیں۔