مسافروں کو سہولت دینے اور ٹریفک کے مسائل کو حل کرنے کے لیے سٹی ٹریفک پولیس (CTP) لاہور نے پاک-سری لنکا ٹی ٹوئنٹی سیریز کے لیے ٹریفک ایڈوائزری پلان جاری کردیا ہے۔
صوبائی دارالحکومت 5 سے 9 اکتوبر 2019ء کے دوران پاکستان اور سری لنکا کے مابین 3 میچز کی ٹی ٹوئنٹی سیریز کی میزبانی کر رہا ہے۔ یہ تمام انٹرنیشنل میچز قذافی اسٹیڈیم، لاہور میں کھیلے جائیں گے کہ جن کے لیے ٹریفک پلان، ٹریفک کے لیے متبادل راستے، مخصوص پارکنگ مقامات اور ٹریفک ہدایات جاری کردی گئی ہیں۔ عوام سے اپیل ہے کہ وہ مذکورہ تاریخوں میں کسی بھی قسم کی دشواری سے بچنے کے لیے ان ہدایات پر عمل کریں۔ مندرجہ ذیل پارکنگ مقامات لاہور کے مختلف علاقوں سے قذافی اسٹیڈیم کا سفر کرنے والے شہریوں کے لیے مخصوص ہیں۔
مخصوص پارکنگ مقامات:
مغل پورہ، مال روڈ اور جیل روڈ سے آنے والا ٹریفک فورمین کرسچن کالج کے لیے کینال روٹ پر جائے گا۔
مزنگ، اچھرہ اور وحدت روڈ سے آنے والے FC کالج کی جانب شاہ جمال روٹ کا انتخاب کریں گے۔
FC کالج پارکنگ ظہور الٰہی روڈ، مین مارکیٹ گلبرگ اور حالی روڈ سے آنے والے بھی استعمال کریں گے۔
کاہنہ، کوٹ لکھپت اور فیروز پور روڈ سے آنے والے شہری قینچی، والٹن روڈ، کیولری، جناح فلائی اوور، فردوس مارکیٹ سے حسین چوک لبرٹی مارکیٹ پارکنگ کا راستہ لیں گے۔
لبرٹی مارکیٹ پارکنگ کو وہ بھی استعمال کریں گے جو والٹن اور ڈیفنس روڈ سے بذریعہ کیولری، فردوس مارکیٹ اور حسین چوک میچ دیکھے آئیں گے۔
پنجاب یونیورسٹی بوائز ہاسٹل گراؤنڈ پارکنگ موٹر وے، ٹھوکر نیاز بیگ، واپڈا ٹاؤن، گارڈن ٹاؤن، جوہر ٹاؤن اور ٹاؤن شپ سے بذریعہ برکت روڈ اور پنجاب یونیورسٹی کیمپس برج آنے والوں کے لیے مخصوص ہے۔
سن فورٹ ہوٹل کے پیچھے واقع LDA پارکنگ پلازا کینٹ اور گلبرگ کے علاقوں سے آنے والے استعمال کریں گے۔
ٹریفک کے لیے متبادل راستے:
کینال روڈ کی دونوں سڑکیں میچ کے دنوں میں عوام کے لیے کھلی ہوں گی۔
فردوس مارکیٹ، حسین چوک، ایم ایم عالم روڈ، مِنی مارکیٹ، مین بلیوارڈ گلبر گ اور صدیق ٹریڈ سینٹر کی طرف جانے والے راستے بدستور کھلے رہیں گے۔
فردوس مارکیٹ، سینٹر پوائنٹ اور کلمہ چوک سے برکت مارکیٹ جانے والا راستہ عام ٹریفک کے لیے کھلا رہے گا۔
صدیق ٹریڈ سینٹر سے بذریعہ جیل روڈ کینال برج سے قرطبہ چوک جانے والا راستہ مذکورہ تاریخوں پر کھلا رہے گا۔
فیروز پور روڈ بذریعہ وحدت روڈ ٹریفک کے لیے کھلا رہے گا۔
کسی دشواری سے بچنے کے لیے اہم ہدایات:
ان دنوں میں تمام چنگ چی اور آٹو رکشوں (LPG/LNG, CNG) وغیرہ کے مذکورہ پارکنگ علاقوں میں داخل ہونے پر پابندی ہوگی۔
کاروں میں سفر کرنے والے تمام مسافر کا میچ ٹکٹ کے ساتھ اپنے CNICلانا بھی ضروری ہے۔
مخصوص پارکنگ علاقوں اور اسٹیڈیم میں داخل ہونے کے لیے ٹریفک حکام سے رہنمائی طلب کریں۔
قذافی اسٹیڈیم کی جانب غیر ضروری سفر سے گریز کریں اور ٹریفک میں پھنسنے سے بچنے کے لیے میٹرو بس سروس کا استعمال کریں۔
شہریوں کو سہولت دینے کے لیے پارکنگ ایریاز سے اسٹیڈیم تک مفت شٹل سروس بھی فراہم کی گئی ہے۔
شہر میں ٹریفک کی ہر وقت بدلتی ہوئی صورت حال سے آگاہ رہنے کے لیے راستہ ایپ سے جڑے رہیں۔
سعید انور، سرفراز نواز، سعید احمد، جاوید میانداد اور عمران خان انکلوژر کے لیے ٹکٹ رکھنے والے شہریوں کو لبرٹی پارکنگ استعمال کرتے ہوئے قذافی گیٹ سے داخل ہونے کا مشورہ دیا جاتا ہے۔
عبد القادر، ماجد خان، عبد الحفیظ کاردار اور فضل محمود انکلوژر کے ٹکٹ رکھنے والوں کو FC کالج اور پنجاب یونیورسٹی بوائز ہاسٹل گراؤنڈ پارکنگ استعمال کرتے ہوئے فیروز پور روڈ والا گیٹ استعمال کرنے کی ہدایت دی جاتی ہے۔
مزید یہ کہ شہری ٹریفک پولیس ہیلپ لائن 15 کا استعمال کر سکتے ہیں اور ٹریفک صورت حال سے تازہ ترین آگہی حاصل کرنے کے لیے FM 88.6 سن سکتے ہیں۔ یہ تمام اقدامات لاہور میں میچز کے دوران ٹریفک کے بہاؤ کو برقرار رکھنے کے لیے اٹھائے جا رہے ہیں۔ ایک ذمہ دار شہری کی حیثیت سے آپ کو ٹریفک پولیس لاہور کی جانب سے مذکورہ ہدایات پر عمل کرنا چاہیے تاکہ کسی قسم کی دشواری کا سامنا نہ کریں۔ ٹریفک پلان میں کسی بھی تبدیلی کے حوالے سے تازہ ترین اطلاعات کے لیے پاک ویلز پر آتے رہیے۔ اپنے خیالات نیچے تبصروں میں پیش کیجیے۔
