اٹلس ہونڈا اپنی پیداوار بڑھا کر سالانہ 15 لاکھ یونٹس تک پہنچائے گا

پاکستان کے سب سے بڑے موٹر سائیکل بنانے والے ادارے اٹلس ہونڈا نے اعلان کیا ہے کہ ادارہ اپنی پیداواری صلاحیت کو بڑھاتے ہوئے سالانہ 15 لاکھ یونٹس تک پہنچائے گا۔ بورڈ آف ڈائریکٹرز نے پہلے سے موجود کارخانے کے توسیعی منصوبے کی منظوری دے دی ہے جس پر اندازاً 15 ملین ڈالرز کی لاگت آئے گی۔

ادارے نے رواں سال جنوری میں ایک لاکھ سے زیادہ موٹر سائیکلیں فروخت کیں، اور لوگوں کی قوت خرید میں اضافے کے ساتھ ادارے کا ہدف مارکیٹ میں اپنے حصے کو مزید بڑھانا ہے۔

پیداواری صلاحیت کو بڑھانے کے منصوبے کے ساتھ اٹلس ہونڈا نے 31 مارچ 2018ء کو مکمل ہونے والے سال کے لیے اپنے منافع کا بھی اعلان کیا۔ ادارے کے مطابق اس نے 4.66 ارب روپے کا منافع حاصل کیا جو مقابلتاً 24.27 فیصد زیادہ ہے، ادارے نے گزشتہ سال کے اسی عرصے میں 3.75 ارب روپے کا خالص منافع حاصل کیا تھا۔

ادارے کی مجموعی فروخت 64.53 ارب روپے سے بڑھ کر 77.47 ارب روپے تک پہنچی یعنی 20.05 فیصد اضافہ ہوا۔ مزید برآں، ادارے کی فی حصص آمدنی میں بھی اضافہ ہوا، جو اب 45.10 روپے پر موجود ہے۔

دوسری جانب پاک سوزوکی نے بھی 31 مارچ 2018ء کو ختم ہونے والی سہ ماہی کے لیے اپنے منافع کا اعلان کردیا ہے؛ اس عرصے میں اس نے 904.14 ملین پاکستانی روپے کا منافع حاصل کیا۔ مزید برآں، ہیسکول نے سال 2017ء کے لیے اپنے منافع کا اعلان کیا اور یہ کافی امید افزاء لگتا ہے۔ ادارے نے پاکستان اسٹاک ایکسچینج کو جو نوٹس بھیجا ہے اس کے مطابق کمپنی نے 1.32 ارب روپے کا منافع حاصل کیا، جو گزشتہ سال کے مقابلے میں 10 فیصد زیادہ ہے۔

آٹوموبائل سے متعلق اہم خبروں کے لیے PakWheels.com پر آتے رہیے۔