پاکستان میں الیکٹرک گاڑیوں کے فروغ کے لیے حکومت کی نظریں 3,000 سی این جی اسٹیشنوں کو الیکٹرک وہیکل (EV) چارجنگ اسٹیشنوں میں تبدیل کرنے پر ہیں۔
حکومت پہلی نیشنل الیکٹرک وہیکل پالیسی (NEVP) کے ذریعے ملک میں الیکٹرک گاڑیاں لانے کی خواہشمند ہے۔ وزیر اعظم عمران خان 2030ء تک ملک میں 70 فیصد گاڑیوں کو الیکٹرک پر منتقل کرنے کا ہدف رکھتے ہیں۔ ایک حالیہ پیشرفت میں حکومت نے 3,000 سی این جی اسٹیشنوں کو EV چارجنگ اسٹیشن میں تبدیل کرنے کا فیصلہ کیا ہے۔ اس طرح ملک میں الیکٹرک گاڑیوں کا کلچر جلد فروغ پائے گا۔ اس وقت پاکستان میں الیکٹرک گاڑیاں چارج کرنے کے لیے کوئی انفرا اسٹرکچر موجود نہیں۔ حکومت پاکستان میں الیکٹرک گاڑیاں متعارف کروا کر ‘کلین اینڈ گرین پاکستان’ کی مہم کو آگے لے جانا چاہتی ہے۔ فضائی آلودگی بھی بہت بڑھ گئی ہے، جس کا بڑا حصہ روایتی ایندھن سے چلنے والی گاڑیوں سے آتا ہے۔ البتہ حکومت کو EV پالیسی کی تیاری کے حوالے سے اب بھی آٹو انڈسٹری کی جانب سے تنقید کا سامنا کرنا پڑ رہا ہے۔ وزیر اعظم کے مشیر برائے موسمیاتی تبدیلی ملک امین اسلم کے مطابق اسٹیک ہولڈرز کے مسائل حل کرنے کے لیے پالیسی میں کچھ ترامیم کی جائیں گی۔
پاکستان تحریکِ انصاف کی حکومت اگلے 4 سال کے عرصے میں 1,00,000 مسافر کاریں اور 5,00,000 موٹر سائيکلیں اور رکشے الیکٹرک میں تبدیل کرنے کا ہدف رکھتی ہے۔ البتہ الیکٹرک گاڑیوں کو عوام میں مقبول کرنے کے لیے حکومت کو متعدد چیلنجز کا سامنا ہے کہ جن میں الیکٹرک گاڑیوں کے لیے انفرا اسٹرکچر کی تیاری بھی شامل ہے۔ EV چارجنگ اسٹیشنوں کی دستیابی کے بغیر عوام کو اپنی گاڑیاں گھروں پر چارج کرنا پڑیں گی جس سے بجلی کے مقامی ٹرانسفارمرز پر بہت بوجھ پڑے گا۔ زیادہ اہم بات یہ کہ حکومت کو سستے چارجنگ انفرا اسٹرکچر بنانے ہوں گے تاکہ وہ اگلے 10 سال میں اپنا ہدف حاصل کر سکے۔
ابتدائی مرحلے میں بیٹری سے چلنے والی گاڑیوں کی قیمتیں پاکستان میں EVs کے مستقبل کے حوالے سے ایک اہم عنصر ہوں گی۔ بہرحال، اس سے فضائی معیار میں بہت بہتری آئے گی کہ جو کاربن اخراج کی وجہ سے بُری طرح متاثر ہوئی ہے۔ حکومت عوام کے لیے سستی ٹرانسپورٹ بھی لانا چاہتی ہے۔ اس کے علاوہ وزیر اعظم کے مشیر برائے موسمیاتی تبدیلی یہ بھی سمجھتے ہیں کہ الیکٹرک گاڑیوں کی جانب منتقلی سے ملک کے سالانہ آئل اِمپورٹ بل میں تقریباً 1 ارب ڈالرز کی کمی ہوگی۔ اس شعبے میں نئی سرمایہ کاری کی توجہ حاصل کرنے کے لیے حکومت ٹیکس پر متعدد رعایتیں بھی دے رہی ہے۔ یہ دیکھنا واقعی دلچسپی ہوگا کہ آیا حکومت ملک میں EV کلچر کو حقیقت کا روپ دینے میں کامیاب ہو پاتی ہے یا نہیں۔
نیچے اپنی رائے پیش کیجیے اور گاڑیوں کی دنیا سے مزید خبروں کے لیے پاک ویلز بلاگ پر آتے رہیے۔
