پاکستان سپر لیگ (PSL) شروع ہوا چاہتی ہے۔ کرکٹ کھیلنے والے 15 ممالک کے کھلاڑی اس ٹی ٹوینٹی لیگ میں شرکت کر رہے ہیں۔ یہ تمام ہی کھلاڑی نہ صرف اپنے ممالک بلکہ دنیا بھر میں بہت شہرت رکھتے ہیں۔ کرس گیل اور کیون پیٹرسن جیسے خطرناک اور معروف بلے بازوں کی موجودگی نے پاکستان سپر لیگ 2016 میں مزید جوش شامل کردیا ہے۔بہت سے شائقین کرکٹ اپنے پسندیدہ کھلاڑیوں کے بارے میں جاننے کے لیے بے تاب رہتے ہیں تاہم بہت کم کھلاڑی ایسے ہیں جو اپنی ذاتی زندگی سے مداحوں کو آگاہ کرتے رہتے ہیں۔ آئیے ہم آپ کو بتاتے ہیں کہ PSL 2016 کے پانچ مشہور کھلاڑی کونسی گاڑیاں استعمال کرتے ہیں۔
یہ بھی پڑھیں: گلی کرکٹ کا بڑھتا ہوا رجحان خطرناک حادثات کی وجہ بن سکتا ہے
شعیب ملک
پاکستان ٹی ٹوینٹی کرکٹ ٹیم کے سب سے کامیاب کپتان شعیب ملک PSL 2016 میں کراچی کنگز کی قیادت کریں گے۔ چند سال قبل بھارتی ٹینس اسٹار ثانیہ مرزا سے شادی کے بعد شعیب کو بھارت میں بھی بے پناہ مقبولیت حاصل ہوئی۔ وہ آج کل اپنی اہلیہ کے ہمراہ متحدہ عرب امارات میں رہائش پزیر ہیں۔ وہاں انہوں نے اپنے لیے ٹویوٹا سُپرا خرید رکھی ہے۔
مصباح الحق
پاکستان ٹیسٹ ٹیم کے کپتان PSL 2016 میں اسلام آباد یونائیٹڈ کی قیادت کریں گے۔ ملک میں مصباح کے جتنے ناقدین ہیں اس سے کہیں زیادہ مداح موجود ہیں۔ انہیں سست رفتاری سے بلے بازی کرنے پر تنقید کا نشانہ بنایا جاتا رہا ہے لیکن دلچسپ بات یہ ہے کہ مصباح الحق کے پاس ٹیسٹ کرکٹ میں سب سے تیز رفتار سنچری بنانے کا ریکارڈ بھی ہے۔ بہرحال، مصباح ایک متمول گھرانے سے تعلق رکھتے ہیں جن میں کھیلوں کے ساتھ گاڑیاں کا بھی شوق پایا جاتا ہے۔ ہونڈا سِوک کے علاوہ مصباح الحق کو ٹویوٹا لینڈ کروزر کے ساتھ بھی دیکھا گیا ہے۔
شاہد آفریدی
بوم بوم آفریدی بلاشبہ دور حاضر کے سب سے مشہور پاکستانی کرکٹر ہیں۔ اپنی جارحانہ بلے بازی اور گھومتی ہوئی گیندوں سے مخالف ٹیم کے چھکے چھڑانے والے آفریدی کا شمار امیر ترین کھلاڑی میں بھی کیا جاتا ہے۔ شاہد آفریدی PSL 2016 میں پشاور زالمی کی قیادت کریں گے۔ ویسے تو کراچی میں گاڑیاں کا پورا شوروم رکھتے ہیں لیکن خود بی ایم ڈبلیو 7 سیریز، مٹسوبشی پجیرو، رینج رووَر اور ٹویوٹا لینڈ کروزر چلانا پسند کرتے ہیں۔
کیون پیٹرسن
انگلستان کے متنازع لیکن باصلاحیت کھلاڑی کیون پیٹرسن بھی PSL 2016 میں شرکت کر رہے ہیں۔ بین الاقوامی کرکٹ سے ریٹائرمنٹ کے بعد انہوں نے کاؤنٹی اور ٹی ٹوینٹی لیگز میں حصہ لینا شروع کیا یوں انہیں پاکستان سپر لیگ میں شامل تجربکار کھلاڑیوں کی فہرست میں شامل کیا جاسکتا ہے۔ کوئٹہ گلیڈیئٹرز کے دستے میں شامل کیون پیٹرسن چمکتی دمکتی اور مہنگی گاڑیوں کا شوق رکھتے ہیں اور انہیں اکثر لامبورگنی گیلارڈو اور آسٹن مارٹن چلاتے ہوئے دیکھا گیا ہے۔ علاوہ ازیں ان کے پاس ٹیسلا اور مرسڈیز جی ویگن بھی ہے۔
کرس گیل
ویسٹ انڈیز کے نامور آل راؤنڈر کرس گیل بہت خوش طبع شخصیت کے مالک ہیں۔ میدان کے اندر اور باہر کسی بھی جگہ اور کسی بھی وقت وہ زندہ دلی کا مظاہرہ کرنے سے کبھی نہیں ہچکچاتے۔ گیل PSL 2016 میں لاہور کی نمائندگی کریں گے۔ کرس گیل کے پاس بہت سی گاڑیاں موجود ہیں لیکن وہ سب سے زیادہ مرسڈیز SUV استعمال کرنا پسند کرتے ہیں۔
کرکٹ کا شمار دنیا کے مہنگے ترین کھیلوں میں کیا جانے لگا ہے۔ انڈین پریمیرلیگ، بگ بیش جیسے ٹی ٹوینٹی ٹورنامنٹس کے بعد تو کھلاڑیوں کی آمدنی میں زبردست اضافہ ہوا ہے۔اور اس اضافی آمدنی سے کھلاڑی نئی مہنگی گاڑیوں کی خریداری بھی کرتے ہیں۔
