مہنگی اور پرتعیش گاڑیاں بنانے والے ادارے اپنی برانڈ کو زبان زد عام کرنے کے لیے مختلف طریقہ کار اپناتے ہیں۔ ان میں سے ایک طریقہ فیشن ڈیزائنر برانڈز کے اشتراک سے پیش کی جانے والی منفرد اور دیدہ زیب مصنوعات بھی ہیں۔ آپ نے ضرور لامبورگینی، فراری، پورشے جیسے اداروں کے نام یا لوگو سے مزین مردانہ بٹوے، خواتین کے بیگز، سوٹ کیس، موبائل فون اور گھڑیاں بھی دیکھی ہوں گی۔ یہ تمام اشیا بہت محدود تعداد میں بنائی جاتی ہیں جن کا معیار مہنگی گاڑیوں کی طرح بہت اعلی ہوتا ہے اور اسی اعتبار سے ان کی قیمتیں بھی کافی زیادہ ہوتی ہیں۔
بنا تار والے بلوٹوتھ اسپیکرز کے استعمال میں روز بروز اضافہ ہورہا ہے۔ آج تقریباً ہر گھر میں تفریح کے لیے ایک نہ ایک بلوٹوتھ اسپیکر سسٹم موجود ہوتا ہی ہے۔ اسی رجحان کو مدنظر رکھتے ہوئے اطالوی کار ساز ادارے لامبورگینی نے اسپیکرز بنانے والی ہم وطن کمپنی iXOOST کے ساتھ کچھ منفرد پیش کرنے کا فیصلہ کیا۔ اور یوں ایساووکس (Esavox) کے نام سے ایک بلوٹوتھ اسپیکر وجود میں آیا جو نہ صرف ایوانتادور کے انداز بلکہ اس کی تکنیکی خصوصیات کا بھی حامل ہے۔ اب تک فراہم کی جانے والی معلومات کے مطابق اس بلوٹوتھ اسپیکر کا معیار لامبورگینی جتنا ہی بہترین ہوگا۔ اس اسپیکرز سسٹم کی تیاری میں وہی ساز و سامان اور ٹیکنالوجی استعمال کیا جارہا ہے جو ایونتادور میں استعمال کیا گیا ہے۔ اسپیکر سسٹم کے اگلے حصے میں لامبورگینی ایونتادور کے مخصوص ڈیزائن والے ایگزاسٹ موجود ہیں اور ان اسپیکر کو چلانے یا بند کرنے والے بٹن کا ڈیزائن بھی ایونتادور میں شامل بٹن کے ہوبہو ہے۔
یہ بھی پڑھیں: کراچی میں لامبورگینی کاؤنٹیچ کی ہوبہو نقل تیار
اسپیکر بنانے والے ادارے نے تھرتھراہٹ کو کم کرنے اور بطور ڈمپر استعمال کرنے کے لیے خصوصی شاک آبزرونگ سسٹم بھی بنایا ہے۔ اس میں شامل 6.5 کے اسپیکرز اور کاربن سے تیار کردہ دو 8 انچ کے ووفرز بہترین تجربہ فراہم کرتے ہیں جبکہ 15 انچ کا سب ووفر اور دو 1 انچ کے ٹویوٹرز بھی اس کے اندر لگائے گئے ہیں۔ علاوہ ازیں اس میں 2 اسٹیریو والوز بھی دیئے گئے ہیں جو ایمپلیفائر کے ساتھ مل کر 600 واٹس کی قوت فراہم کرتے ہیں۔ 200 واٹ سب ووفر کے لیے بھی مخصوص رکھے گئے جبکہ آواز کا معیار یقنی بنانے کے لیے دو 24 بٹ ڈیجیٹل سنگل پراسسرز والے فریکوئنسی کنٹرول بھی شامل ہیں۔ یہ اسپیکر سسٹم بلوٹوتھ 4.0 کے علاوہ آڈیو کیبل سے بھی منسلک کیا جاسکتا ہے۔ اس اسپیکر سسٹم کواسمارٹ فون سے چلانے کے لیے ایپ بھی تیار کی گئی ہے۔
دستی تیار شدہ 800 واٹ اسپیکر سسٹم لامبورگینی ایونتادور کے رنگوں میں دستیاب ہے۔ اطالیہ سے تعلق رکھنے والے معروف کار ریسر اور اسکودریا فراری گراں پری موٹر ریسنگ ٹیم کے بانی اینزو فراری کا مشہور قول ہے کہ “12-سلینڈر کی آواز اتنی ہی محترم ہے جتنا کوئی ترانہ، 12-سلینڈر فراری کی آواز وہ دھن ہے کہ جسے کوئی موصل (conductor) تیار نہیں کرسکا”۔ 24 ہزار ڈالر کی قیمت میں آپ کی مرضی کے مطابق تیار کیا جانے والا یہ اسپیکر سسٹم نہ صرف ایونتادور جیسی دلکشی کا حامل ہوگا بلکہ اونتادور جیسی خوبصورت دھنیں بھی پیش کرسکے گا۔
