یونائیٹڈ آٹو انڈسٹریز نے اپنی یونائیٹڈ US-150 بائیک کی قیمت میں اضافہ کر دیا ہے۔ ایک نوٹیفکیشن کے مطابق اس مخصوص موٹر سائیکل کی قیمت میN 60000 روپے کا اضافہ کیا گیا ہے۔ جس کے بعد بائک کی قیمت 270000 روپے سے بڑھ کر 330000 روپے ہو گئی ہے۔ بلاشبہ، بائک کی قیمت میں یہ ایک حیران کن اضافہ ہے۔ مزید برآں، یہ اضافہ اس وقت کیا گیا ہے کہ جب ڈالر کی شرح روپے کے مقابلے میں مستحکم ہے اور صارفین قیمت میں کمی کی توقع کر رہے تھے۔
کمپنی کیجانب سے جاری کیے گئے نوٹیفکیشن کے مطابق نئی قیمت کا اطلاق 5 نومبر 2023 سے ہوگا۔
یونائیٹڈ US-150
کمپنی کے ایک ڈیلر کے مطابق، یہ ایک امپورٹڈ بائک ہے اور اسی وجہ سے اس کی قیمت میں اس قدر اضافہ دیکھنے میں آیا ہے۔ اس کے باوجود بائک کی قیمت میں یہ ریکارڈ اضافہ صارفین کیلئے کافی پریشان کن ہے جس کی وجہ سے اب اس بائک کو بھی نقد خریدنا ناممکن ہو چکا ہے۔ دلچسپ بات یہ ہے کہ کوئی بھی کمپنی قیمتوں میں بار بار اضافے کی صحیح وجہ بتانے میں ناکام رہی ہے۔ چاہے ہنڈا ہو یا یاماہا یا پھر یونائیٹڈ۔ جب ڈالر کے مقابلے میں روپے کی قدر میں کمی دیکھنے کو ملتی ہے تو بائک کمپنیاں قیمتوں میں اضافہ کرنے میں بہت جلدی کرتی ہیں، لیکن گزشتہ چند مہینوں میں روپے کی اچھی کارکردگی کے باوجود، قیمتیں اب بھی بڑھ رہی ہیں جو کہ کافی عجیب بات ہے۔
ڈیزائن کے حوالے سے یونائیٹڈ 150 ملک کی مشہور ہنڈا CB150F سے متاثر نظر آتی ہے۔ اس کا ڈسک بریک سسٹم موثر بریکنگ پرفارمنس کو یقینی بناتا ہے جبکہ سیلف سٹارٹر کی سہولت صارف کے مجموعی تجربے میں اضافہ کرتی ہے۔
